ونلاين رەجىمدەگى بايقاۋ ەكى كەزەڭمەن ءوتتى. قازاق دومبىراشىلارى ءبىرىنشى كەزەڭنەن ءساتتى ءوتىپ, اۆتورلىق وڭدەۋدە نيككولو پاگانينيدىڭ «كاپريس №24» تۋىندىسىن ورىندادى. ال ەكىنشى كەزەڭدە «يگرا پرەستولوۆ» تەلەحيكاياسىنىڭ ساۋندترەگىن ورىنداپ, كونكۋرستىق بەينەروليك ءتۇسىردى. اتالىمعا 36 ەلدىڭ اسپاپشىلارى قاتىسقان. ەڭ جوعارى ۇپايدى قازاقستاندىقتار جەڭىپ الدى.
مۋزىكانتتار جۇلدە ورنىنا ۇيىمداستىرۋشىلار ەسەبىنەن مامىر ايىندا يسپانيادا وتەتىن وفلاين فەستيۆالعا جولداما الدى, سونداي-اق بەلگىلى مۋزىكا ساراپشىلارىنىڭ شەبەرلىك ساباعىنا جەكە قاتىسادى.
دومبىراشىلار قازاق ۇلتتىق ونەر اكادەمياسىندا وقىپ جۇرگەندە تانىسىپ, 2017 جىلى دۋەت قۇرۋعا بەل بۋعان. ولار I’m a Singer بايقاۋىندا ديماش قۇدايبەرگەنمەن بىرگە ونەر كورسەتكەننەن كەيىن تانىمال بولا باستادى. مادەنيەت جانە سپورت مينيسترلىگى توكيوداعى وليمپيادادا دومبىراشىلاردى قازاقستاننىڭ مادەنيەت امباسسادورلارى ەتىپ تاعايىنداعان بولاتىن.
تەمىرلان ولجاباي مەن ەرنات ناۋرىز بۇعان دەيىن «ۇزدىك اسپاپتىق دۋەت» نوميناتسياسى بويىنشا Bridge TV جۇلدەسىن جەڭىپ العان, Golden Time Talent حالىقارالىق فەستيۆالىندە ءبىرىنشى ورىندى يەلەندى. سونىمەن قاتار يسپانيادا وتكەن Costa Brava Music فەستيۆالىنە قاتىسقان.
