زاۋىت جۇمىسشىلارىنىڭ ايتۋىنشا, وقيعا تۇنگى اۋىسىمدا بولعان. ەر ادام كونۆەيەرگە قالاي ءتۇسىپ كەتكەنىن ارنايى كوميسسيا انىقتايدى. «ارسەلورميتتال تەمىرتاۋ» كومپانياسىنىڭ ءباسپاسوز قىزمەتى بريگادير قازا بولعانىن راستادى.
«بولات وڭدەۋ تسەحىنىڭ اگلومەراتسيا زاۋىتىندا وقىس وقيعا بولعانىن حابارلايمىز, سالدارىنان ارىپتەسىمىز – 1975 جىلى تۋعان بريگاديردەن ايىرىلىپ قالدىق. ارنايى كوميسسيا قۇرىلدى, ءىس ءجۇرىپ جاتىر», دەدى كومپانيا وكىلى.
وقيعاعا قاتىستى قاراعاندى وبلىسىنىڭ ەڭبەك ينسپەكتسياسى جونىندەگى دەپارتامەنتىنىڭ ءباسپاسوز قىزمەتى دە پىكىر ءبىلدىردى.
«قاراعاندى وبلىسىنىڭ باس مەملەكەتتىك ەڭبەك ينسپەكتورىنىڭ بۇيرىعى بويىنشا, ارنايى تەكسەرۋ جۇرگىزۋ ءۇشىن كوميسسيا تاعايىندالدى. وقيعانىڭ ءمان-جايى مەن سەبەپتەرى ارنايى تەرگەۋ اياقتالعاننان كەيىن انىقتالادى, ول تۋرالى قوسىمشا حابارلانادى», دەلىنگەن حابارلامادا.
