ول ءوزىنىڭ ساۋالىندا مەملەكەت باسشىسى بيۋدجەتارالىق قاتىناستاردى زاڭنامالىق دەڭگەيدە تۇبەگەيلى رەفورمالاۋدى تاپسىرعانىن اتاپ ءوتتى. سەناتوردىڭ پىكىرىنشە, قارجىلىق دەربەستىكتى كەڭەيتۋ, وڭىرلىك ەكونوميكانى دامىتۋعا ىنتالاندىرۋ جانە جەرگىلىكتى بيۋدجەتتەردىڭ كىرىستەرىن ۇلعايتۋ ءۇشىن قابىلدانىپ جاتقان شارالار جەتكىلىكسىز بولىپ وتىر.
«جالپى سيپاتتا بولىنەتىن ترانسفەرتتەر مەن نىسانالى ترانسفەرتتەر تۇرعىندارعا مەملەكەت كەپىلدىك بەرگەن بىردەي قىزمەتتەردى, اسىرەسە ينفراقۇرىلىمدىق قىزمەتتەردى ۇسىنۋداعى وڭىرلەر اراسىنداعى الشاقتىقتى كوپ وزگەرتە المايدى. الەۋمەتتىك جايسىزدىق پەن شيەلەنىستىڭ العىشارتتارىنا اكەلەتىن سايكەسسىزدىكتەردى ەسكەرە كەلگەندە, جالپى سيپاتتاعى ترانسفەرتتەردى قالىپتاستىرۋدىڭ تيىمدىلىگى جونىندە ماسەلە تۋىندايدى», دەپ اتاپ ءوتتى دەپۋتات سەرگەي كارپليۋك ءوز ساۋالىندا.
سەناتور 2020-2022 جىلدارعا ارنالعان جالپى سيپاتتاعى ترانسفەرتتەردى قالىپتاستىرۋدا جانە ۇكىمەتتىڭ رەسپۋبليكالىق بيۋدجەتتىڭ اتقارىلۋى جونىندەگى ەسەپتەرىن تالقىلاۋ كەزىندە, سونداي-اق دەپۋتاتتىق ساۋالدار مەن سەناتتا وتكىزىلگەن ءىس-شارالار بارىسىندا بيۋدجەت تۇسىمدەرىن بولجاۋ جانە جالپى سيپاتتاعى ترانسفەرتتەردى ەسەپتەۋ ادىستەمەلەرىن جاقسارتۋ قاجەتتىگىن اتاپ ءوتتى. سەرگەي كارپليۋك شىعىندار بولجامىن انىقتاۋ ادىسىندەگى ماسەلەلەرگە دە توقتالدى. ونىڭ ايتۋىنشا, كەيبىر باعىتتار بويىنشا قارجىلاندىرۋدىڭ وسە تۇسكەنى بايقالادى, ال باسقا باعىتتار بويىنشا - كەرىسىنشە, قارجىلاندىرۋدىڭ جەتىسپەۋشىلىگى تۇراقتى سيپاتقا اينالىپ بارا جاتىر.
سەناتور وسىعان بايلانىستى جەرگىلىكتى بيۋدجەت كىرىستەرىن بولجاۋ ادىستەمەسىن جاقسارتۋ, نىسانالى ترانسفەرتتەردى ءبولۋ پروتسەسىن قايتا قاراۋ, جالپى سيپاتتاعى ترانسفەرتتەردى قاراۋ جانە قالىپتاستىرۋ كەزىندە جەرگىلىكتى جانە ورتالىق اتقارۋشى ورگانداردىڭ جاۋاپكەرشىلىگىن بەلگىلەۋ جانە باسقا دا ماسەلەلەردى ۇكىمەت باسشىسىنىڭ قاراۋىنا ۇسىندى.
