حح عاسىردىڭ ورتاسىنداعى قازاق قىزىنىڭ ءموپ-ءمولدىر بەينەسى. كوزگە بىردەن وتتاي باسىلادى, كوڭىل جىبىتەدى. اينەكتەن تۇسكەن كۇننىڭ ساۋلەسىنە ارقاسىن توسقان بويجەتكەننىڭ ءبىتىم-بولمىسىنا قاراپ, سول كەزەڭدەگى قىز-كەلىنشەكتەردىڭ وبرازىن كورۋگە بولاتىنداي. بۇل قازاق بەينەلەۋ ونەرىنە ەرەكشە مانەر الىپ كەلگەن عاجايىپ سۋرەتشى سابىر مامبەەۆتىڭ ەڭبەگى.
1958 جىلى جازىلعان كارتينا اۆتوردىڭ ەلەۋلى شىعارمالارىنىڭ ءبىرى رەتىندە جوعارى باعالانادى. ول ءاربىر تۋىندىسىنا شىنايى سەزىمىن قوسىپ, الدىن الا بولجاۋعا بولمايتىن تۇستەردىڭ ۇندەستىگى مەن مانەرلى ۇيلەسىمدىلىگىن بەرەدى. بۇدان كومپوزيتسياسىنداعى قاراپايىم فورمانىڭ انىقتىعىن كورەمىز.
«تەرەزە الدىندا تۇرعان قىز» كارتيناسى گۇل مەن قىزدىڭ اراسىنداعى بايلانىستان باستاۋ الىپ تۇر. گۇلدىڭ كۇلتەسى مەن ارۋدىڭ كويلەگى ءبىر ءتۇستى. اۆتور قۇددى گۇل تاعدىرلى قىز عۇمىرىنىڭ شۋاقتى ساتىمەن, بالاۋسا شاقتارىن كەنەپ بەتىنە قۇيا سالعانداي. قولىمەن كەۋدەسىن باسقان ارۋدىڭ ۇياڭدىعى مەن تازالىعى بايقالادى. شىعارما جاندى سەكىلدى.
شىنىندا بۇل سۋرەتكەردىڭ پورترەت جانرىنداعى ەرەكشە ءتاسىلى. كەيىپكەردى فورما رەتىندە بەرىپ, ونىڭ ارەكەتىن بوياۋ كۇشىمەن شەشىپ وتىرادى. سودان دا بولار, بۇل تۋىندى وزىنشە ءبىر ەرەكشە قايتالانباس سەزىمگە بولەيدى.
باقساڭىز, قىلقالام شەبەرى ەموتسيالىق ءھام ليريكالىق سەزىمىن, فيلوسوفيالىق ماسەلەلەردى الدىڭعى قاتارعا قويادى. كوركەمدىك شەشىمى ءتۇس ارقىلى ديناميكالىق قوزعالىس جاساپ, تۇسىنۋگە جەڭىل جول اشادى.
سابىر مامبەەۆ قازاق بەينەلەۋ ونەرىندە بولىپ جاتقان وزگەرىستەرگە, الدىڭعى بۋىن تاراپىنان ەستەتيكالىق تاربيە مەن رۋحاني سەزىم قوسقانى انىق.
