وسى ورايدا, بىلتىرعى شىلدەدەن باستاپ مەملەكەتتىك قىزمەتشىلەردىڭ جالاقىسىن تولەۋدىڭ جاڭا جۇيەسى ەنگىزىلگەنىن ايتا كەتكەن ءجون. جاڭا ەرەجەگە سايكەس, ەڭبەكاقى لاۋازىمنىڭ ماڭىزىنا بايلانىستى تولەنە باستادى. سوعان بايلانىستى وبلىستار اكىمدەرىنىڭ جالاقىسى ەكى ەسەگە جۋىق كوبەيدى. ماسەلەن, اتىراۋ وبلىسىنىڭ اكىمى ماحامبەت دوسمۇحامبەتوۆ ورتالىق كوممۋنيكاتسيالار قىزمەتىندە وتكەن بريفينگتە ايلىعى 1 ميلليون 954 مىڭ تەڭگەنى قۇرايتىنىن جەتكىزدى. قاراعاندى وبلىسىنىڭ اكىمى جەڭىس قاسىمبەكتىڭ دە جالاقىسى وسى شامالاس – 1,9 ميلليون تەڭگە. قىزىلوردا وبلىسىنىڭ اكىمى گۇلشارا ابدىقالىقوۆا دا جالاقىسىن جاسىرعان جوق, شامامەن 1,8 ميلليون تەڭگە ەڭبەكاقى الادى. دەگەنمەن بىلتىرعى 1 شىلدەگە دەيىن گ.ابدىقالىقوۆا 986 مىڭ تەڭگە جالاقى الىپ كەلگەن.
ارينە, جۋرناليستەر قويعان سۇراقتارعا جاۋاپ بەرىپ, جالاقىسىن جاسىرماعان اكىمدەرگە اشىقتىعى ءۇشىن العىس ايتامىز. وكىنىشكە قاراي جالاقىعا قاتىستى جۋرناليستەردىڭ قويعان سۇراعىنان جالتارعان اكىمدەر دە بار. ولار ءتۇرلى سەبەپتەرگە بايلانىستى ەڭبەكاقىسىن ايتۋدان باس تارتتى. الدە ولار اتقارعان ەڭبەگى مەن اقىسى اراسىندا الشاقتىق بار دەپ ويلاي ما؟!
ءبىر قىزىعى, قاراپايىم تۇرعىندار ءۇشىن جەرلەس اكىمدەردىڭ جالاقىسىن بىلگەننەن گورى, مۇحيتتىڭ ارعى بەتىندەگى شاھار باسشىلارىنىڭ ەڭبەكاقىسىن ەسەپتەگەن وڭايعا سوعىپ تۇر. ويتكەنى دامىعان ەلدەردە لاۋازىمدى قىزمەت اتقاراتىن ادامداردىڭ ءبارى جالاقىسىن, قوسىمشا تابىسىن, مەملەكەت ەسەبىنەن جۇمسالعان قاراجاتتىڭ ەسەپ-قيسابىن بەرۋگە مىندەتتى.
ماسەلەن, ۇيدە وتىرىپ-اق ۆاشينگتون قالاسى مەرىنىڭ تابىسىن انىقتاۋ قيىن ەمەس. شاھار اكىمشىلىگىنىڭ سايتىندا بۇكىل اقپارات كورسەتىلگەن. قازىرگى تاڭدا ميۋريەل باۋزەر حانىمعا اكىم لاۋازىمىن اتقارعانى ءۇشىن جىلىنا 220 000 دوللار تولەنەدى. نيۋ-يوركتىڭ باسشىسى بيلل دە بلازيونىڭ جىلدىق جالاقىسى 258 750 دوللارعا تەڭ. ايتا كەتەرلىگى, بيىل بيلل مىرزا لاۋازىمىن بوساتادى. ال وعان دەيىن, ياعني 2002-2013 جىلدارى نيۋ-يوركتى 12 جىل باسقارعان, الەمدەگى ەڭ باي ادامنىڭ ءبىرى مايكل بلۋمبەرگ اكىمگە بەرىلەتىن جالاقىدان مۇلدەم باس تارتقان ەكەن. ءسويتىپ, وعان سيمۆولدىق تۇردە 1 دوللار عانا تولەنگەن.
اشىق اقپاراتتىڭ وزىق ۇلگىسىن ۇلىبريتانيادان بايقاي الامىز. مىسالى, ەل ورتالىعى لوندوننىڭ باسشىسى سادىق حان جىل سايىن 152 734 فۋنت-ستەرلينگ ەڭبەكاقى الادى. شاھار اكىمشىلىگىنىڭ سايتىندا سادىق حاننىڭ ءار جىلدا جۇمساعان شىعىندارى بۇگە-شىگەسىنە دەيىن كورسەتىلگەن. ماسەلەن, لوندون مەرى 19 مامىردا لوندوننان يورك قالاسىنا بارۋ ءۇشىن 196 فۋنتقا پويىزعا بيلەت ساتىپ العان. ليۆەرپۋلگە بارۋ ءۇشىن 104 فۋنتقا, بريستولعا بارۋ ءۇشىن 85 فۋنتقا پويىزعا بيلەت العان. مۇنىڭ ءبارى بيۋدجەت ەسەبىنەن تولەنگەندىكتەن, شىعىننىڭ ءبارى اكىمدىكتىڭ سايتىندا تۇر. بۇل از دەسەڭىز, لوندون مەرىنە بەرىلگەن سىيلىقتاردىڭ ءتىزىمى جاريالانعان. مىسالى, وسى تىزىمگە كوز جۇگىرتىپ وتىرىپ سادىق حانعا قۇنى 100 فۋنت-ستەرلينگ تۇراتىن كوزاينەك, باعاسى 50 فۋنت-ستەرلينگتى قۇرايتىن كىتاپ, ءتۇرلى سپورتتىق شارالارعا بيلەت سىيلانعانىن بايقايمىز. بىلتىر انگليادا ەۋرو-2020 دوداسىنىڭ بىرنەشە ءتۋرنيرى وتكەنى بەلگىلى. قارت قۇرلىقتىڭ ءتورت جىلدا ءبىر كەلەتىن دوپ دوداسىنىڭ ويىندارىنا قۇرمەتتى قوناق بولۋ ءۇشىن سادىق حانعا بىرنەشە بيلەت بەرىلگەن ەكەن. مۇنداي اقپاراتتى دا لوندون اكىمشىلىگىنىڭ سايتىنان ءبىلىپ وتىرمىز.
ماحابباتتىڭ سيمۆولى سانالاتىن پاريج قالاسىنىڭ مەرى انن يدالگو دا جالاقىسىن جاسىرعان ەمەس. وعان اي سايىن 8 651 ەۋرو ەڭبەكاقى تولەنەدى. شاھار اكىمشىلىگىنىڭ سايتىندا انن حانىمنىڭ بۇكىل شىعىنى, تاپقان تابىسىنىڭ ءبارى كورسەتىلگەن.
قىسقاسى, دامىعان مەملەكەتتەردە لاۋازىمدى قىزمەت اتقاراتىن تۇلعالاردىڭ جالاقىسى تۋرالى مالىمەت بارشاعا قول جەتىمدى. قالاعان ادام كەز كەلگەن ساتتە كورۋگە مۇمكىندىگى بار. ماقالامىزدا ۇلكەن قالالاردىڭ اكىمدەرىنىڭ عانا ەڭبەكاقىسىن شولىپ شىقتىق. ايتپەسە, پرەزيدەنت, پرەمەر-مينيستر, دەپۋتات, مينيستر سەكىلدى بۇكىل لاۋازىمدى قىزمەتتەگىلەردىڭ جالاقىسى جونىندەگى دەرەكتەر كوپشىلىككە جاريالانعان. باتىس ەلدەرىنىڭ دەموكراتيالىق داڭعىل جولعا ءتۇسۋى دە وسىنداي مالىمەتتى اشىق كورسەتۋىندە جاتقان شىعار, بالكىم...
