پارلامەنت • 25 قاڭتار، 2022

مۇگەدەكتىگى بار ادامداردى قولداۋعا ارنالعان زاڭ جوباسى ازىرلەندى

85 رەت كورسەتىلدى

سەناتتا پالاتا سپيكەرى ماۋلەن اشىمباەۆتىڭ توراعالىعىمەن ءىس-شارا ءوتتى. وندا مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋعا ارنالعان زاڭ جوباسى كوپشىلىككە تانىستىرىلدى، دەپ حابارلايدى Egemen.kz.

سەناتورلار باستاماشى بولعان بۇل زاڭ جوباسىن ءبىر توپ پارلامەنت دەپۋتاتى ازىرلەدى.

«مەملەكەت باسشىسى مۇگەدەكتىگى بار ادامداردى الەۋمەتتىك قورعاۋعا ۇنەمى باسا ءمان بەرىپ كەلەدى. وسى سالاداعى ۇلتتىق زاڭنامانى جەتىلدىرۋ ءىسى دە پرەزيدەنتىمىزدىڭ تاپسىرماسى بويىنشا قولعا الىندى»، دەدى جيىندى اشقان ماۋلەن اشىمباەۆ.

سونداي-اق سەنات توراعاسى وكىنىشكە قاراي ەلىمىزدە ەرەكشە قاجەتتىلىگى بار ادامداردىڭ ازايماي وتىرعانىن، سوندىقتان ولارعا زاڭنامالىق تۇرعىدان قولداۋ كورسەتۋدىڭ ماڭىزى زور ەكەنىن ايتتى. وسىعان وراي دەپۋتاتتار زاڭ جوباسىندا اۋرۋدىڭ الدىن الۋ، مەديتسينالىق قىزمەتتىڭ جانە ءبىلىمنىڭ قولجەتىمدىلىگى مەن ساپاسىن ارتتىرۋ سياقتى ناقتى شارالار ۇسىنىپ وتىر.

«قازىرگى تاڭدا ەلىمىزدە مۇگەدەكتىگى بار 700 مىڭعا جۋىق ادام تۇرادى. وكىنىشكە قاراي، جىل سايىن 50 مىڭنان استام ازامات العاش رەت مۇگەدەكتىگى بار ادام دەپ تانىلادى. بۇل از كورسەتكىش ەمەس. سونىڭ ىشىندە بالالار اراسىنداعى مۇگەدەكتىك ءبىزدى ەرەكشە الاڭداتادى. مۇنىڭ ءبارى دەنساۋلىق ساقتاۋدى جانە اۋرۋدىڭ الدىن الۋدى دامىتۋ كەرەكتىگىن كورسەتەدى. ەرەكشە قاجەتتىلىگى بار ازاماتتار ءۇشىن مەديتسينالىق قىزمەتتەردىڭ جانە ءبىلىم بەرۋدىڭ قولجەتىمدىلىگى مەن ساپاسىن ارتتىرۋ شارالارىن دا ودان ءارى كۇشەيتۋ ماڭىزدى»، دەدى ماۋلەن اشىمباەۆ.

بىلتىر اتالعان زاڭ جوباسىن دايىنداۋ ءۇشىن سەنات جانىنان ارنايى جۇمىس توبى قۇرىلعان ەدى. ونىڭ قۇرامىنا 55 ادام ەندى. ولاردىڭ قاتارىندا پارلامەنت دەپۋتاتتارى، مەملەكەتتىك ورگانداردىڭ، ۇكىمەتتىك ەمەس جانە حالىقارالىق ۇيىمداردىڭ وكىلدەرى، سونداي-اق، مۇگەدەكتىگى بار ادامدار بار. جۇمىس توبى ەلىمىزدە مۇمكىندىگى شەكتەۋلى ادامداردىڭ ءومىر ءسۇرۋ ساپاسىن ارتتىرۋ ءۇشىن 500-دەن استام ۇسىنىس ازىرلەدى.

«بۇل قۇجات مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا جۇمىستى جۇيەلى تۇردە قولداۋعا ارنالعان. وسىعان وراي زاڭ جوباسىنا ولاردى الەۋمەتتىك قورعاۋعا قاتىستى ناقتى نورمالار ەنگىزىلىپ وتىر. سونىمەن قاتار دەنساۋلىق ساقتاۋ، ارناۋلى الەۋمەتتىك قىزمەتتەر، ءبىلىم بەرۋ باعىتىنداعى بىرقاتار ۇلتتىق زاڭنامانى جەتىلدىرۋدى كوزدەيدى»، دەدى سەنات توراعاسى.

جۇمىس توبىنىڭ جەتەكشىسى، سەناتور اقمارال ءالنازاروۆانىڭ ايتۋىنشا، زاڭ جوباسى مۇمكىندىگى شەكتەۋلى ازاماتتار كۇندەلىكتى كەزدەسەتىن ناقتى پروبلەمالاردى شەشۋگە باعىتتالعان.

مىسالى، بۇرىن مۇگەدەكتىگى بار بالانى شيپاجاي-كۋرورتتاردا تەگىن ەمدەۋ كەزىندە ونىمەن بىرگە ەرىپ جۇرەتىن ادام جولدامانىڭ قۇنىن ءوز قاراجاتىنان تولەۋگە ءتيىس ەدى. ەگەر ەرىپ جۇرەتىن ادامنىڭ تولەيتىن قارجىسى بولماسا، بالا دا شيپاجاي-كۋرورتتا تەگىن ەمدەلۋدەن قاعىلۋعا ءماجبۇر بولادى. وسىعان وراي سەناتورلار ەرىپ جۇرەتىن ادام ءۇشىن جولداما قۇنىنىڭ 70 پايىزىن وتەۋدى ۇسىنىپ وتىر. بۇل وڭالتۋ شارالارىنىڭ قولجەتىمدىلىگىن قامتاماسىز ەتۋگە جانە جىل سايىن 13 مىڭنان استام ادامدى قوسىمشا قامتۋعا مۇمكىندىك بەرەدى.

جۇمىس توبىنىڭ تاعى ءبىر ناقتى ۇسىنىسى 3-توپتاعى مۇگەدەكتىگى بار بار ادامدار ءۇشىن جەكە نوتاريۋستاردان نوتارياتتىق قىزمەتتەردى تەگىن الۋعا جاعداي جاساۋ. بۇدان باسقا، ەگەر ەستۋ جانە كورۋ قابىلەتى بويىنشا مۇگەدەكتىگى بار ازاماتتار سوت وتىرىستارىنا قاتىسقان كەزدە ولارعا ىمداۋ ءتىلىن، برايل ءالىپبيىن بىلەتىن اۋدارماشىنىڭ قىزمەتتەرىن تەگىن ۇسىنۋ، سونداي-اق، سۋردوتەحنيكالىق، تيفلوتەحنيكالىق قۇرالداردى پايدالانۋ سياقتى ەرەجەلەر جازىلعان. زاڭ جوباسىنىڭ باستاماشىلارى كەدەرگىسىز ورتا قالىپتاستىرۋ ءۇردىسىن جەدەلدەتۋ ءۇشىن قالالىق مارشرۋتتارعا جولاۋشىلار كولىگىن ساتىپ العان كەزدە مۇگەدەكتىگى بار ادامدارعا بەيىمدەلگەن اۆتوبۋستارعا باسىمدىق بەرۋ نورماسىن ۇسىندى. سونداي-اق باستاماشىلاردىڭ ۇسىنىسىنا سايكەس تاكسوپاركتەردەگى ءاربىر ونىنشى كولىك ينۆوتاكسي بولۋعا ءتيىس.

ءىس-شارا بارىسىندا مۇمكىندىگى شەكتەۋلى ازاماتتاردى جۇمىسقا ورنالاستىرۋ، ولاردى تۇرعىن ۇيلەرمەن، ساپالى بىلىممەن قامتاماسىز ەتۋ جانە بالالاردىڭ اعزاسىنا زياندى، مۇگەدەكتىككە اكەلىپ سوعۋى مۇمكىن ونىمدەردى قولدانۋعا ۇندەيتىن جارنامالارعا تىيىم سالۋ ماسەلەلەرى دە تالقىلاندى.

كەزدەسۋگە پرەمەر-ءمينيستردىڭ ورىنباسارى ەرالى توعجانوۆ، سالالىق مينيسترلىكتەردىڭ، مەملەكەتتىك ورگانداردىڭ، ۇكىمەتتىك ەمەس ۇيىمداردىڭ باسشىلارى جانە وسى ماسەلە بويىنشا بەلسەندىلىگىمەن تانىلىپ جۇرگەن مۇگەدەكتىگى بار ازاماتتار قاتىستى.

جيىندى قورىتىندىلاعان سەنات توراعاسى ماۋلەن اشىمباەۆ زاڭ جوباسىن ازىرلەگەن جۇمىس توبىنىڭ مۇشەلەرىنە العىسىن ءبىلدىردى. سونداي-اق ول زاڭنامانى ودان ءارى جەتىلدىرۋ، مۇگەدەك ادامداردىڭ ءومىر ءسۇرۋ ساپاسىن ارتتىرۋ جانە ولارعا ءوز الەۋەتىن ىسكە اسىرۋعا بارىنشا جاعداي جاساۋ ءۇشىن ءتيىستى جۇمىستى ءارى قاراي جالعاستىرا بەرۋدىڭ ماڭىزدى ەكەنىن ايتتى.

سوڭعى جاڭالىقتار

يكبال الەمى

تانىم • كەشە

اسكەردەگى ادەبي كۇن

ايماقتار • كەشە

دامۋدىڭ كىلتى

قوعام • كەشە

ەل سەنىمىن ارقالاعان

قازاقستان • كەشە

تورعاي سۇڭقارى

ادەبيەت • كەشە

ۇلى شايقاس

ونەر • كەشە

ۇقساس جاڭالىقتار