«مەملەكەت باسشىسى قاسىم-جومارت كەمەل ۇلى توقاەۆ ايتقان «جاڭا قازاقستان» قۇرۋ جولىندا پارلامەنتكە ارتىلار جۇك تە, جۇكتەلەر جاۋاپكەرشىلىك تە وتە زور. سوندىقتان وسىناۋ سىندارلى كەزەڭدە حالىق سەنىمىنەن شىعىپ, پرەزيدەنت باستامالارىن بارىنشا قولداۋ – ءبىزدىڭ باستى مىندەت. سايلاۋشىلار تاراپىنان دەپۋتاتتارعا قويىلاتىن تالاپ قاشان دا جوعارى ەكەندىگىن وزدەرىڭىز بىلەسىزدەر. اسىرەسە, كەشەگى قاڭتار وقيعالارى – بۇكىل ەلىمىز ءۇشىن ۇلكەن سىن بولدى. كۇن تارتىبىندە تاۋەلسىزدىگىمىز مەن مەملەكەتىمىزدىڭ تۇتاستىعىن ساقتاپ قالۋ ماسەلەسى تۇردى. ەلدىگىمىزگە قاۋىپ تونگەن وسى سىن ساعاتتا مەملەكەت باسشىسى بارلىق جاۋاپكەرشىلىكتى وزىنە الىپ, باتىل شەشىمدەر قابىلدادى. پرەزيدەنت حالىق قاۋىپسىزدىگى مەن مەملەكەت مۇددەسى بارىنەن بيىك ەكەندىگىن ءوز ىسىمەن دالەلدەدى», دەدى ە. قوشانوۆ ءماجىلىستىڭ جالپى وتىرىسىندا.
وسى ورايدا ءماجىلىس توراعاسى ءبىرىنشى كەزەكتە, پارلامەنت جۇمىسىنىڭ اشىقتىعىن قامتاماسىز ەتۋ قاجەت ەكەنىن اتاپ ءوتتى. حالىق سايلاعان دەپۋتاتتار – ەڭ الدىمەن, ءوز سايلاۋشىلارىنا جاقىن بولۋ كەرەك.
«قوعامنىڭ ءۇنىن ەستىپ, حالىقتىڭ ءتىلىن ءتۇسىنۋ جانە دەر كەزىندە شارالار قابىلداۋ – كەز كەلگەن كەلەڭسىزدىكتىڭ الدىن الۋدىڭ نەگىزگى العىشارتى ەكەنى تۇسىنىكتى. سوندىقتان الداعى ۋاقىتتا, دەپۋتاتتار كورپۋسىنىڭ ازاماتتىق سەكتورمەن, بۇقارالىق اقپارات قۇرالدارى وكىلدەرىمەن, اسىرەسە, وڭىرلەردەگى قوعام بەلسەندىلەرىمەن تىعىز بايلانىسىن ودان ارى جانداندىراتىن بولامىز. بۇل – پرەزيدەنت بەكىتكەن «حالىق ۇنىنە قۇلاق اساتىن مەملەكەت» قاعيداسىن ناتيجەلى جۇزەگە اسىرۋدىڭ دا باستى ۇستانىمى. الدىمىزعا قويىلعان جاڭا مىندەتتەردى تابىستى ورىنداۋ ءۇشىن ازاماتتىق قوعاممەن قاتار, مەملەكەتتىك ورگانداردىڭ بارلىق تارماقتارىمەن, سونىڭ ىشىندە, سەناتپەن, ۇكىمەتپەن, سوت سالاسىمەن ءوزارا تىعىز ىنتىماقتاستىقتا جۇمىس ىستەيمىز», دەدى ول.
