«COVID-19-دىڭ جاڭا تۇرلەرىنىڭ پايدا بولۋى پاندەميا عۇمىرىن ۇزارتا تۇسەدى جانە جاڭا ەكونوميكالىق قيىندىقتار تۋدىرادى. ونىڭ ۇستىنە گەوساياسي قىسىمدار مەن كليمات جاعدايى دا تاۋەكەلدەردى كۇشەيتىپ وتىر. جوعارى ينفلياتسيا ءالى ۇزاق ساقتالادى دەگەن بولجام بار. ويتكەنى 2022 جىلى جەتكىزۋ تىزبەگىندەگى اقاۋلار مەن ەنەرگيا تاسىمالداۋشىنىڭ جوعارى باعاسى ساقتالادى» دەلىنەدى زەرتتەۋدە.
حۆق بولجامىنا سۇيەنسەك, بيىل قاي ەل ءۇشىن دە جاعداي وڭاي بولمايدى. اقش ەكونوميكاسىنىڭ ءوسىمى – 1,2, ەۋروايماق – 0,4, ۇلىبريتانيا – 0,3, قىتاي – 0,8, رەسەي – 0,1, برازيليا – 1,2, وار 0,3 پايىزعا ازايماق. بۇل رەتتە جاپونيا (+0,1 پايىز) مەن ءۇندىستاننىڭ (+0,5 پايىز) ءوسىمى عانا جوعارىلايدى دەپ كورسەتىلگەن.
قوردىڭ ءبىرىنشى ورىنباسارى گيتا گوپيناتتىڭ ايتۋىنشا, كوپ ەلدەگى قارىزدىڭ رەكوردتىق دەڭگەيى مەن ىرىق بەرمەي تۇرعان ينفلياتسيا ەكونوميكالىق كەدەرگىلەردى بۇزىپ-جارىپ وتۋگە مۇمكىندىك بەرەر ەمەس.
«الايدا كەيبىر قيىندىقتار باسقالارىمەن سالىستىرعاندا ۇزاقمەرزىمدى ەمەس. سوندىقتان ءبىزدىڭ بولجامدا «وميكرون» شتامى 2022 جىلدىڭ ءبىرىنشى توقسانىندا ەكونوميكالىق بەلسەندىلىككە جاعىمسىز اسەر بەرگەنىمەن, ەكىنشى توقساننان باستاپ بىرتىندەپ كەرى اسەر تومەندەي تۇسەتىنى ايتىلعان. ءبىز بيىلعى جاھاندىق ءوسىمدى 4,4 پايىز دەپ بولجاپ وتىرمىز. بۇل الدىڭعى بولجامداردان 0,5 پايىزدىق تارماققا تومەن, نەگىزىنەن اقش پەن قىتايدىڭ بولجامدارىنىڭ تومەندەۋىنە بايلانىستى. 2022 جىلى سۇرانىس پەن ۇسىنىس اراسىنداعى الشاقتىق قىسقارادى دەپ ويلايمىز. جالپى العاندا, ەكونوميكاسى دامىعان ەلدەردىڭ جاعدايى پاندەمياعا دەيىنگى دەڭگەيگە ورالادى, ال دامۋشى ەلدەردە ورتامەرزىمدى پەرسپەكتيۆادا ءوندىرىس كولەمىندە ايتارلىقتاي توقىراۋ ساقتالادى. قيىندىقپەن لايىقتى كۇرەسۋ ءۇشىن كەڭ اۋقىمدى ۆاكتسينالاۋ جۇرگىزۋ وتە ماڭىزدى. قازىر تابىسى تومەن ەلدەردە حالىقتىڭ تەك 4 پايىزى ۆاكتسينا قابىلداعان», دەيدى گوپينات.
حۆق-نىڭ ەلىمىزگە قاتىستى بولجامىنا نازار سالار بولساق, حالىقارالىق قور 2022 جىلى قازاقستاننىڭ ءوسىمى 0,1 پايىزعا (ياعني 3,9-دان 3,8 پايىزعا) تومەندەيدى دەپ پايىمدايدى.
