بۇعان دەيىن 2021 جىلى نۇر-سۇلتان قالاسىندا, قاراعاندى, اقمولا جانە پاۆلودار وبلىستارىندا بىرقاتار ءىرى ۇستاۋلار بولدى. سول كەزدە ساتۋعا دايىن 25 كەلىدەن استام ەسىرتكى جانە ولاردى جاساۋعا ارنالعان 3,5 توننا پرەكۋرسورلار تاركىلەندى.
بەس ءىرى ەسىرتكى زەرتحاناسى جويىلدى, ولاردىڭ ەكەۋى قاراعاندى وبلىسىندا, ال نۇر-سۇلتان قالاسىندا, پاۆلودار, اقمولا وبلىستارىندا ءبىر-بىردەن جۇمىس ىستەگەن.
ارنايى وپەراتسيا بارىسىندا ترانسۇلتتىق ۇقت ۇيىمداستىرۋشىسى مەن التى قاتىسۋشىسى ۇستالدى, ولار مەفەدروندى قازاقستاندا دا, ودان تىس جەرلەردە دە جاساپ, وتكىزۋدى ۇيىمداستىرعان.
قىلمىستىق توپتىڭ ءاربىر قاتىسۋشىسى وزىنە بەكىتىلگەن ەسىرتكىنى وتكىزۋ اۋماعىنا جەتەكشىلىك ەتىپ وتىرعان, سونداي-اق, زاتتاردى تاسىمالداۋ, دايىنداۋ جانە ساقتاۋ سياقتى بەلگىلى ءبىر مىندەتتەردى اتقارعان. ماسەلەن, تورتەۋى نۇر-سۇلتان, الماتى, پاۆلودار, قاراعاندى قالالارىندا پسيحوتروپتىق زاتتاردى دايىنداۋمەن جانە وتكىزۋمەن اينالىسقان. ولاردىڭ ءبىرى ءوز قىزمەتىن رەسەي مەن گرۋزيا اۋماعىندا جۇزەگە اسىرعان.
تەرگەۋ بارىسىندا حالىقارالىق قىلمىستىق بايلانىستار انىقتالىپ, قر قك-ءنىڭ 264-بابى (ترانسۇلتتىق قىلمىستىق توپتى قۇرۋ جانە وعان باسشىلىق ەتۋ) بويىنشا قىلمىستىق ءىس قوزعالدى.
وسى ۇقت بويىنشا ەسىرتكى ساتۋمەن بايلانىستى سەگىز قىلمىستىق ءىس قوزعالدى. جاڭا جىلدىق مەرەكەلەر قارساڭىندا قاراعاندى قالاسىندا ەسىرتكى ءوندىرۋ ءۇشىن پرەكۋرسورلاردى جىبەرۋمەن اينالىسقان تاعى ءبىر ۇقت قاتىسۋشىسى ۇستالدى.
جەدەل ۋاكىلدەر ول جالعا العان گاراجدا «الفا-PVP» جاساۋ ءۇشىن قولدانىلاتىن حيميالىق زاتتار – پرەكۋرسورلار قۇيىلعان التى 30 ليترلىك پلاستيكالىق بوشكەلەردى تاركىلەدى. ونىڭ بايلانىستارىن پىسىقتاۋ بارىسىندا ءۇي جاعدايىندا سينتەتيكالىق ەسىرتكى ءوندىرىسىن جولعا قويعان اقتوبە قالاسىنىڭ تۇرعىنى انىقتالدى. ۇستاۋ كەزىندە ودان سينتەتيكانىڭ بەس ءبىر رەتتىك دوزاسى, ال تۇرعىلىقتى جەرى بويىنشا تاعى سەگىز ەسىرتكى ءتۇيىنى تاركىلەندى.
سونىمەن قاتار, قالانىڭ ءار جەرىندە تاپسىرىس بويىنشا «كليەنتتەر» ءۇشىن دايىندالعان 55 جاسىرىلعان ءتۇيىن تاركىلەندى. سوت-حيميالىق ساراپتاما ناتيجەلەرى بويىنشا تاركىلەنگەن زات جالپى سالماعى ءبىر كيلوگرامعا جۋىق ەسىرتكىنى قۇرادى.
ەسىرتكى ءوندىرۋ فاكتىسىن راستايتىن زاتتاي دالەلدەمەلەر تاركىلەندى. وسىلايشا, تاعى ءبىر ەسىرتكى زەرتحاناسى جويىلدى.
ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى ەرلان وماربەكوۆ تۇسىندىرگەندەي, ىشكى ىستەر مينيسترلىگىمەن سينتەتيكالىق ەسىرتكىنىڭ اينالىمىنا قارسى ءىس-قيمىلدىڭ تيىمدىلىگىن ارتتىرۋ بويىنشا بىرقاتار ماقساتتى باعىتتالعان ءىس-شارالار جۇزەگە اسىرىلۋدا.
