ۋكراينانى قازاقستاننىڭ وسى بىرىنشىلىكتەگى ەڭ مىقتى قارسىلاسى بولدى دەپ ايتا المايمىز. ارينە, قۇرلىق چەمپيوناتىندا وسال كوماندا جوق, بىراق جەرلەستەرىمىز ءدال وسى ۋكراينالىقتاردان جەڭىلۋگە ءتيىس ەمەس ەدى. ماتچ الدىندا بىرقاتار اۋزى دۋالى فۋتزال مامانى مەن بۋكمەكەرلىك كەڭسەلەر بولجام جاساپ, قازاقستاننىڭ جەڭىسىنە سەنىمدى بولعان-دى.
ويتكەنى كاكا شاكىرتتەرى توپتىق كەزەڭدە جاقسى ناتيجە كورسەتىپ, ءوز توبىندا ءبىرىنشى ورىنمەن شيرەك فينالعا جولداما الدى. جەرلەستەرىمىز العاشقى ويىندا سلوۆەنيامەن تەڭ ويناسا (4:4), كەيىنگى ەكى ماتچتا ازۋلى دەگەن يتاليا (4:1) مەن فينليانديا (6:2) قۇرامالارىن تىزە بۇكتىردى.
ۋكراينانىڭ توپتىق كەزەڭدەگى جولىنا ۇڭىلسەك, الەكساندر كوسەنكو باپتايتىن قۇراما ا توبىنىڭ ءبىرىنشى تۋرىندا جارىس قوجايىندارى نيدەرلاند قۇراماسىنان 3:2 ەسەبىمەن جەڭىلىپ, كەيىنگى ماتچتا سەربيانى 6:1 ناتيجەسىمەن قاپى قالدىردى. سوڭعى تۋردا بىلتىرعى الەم چەمپيونى – پورتۋگاليادان جەڭىلدى – 1:0. ءۇش ويىندا نەبارى 3 ۇپاي ولجالاعان ۋكراينالىقتار تەك دوپ ايىرماسىنىڭ ناتيجەسىندە عانا كەلەسى كەزەڭگە ءوتتى.
ماتچقا توقتالار بولساق, ءبىرىنشى تايمدا قارسىلاستارىنا قاراعاندا قازاقستان قۇراماسى اشىق ءارى جانكۇيەرلەرگە ۇنايتىنداي ويىن كورسەتتى. دەگەنمەن ءبىرىنشى تايمنىڭ اياقتالۋىنا بەس مينۋت قالعاندا باس تورەشى ءبىزدىڭ قاقپاعا پەنالتي بەلگىلەدى. ونى پەتر شوتۋرما ءمىنسىز ورىنداپ, قۇراماسىن العا شىعاردى. ريكاردو كاكا شاكىرتتەرى ءبىرىنشى تايمدا-اق ەسەپتى تەڭەستىرۋگە تىرىسىپ, بىرنەشە رەت العا ۇمتىلعانىمەن شابۋىلدى ناتيجەلى تۇيىندەي المادى.
ۇزىلىستەن سوڭ قازاقستان قۇراماسى تاۋەكەلگە بارىپ, قاقپانى ءجيى بوس قالدىردى. وسىنىڭ سالدارىنان قارسىلاستار ەڭ الدىمەن 25-مينۋتتا قارىمتا شابۋىلدا ەسەپتى ەسەلەسە, 30-مينۋتتا ءۇشىنشى گولدى بوس تۇرعان قاقپاعا ەنگىزدى. ويىننىڭ اياقتالۋىنا ەكى مينۋت قالعاندا دۋگلاس پەن ورازوۆ ەسەپتى 3:2-گە دەيىن قىسقارتتى. ەسەپ ايىرماشىلىعى قىسقارعاننان كەيىن جانكۇيەرلەردىڭ دە كەۋدەسىندە ءۇمىت وتى مازدادى. الايدا ويىنشىلاردىڭ اسىعىستىعىنان بوس تۇرعان قاقپامىزعا تاعى ەكى گول ەندى. قورىتىندى ەسەپ – 3:5. وسىلايشا, قازاقستان قۇراماسى ءۇشىنشى ەۋروسىن شيرەك فينالدا اياقتاۋعا ءماجبۇر بولدى.
وكىنىشتىسى, كەشەگى ماتچتا الدىڭعى ويىنداردا ەكىنشى «سارى قاعازدارىن» العان تاينان مەن ەدسوننىڭ جوقتىعى قاتتى ءبىلىندى. سونداي-اق شابۋىلشى ازات ۆاليۋللين جاراقاتىمەن, شىڭعىس ەسەنامانوۆ ءبىر اپتا كارانتيندە بولىپ, جاتتىعۋ جاساماعاندىقتان, دۇرىس ويناي المادى.
