ەكونوميكا • 30 قاڭتار، 2022

قارىزعا باتقان قازاقستان

5279 رەت كورسەتىلدى

قارىز ازايماي قال جاقسارمايدى. وكىنىشكە قاراي، ەل تۇرعىندارى قارىز ۇستىنە قارىز جاماپ جاتىر.  

نەسيەدەن قۇتىلۋ ءۇشىن نەسيە الۋدىڭ سوڭى تريلليونداعان قارىزعا اكەپ تىرەگەن سىڭايلى. 2022 جىلدىڭ 1 قاڭتارىنداعى جاعداي بويىنشا قازاقستاننىڭ بولشەك نەسيە پورتفەلى 10،76 ترلن تەڭگەنى قۇراعان. بۇل بىلتىرمەن سالىستىرعاندا 42،9 پايىزعا جوعارى. ءبىرىنشى نەسيە بيۋروسى وسىنداي اقپارات تاراتتى.

بولشەك قارىز پورتفەلىنىڭ باسىم بولىگىن كەپىلسىز نەسيەلەر (5،28 ترلن تەڭگە) قۇراسا، يپوتەكالىق نەسيە ۇلەسى – 3،39 ترلن تەڭگە، اۆتونەسيەلەۋ – 1،09 ترلن تەڭگە، نەسيە كارتالارى – 348،3 ملرد تەڭگە جانە كەپىلدى تۇتىنۋشىلىق نەسيەلەر 498،3 ملرد تەڭگە ەكەن. بۇل رەتتە ءبىرىنشى نەسيە بيۋروسى تەك ەكىنشى دەڭگەيلى بانكتەردىڭ عانا ەمەس، ودان باسقا دا قار­جى ۇيىمدارىنىڭ كورسەتكىشىن ەسەپ­كە العان. ايتا كەتكەن ابزال، بول­شەك نەسيەنىڭ 90،3 پايىزىن ەكىن­شى دەڭگەيلى بانكتەر ۇسىنعان.

2021 جىلى جالپى 8،9 ترلن تەڭگە بولشەك نەسيە بەرىلگەن. 2020 جىلمەن سالىستىرعاندا 83،6 پايىزعا نەمەسە 4،1 ترلن تەڭگەگە كوپ. 25،67 ملن كەلىسىمشارت جاسالسا، قارىز الۋ­شىلار سانى 6،16 ملن ادامعا جەتكەن. وسى رەتتە زەينەتاقى قورىن­دا­عى ارتىق اقشانى پايدالانۋ مۇمكىندىگى نەسيە كولەمىنىڭ كوبەيۋىنە مۋلتيپليكاتيۆتى اسەر بەرگەن. بۇل يپوتەكالىق نەسيەنىڭ وسۋىنە دە (1،92 ترلن تەڭگەگە جەتكەن) ىقپال ەتكەن.

ال بيۋرو بىلتىر بەرگەن كەپىلسىز نەسيە كولەمى 5،45 ترلن تەڭگە دەگەن دەرەك كەلتىرەدى. 2020 جىلعا قاراعاندا كەپىلسىز نەسيە 86،1 پايىزعا، نەسيە كار­تالارى 95،2 پايىزعا (401،5 ملرد تەڭگە) وسكەن. اۆتوكولىك الۋ ماق­سا­تىنداعى قارىزدارعا 592،2 ملرد تەڭگە بولىنگەن. وڭىرلەر بولىنى­سىن­دە زايمداردىڭ كوبى الماتى، نۇر-سۇلتان قالالارىنا جانە الماتى مەن تۇركىستان وبلىستارىنا تيە­سىلى. ەلدەگى بۇكىل قارىزدىڭ 44 پا­يىز­ى وسى ءتورت ايماقتىڭ ەنشىسىندە ەكەن.

2021 جىلى بجزق-دان تۇرعىن ءۇي جاعدايىن جاقسارتۋ ماقساتىندا 2،5 ترلن تەڭگە الىنعان. ءۇي ساتىپ الۋعا – وسى قاراجاتتىڭ 68،5 پايىزى، يپوتەكانى وتەۋگە – 15،3 پايىزى، باسقا ماقساتتارعا 16،2 پايىزى جۇمسالعان. ۇلتتىق ستاتيستيكا بيۋروسىنىڭ دەرە­گىنشە، تۇرعىن ۇيمەن جاسالعان كەلىسىم سانى 606 مىڭنان اسقان. بۇل رەتتە اۆتوترانسپورتتى تىركەۋ بويىنشا كەلىسىمدەر ءبىرشاما تومەندەگەن.

«2021 جىلدىڭ 11 ايىندا اۆتوترانسپورتتى تىركەۋ سانى الدىڭعى جىلمەن سالىستىرعاندا 1،3 پايىزعا تومەندەپ، 710،4 مىڭ بىرلىكتى قۇرادى. مۇنداي تومەندەۋ ەكىنشى نارىق ەسەبىنەن بولىپ وتىر. ال جاڭا اۆتو­موبيلدەردىڭ ساتىلىمى 25،9 پايىز­عا ءوسىپ، 117 مىڭ بىرلىككە جەتتى. سو­نىمەن قاتار اۆتوكولىك الۋ ماق­ساتىمەن راسىمدەلگەن نەسيەنىڭ جالپى سوماسى 57،5 پايىزعا ۇلعايىپ، 592،2 ملرد تەڭگەنى قۇرادى»، دەپ مالىمدەدى ءبىرىنشى نەسيە بيۋروسى.

2022 جىلدىڭ 1 قاڭتارىنداعى جاعداي بويىنشا بىلتىر نەسيە جۇيەسى 333 مىڭ قارىز الۋشىمەن تولىققان. وسىنشاما ادام 2021 جىلى العاش رەت نەسيەگە جۇگىنگەن جانە بۇرىن-سوڭدى نەسيە تاريحى بولماعان. ولار جالپى سوماسى 118،5 ملرد تەڭگە كولەمىندە العاشقى نەسيە راسىمدەگەن.

 

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار