اۋىل تۇرعىندارى سەرىكتەستىكتىڭ ەگىن القاپتارىن بەيساۋات مالدىڭ تۇياعىنان قورعاۋ ءۇشىن تەرەڭ ور قازىپ قورشاپ تاستاعانىن ايتىپ دابىل قاعۋدا. ءتورت ت ۇلىك مال ءۇشىن عانا ەمەس, اڭ-قۇسقا دا قاۋىپتى ەكەنىن بەينەبايانمەن جانە سۋرەتتەرمەن دالەلدەپ وتىر. تسەلينوگراد اۋداندىق جەر قاتىناستارى ءبولىمىنىڭ اقپاراتىنا قاراعاندا, «انتونوۆكا» جشس وزىنە تيەسىلى جەر تەلىمىندە ەگىستىك القابىن قورعاۋ ماقساتىندا القاپتى اينالدىرا وتىرىپ, ەنى 1,5 مەتر, تەرەڭدىگى 2,5 مەتر, جالپى ۇزىندىعى 46 شاقىرىم بولاتىن 5 379 گەكتار القاپتى اينالدىرا قازعان. قولدانىستاعى زاڭناماعا سۇيەنسەك, ور قازۋ ارقىلى جەردى قورشاۋ زاڭ بۇزۋعا جاتادى. توپىراقتىڭ ۇستىڭگى قۇنارلى قاباتىنا زالال كەلتىرگەنى ءوزى الدىنا, ەگىستىك جەر سەرىكتەستىككە ۋاقىتشا پايدالانىپ, ەگىن ەگۋ ءۇشىن بەرىلگەن, ور قازۋ ءۇشىن ەمەس.
ارينە, سەرىكتەستىك باسشىلارى ماڭداي تەرمەن وسىرگەن ەگىنىن قورعاۋى كەرەك. بۇل ءۇشىن ەگىن كوكتەپ شىققان سوڭ قورىقشى قويعان ءلازىم. بۇرىننان بار تاجىريبە. بەيساۋات مال ەگىنگە ءتۇسىپ, زيان كەلتىرەتىن بولسا, قولدانىستاعى ءتارتىپ بويىنشا زيانىن وتەيدى. ال ور قازۋ – شەكتەن شىققان ارەكەت. مال بىلاي تۇرسىن, ادام ءۇشىن دە قاۋىپتى. ەگەر الدا-جالدا ءورت قاۋپى تۋا قالسا, ءورت سوندىرۋشىلەر دە القاپقا وتە المايدى عوي. اڭ-قۇسقا قانشالىقتى زيانى بارىن بىلمەك بولىپ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنا ساۋال جولدادىق. ينسپەكتسيادان كەلگەن جاۋاپتىڭ ءتۇيىنى مىناداي. 2021 جىلعى قىركۇيەكتىڭ 28-29-ى كۇندەرى ينسپەكتسيانىڭ باس ماماندارى ق.مۇساعاليەۆ, د.احمەتوۆ «جاسىل ايماق» مەكەمەسىنىڭ ماماندارى ا.بايزاحوۆ, ن.الشىنباەۆپەن بىرگە تسەلينوگراد اۋدانىنىڭ پريرەچەنسكي اۋىلدىق وكرۋگىندەگى انتونوۆكا اۋىلىنا (قازىرگى وپان اۋىلى) باردى. تەكسەرۋ بارىسىندا «انتونوۆكا» جشس-عا تيەسىلى 5 379 گەكتار جەر تەلىمىندە ەنى 1,5 مەتر, تەرەڭدىگى 2,5 مەتر جانە ۇزىندىعى 46 شاقىرىم بولاتىن ور ەكسكاۆاتورمەن قازىلعانى انىقتالدى. سەرىكتەستىكتىڭ مەملەكەتتىك ورمان قورى جەرلەرىنە قاتىسى جوق.
ينسپەكتسيا باسشىسى لاشىنتاي دۇيسەنوۆتىڭ ايتۋىنا قاراعاندا, ازىرشە اڭ-قۇسقا ءتونىپ تۇرعان قاتەر جوق. ال وبلىستىق جەردىڭ پايدالانۋى مەن قورعالۋىن باقىلاۋ باسقارماسى ءبىزدىڭ ساۋالىمىزعا مىناداي جاۋاپ جولدادى. ساۋالدى قاراستىرۋ بارىسىندا كاداسترلىق ءنومىرى 01-011-048-098, جالپى اۋدانى 5 379 گەكتاردى قۇرايتىن جەر ۋچاسكەسى تسەلينوگراد اۋدانى اكىمدىگىنىڭ 2003 جىلعى №366, 2004 جىلعى №342 قاۋلىلارىمەن «انتونوۆكا» سەرىكتەستىگىنە تاۋارلى اۋىل شارۋاشىلىعى ءوندىرىسىن جۇرگىزۋگە ۋاقىتشا وتەۋلى ۇزاقمەرزىمدى پايدالانۋعا بەرىلگەندىگى انىقتالدى. جاۋاپحاتتا وردىڭ قازىلعاندىعى انىق كورسەتىلگەن. 2022 جىلدىڭ 1 قاڭتارىنان باستاپ جەرگىلىكتى اتقارۋشى ورگانداردان جەردى پايدالانۋ مەن قورعاۋدىڭ مەملەكەتتىك باقىلاۋ فۋنكتسيالارىن وبلىستاردا, رەسپۋبليكالىق ماڭىزى بار قالالاردا جانە استانادا اۋماقتىق بولىمشەلەر قۇرا وتىرىپ, ورتالىق ۋاكىلەتتى ورگاننىڭ ۆەدومستۆوسىنا قايتارۋ كوزدەلگەن. بۇگىنگى كۇنى قازاقستان رەسپۋبليكاسىنىڭ زاڭناماسى شەڭبەرىندە قايتا ۇيىمداستىرۋ (تاراتۋ) ءراسىمى اياقتالعانعا دەيىن جەردىڭ پايدالانۋى مەن قورعالۋىنا مەملەكەتتىك باقىلاۋ جۇرگىزۋگە مۇمكىندىك جوق.
باسقارمانىڭ جاۋابى وسىنداي. بىراق ور بۇگىن قازىلىپ وتىرعان جوق قوي. وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى 2021 جىلدىڭ قىركۇيەك ايىنىڭ سوڭىندا تەكسەرىس جۇرگىزگەن. دەمەك ور ونىڭ الدىندا قازىلعان. ول ۋاقىتتا وبلىستىق جەردىڭ پايدالانۋى مەن قورعالۋىن باقىلاۋ باسقارماسىنىڭ قۇزىرەتى وزىندە. ەندەشە, نەگە ۋاقىتىندا شارا قولدانىلماعانى تۇسىنىكسىز.
اقمولا وبلىسى,
تسەلينوگراد اۋدانى
