بۇل نورما بۇگىن پالاتانىڭ جالپى وتىرىسىندا سەناتورلار قاراعان «تۇڭعىش پرەزيدەنت - ەلباسى تۋرالى» كونستيتۋتسيالىق زاڭدا جازىلعان.
سونداي-اق, دەپۋتاتتار «قاۋىپسىزدىك كەڭەسى تۋرالى» جانە «قازاقستان حالقى اسسامبلەياسى تۋرالى» زاڭدارعا بۇرىن ۇسىنىلعان وزگەرىستەر مەن تولىقتىرۋلاردى تالقىلادى. تۇزەتۋلەردە ەلباسىنىڭ قاۋىپسىزدىك كەڭەسىندە جانە قازاقستان حالقى اسسامبلەياسىندا ءومىر بويى توراعالىق ەتۋ قۇقىعىنىڭ كۇشىن جويۋ كوزدەلەدى.
جوعارعى پالاتا دەپۋتاتتارى ماجىلىسمەندەردىڭ بۇرىن ايتىلعان بارلىق وزگەرىستەرىن ماقۇلدادى. بىراق, ءوز تۇزەتۋلەرىن ۇسىنا وتىرىپ, زاڭ جوباسىن تومەنگى پالاتاعا قايتا قاراۋعا قايتارىپ وتىر.
«سەناتورلار زاڭناماعا ەنگىزىلىپ وتىرعان مەملەكەتىمىزدىڭ قاۋىپسىزدىك كەڭەسىن, قازاقستان حالقى اسسامبلەياسىن مەملەكەت باسشىسى ءوزىنىڭ قىزمەتىنە سايكەس باسقارۋى ءتيىس دەگەن وزگەرىستەردى قولدادى. سونىمەن قاتار زاڭدى تالقىلاۋ بارىسىندا ءبىر نورما ەنگىزىلىپ وتىر.
ول – «تۇڭعىش پرەزيدەنت تۋرالى» زاڭنان مەملەكەتتىڭ ىشكى جانە سىرتقى ساياساتىنا بايلانىستى باستامالاردى ەلباسىمەن كەلىسىلۋگە ءتيىس دەگەن نورما الىپ تاستالدى. سوندىقتان دا سەنات زاڭناماعا ەنگىزىلگەن وزگەرىستەردى تۇجىرىمدامالى تۇردە قولداپ, ءبىر وزگەرىسپەن ماجىلىسكە قايتاردى», دەدى سەنات دەپۋتاتى ءلاززات سۇلەيمەن.
سەنات ۇسىنعان تۇزەتۋلەر ماجىلىسكە جىبەرىلدى.
