ءوزىنىڭ العاشقى تابىستارىنا ناۋم بولگاريانىڭ تۋى استىندا ونەر كورسەتكەن كەزدەرى قول جەتكىزدى. بىراق تەگى تۇرىك بولعاندىقتان, ول ۇنەمى ءوزىنىڭ تاريحي وتانىنا ورالۋدى اڭسايتىن. سودان 1986 جىلى مەلبۋرندە وتكەن جارىستا قوناقۇيدەن قاشىپ شىعىپ, بىردەن تۇركياعا تارتتى. ەكى دۇركىن الەم چەمپيونىنان ايىرىلعان بولگاريالىقتار حالىقارالىق اۋىر اتلەتيكا فەدەراتسياسىنا شاعىمدانىپ, وتەماقى رەتىندە 1 250 000 اقش دوللارىن تالاپ ەتتى. ول كەزدە بۇل وتە كوپ اقشا ەدى. دەسەك تە ولاردىڭ بۇل ءوتىنىشى قاناعاتتاندىرىلىپ, اسقان دارىن يەسى حالىقارالىق ارەنادا تۇركيانىڭ نامىسىن قورعاۋ مۇمكىندىگىنە يە بولدى.
انادولى ەلىنە كەلگەن بەتتە ول بىردەن ءوز ەسىمىن نايم سۇلەيمانوعلى دەپ وزگەرتتى. ودان كەيىن-اق كوپتەگەن تولاعاي تابىسقا قول جەتكىزدى. ءوزىنىڭ سپورتتىق كارەراسىندا نايم ءۇش دۇركىن وليمپيادا چەمپيونى اتاندى. اتاپ ايتساق, 1988 جىلى سەۋل, 1992 جىلى بارسەلونا جانە 1996 جىلى اتلانتادا وتكەن عالامدىق ويىنداردا الدىنا جان سالمادى. ءسويتىپ, ونىڭ ەسىمى ءۇش دۇركىن وليمپيا ويىندارىنىڭ جەڭىمپازى اتانعان تۇڭعىش زىلتەمىرشى رەتىندە تاريحتا قالدى. 1985-1995 جىلدار ارالىعىندا وتكەن الەم چەمپيوناتتارىندا جەتى مارتە توپ جاردى. بەس رەت ەۋروپا بىرىنشىلىگىندە قارسىلاس شاق كەلتىرمەدى. الەم كۋبوگىن ءۇش مارتە ۇتىپ, سوتسياليستىك باعىتتاعى مەملەكەتتەردىڭ باسىن قوسقان «دوستىق» دوداسىندا دا دارا شىقتى.
سۇلەيمانوعلى 2000 جىلى سيدنەيدە الاۋى تۇتانعان وليمپيا ويىندارىندا دا بوي كورسەتتى. بىراق 33 جاستاعى ارداگەر اۋىر اتلەتتىڭ جاسىل قۇرلىقتا باعى جانبادى. سودان كەيىن ول ۇلكەن سپورتتان قول ءۇزىپ, تۇركيا پارلامەنتىنىڭ دەپۋتاتى بولدى. باسقا دا قوعامدىق جۇمىستارعا بەلسەنە ارالاستى. وكىنىشكە قاراي, «كىشكەنتاي گەركۋلەس» اتانعان اتاقتى سپورتشىنىڭ ءومىرى قىسقا بولدى. 2017 جىلدىڭ 18 قاراشاسىندا نايم باۋىر تسيرروزى دەرتىنە ۇشىراپ, فانيدەن باقيعا اتتاندى. داڭقتى اۋىر اتلەت نەبارى 50 جىل عۇمىر كەشتى.
اۋىر اتلەتيكا تاريحىندا سۇلەيمانوعلىدان كەيىن تاعى ءۇش ءاپايتوس وليمپيا ويىندارىندا ءۇش رەت باس جۇلدەنى ولجالادى. ولار – تۇركيالىق حاليل مۋتلۋ مەن قوس گرەكيالىق ديماس پيرروس جانە كاحي كاحياشۆيلي. بىراق الەم چەمپيوناتتارىنداعى جەتىستىكتەرى بويىنشا ولاردىڭ ەشقايسىسى ءبىزدىڭ كەيىپكەرىمىزبەن تەڭەسە المايدى. اتالعان جارىستا نايم جەتى مارتە التىن تۇعىرعا كوتەرىلسە, حاليل بەس جانە ديماس پەن كاحي ءۇش رەتتەن سول بەلەستى باعىندىردى. سوندىقتان دا وسى سپورت ءتۇرى تاريحىنداعى ەڭ اتاقتى سپورتشى دەپ سۇلەيمانوعلىنى اتاساق ەش قاتەلەسپەيمىز. سونىمەن قاتار تۇركيا تارلانبوزىنىڭ 46 رەت الەم رەكوردىن جاڭارتقانىن دا ايتا كەتكەن ءجون.
