كوشەدە كەلە جاتىپ قاتتى تايعاناعان تالشىن قۇلاپ بارا جاتىپ, بارىنشا ىشىندەگى شاراناعا زاقىم كەلتىرمەۋگە تىرىسقاندىقتان, وڭ جاق اياعى تومەن جاعىنان ەكىگە ءبولىنىپ, سىنىپ كەتكەنىن ويلاۋعا شاماسى كەلمەگەن ەدى.
تالشىندى №4 قالالىق اۋرۋحاناعا اكەلگەن كەزدە جۇكتىلىگىنىڭ 40-شى اپتاسى باستالىپ, تۋرا ءبىر اپتادان سوڭ بوسانۋعا ءتيىس بولاتىن. تراۆماتولوگتەرگە مۇنداي جاعدايدا اياعى اۋىر ايەلدىڭ تولعاعىن كەلتىرمەي جانە ىشتەگى نارەستەگە دە ەشبىر زاقىم تيگىزبەي قالاي وتا جاساۋعا بولادى دەگەن كۇردەلى ماسەلەنى شەشۋگە تۋرا كەلدى.
«اياعى مورت سىنعان جۇكتى ايەلدىڭ بىزگە اكەلىنگەنى تۋرالى حابارلانعان ساتتەن باستاپ كونسيليۋم جيناۋ تۋرالى شەشىم قابىلداندى. قابىلداۋ بولىمشەسىندە ناۋقاستى كلينيكانىڭ جەتەكشى تراۆماتولوگ, ورتوپەد, حيرۋرگ, انەستەزيولوگ جانە گينەكولوگ دارىگەرلەرى قارسى الدى. تەز ارەكەت ەتۋ كەرەك بولدى. 27 جاستاعى پاتسيەنت تۇڭعىشىنا اياعى اۋىر ەكەن. ايەلدىڭ بوساناتىن مەرزىمى جەتكەنىن ەسكەرە وتىرىپ, كومەك كورسەتۋدىڭ بىرنەشە ءادىسى قاراستىرىلدى. حيرۋرگيالىق ەم جۇرگىزۋ تۋرالى شەشىم قابىلدانىپ, سۇيەك كەمىگى ىشىلىك بۇعاتتالاتىن وزەكشەمەن اسىقتى جىلىكتىڭ وستەوسينتەزى جاسالدى. بۇل ايەلگە كەسار تىلىگىنە جۇگىنبەي بوسانۋعا, سونداي-اق تەز اياققا تۇرىپ, ءسابيدى كۇتۋگە مۇمكىندىك بەرەتىن ەدى», دەيدى الماتىداعى №4 قالالىق كلينيكالىق اۋرۋحاناسى باس دارىگەرىنىڭ ورىنباسارى ساۋلە ماردەنوۆا.
شۇعىل تۇردە جۇكتى ناۋقاس جانساقتاۋ بولىمىنە جاتقىزىلادى. وتانى قابىلداۋ ءبولىمىنىڭ مەڭگەرۋشىسى ماگادين حايروەۆ جۇرگىزىپ, ارىپتەسىنە جەتەكشى تراۆماتولوگ كونستانتين موروزوۆ كومەكتەستى. كۇردەلى وتاعا اكۋشەر-گينەكولوگ جانە نەوناتولوگى بار №4 پەرزەنتحانا دارىگەرلەرىنىڭ بريگاداسى دا قاتىستى. وپەراتسيا 1,5 ساعاتقا سوزىلدى. بۇل تراۆماتولوگتەن زەرگەرلىك دالدىكتى تالاپ ەتەتىن جاعداي بولعاندىقتان, وپەراتسياىشىلىك رەنتگەن جۇيەسى قولدانىلدى.
«سۇيەك كەمىگى ىشىلىك بۇعاتتالاتىن وزەكشەمەن وڭ جاق اسىقتى جىلىكتىڭ جابىق وستەوسينتەزى جاسالدى. بۇل – سىرتىنان بەكىتپەي جاسالاتىن سۇيەك سىنىقتارىنىڭ قوسىندىسى. وستەوسينتەز سىنىقتاردىڭ تولىق بىرىككەنگە دەيىن مىقتى بەكىتىلۋىن قامتاماسىز ەتەدى. بۇل ءادىستىڭ ارتىقشىلىعى سوندا, ونىڭ اعزاعا زاقىمى بارىنشا از. سونىمەن قاتار ءبىز ناۋقاستىڭ وتادان بىرنەشە كۇن وتكەن سوڭ سىنعان اياعىنا كۇش سالا العانىن قالايمىز», دەدى دارىگەر ماگادين حايروەۆ.
ءارى قاراي دارىگەرلەر تالشىننىڭ ءوز كۇشىمەن بوسانۋىن كۇتۋگە شەشىم قابىلدايدى, ارينە بۇل اناسىنىڭ قينالماي, نارەستەسىنىڭ دە كۇيزەلىسسىز دۇنيەگە كەلۋىنە سەپتەستى. №4 پەرزەنتحانانىڭ اكۋشەر-گينەكولوگتەرى جۇكتى ايەلگە اۋرۋحانادا كۇن سايىن بارىپ تۇردى. قازىر دارىگەرلەر وتا كەزەڭى مەن وتادان كەيىنگى كەزەڭدى سابىرمەن وتكەرگەن تالشىننىڭ ەرلىگىنە ءتانتى بولىپ وتىر. ول ۇرەيگە بوي الدىرماي, ەرەكشە شىدامدىلىق تانىتقان.
وسىدان كەيىن عانا تالشىن بوسانۋ ءۇشىن №4 پەرزەنتحاناسىنا اۋىستىرىلدى, ال 2 قاڭتاردا ۇل تۋدى.
ء«بىز جۇبايىم ەكەۋمىز №4 قالالىق اۋرۋحاناسى مەن پەرزەنتحانا دارىگەرلەرىنە وتە ريزامىز. ولاردىڭ كومەگىنىڭ ارقاسىندا قول-اياعىمدى باۋىرىما الىپ, دۇرىس بوساندىم. ۇلىمىز 3 400 گر سالماقپەن دۇنيەگە كەلدى, اتىن سۇلتان دەپ كويدىق. بۇل جاراقات پەن وتادان كەيىن ءبىر اپتا ءوتتى, قازىر ءوزىم جۇرە الامىن. دارىگەرلەردىڭ قاراۋىندا بولعان كەزدە ولاردىڭ شىنايى قامقورلىعىنا بولەندىم. قۇداي اق حالاتتى ابزال جاندارعا مىزعىماس دەنساۋلىق بەرسىن», دەدى تالشىن پەرزەنتحانادان شىققان كۇنى.
الماتى
