الەم • 23 قاڭتار، 2022

جىل ءسوزى

81 رەت كورسەتىلدى

«وكسفورد سوزدىگى» ءداستۇر بويىنشا 2021 جىلى ەڭ ءجيى پايدالانىلعان ءسوزدى انىقتادى. بۇل جولى، ارينە، vax («ۆاكتسينا»، «ۆاكتسينالاۋ»، «ۆاكتسينا ەگۋ») «جىل ءسوزى» اتاندى.

بىلتىر بۇل ءسوز بۇرىنعىعا قا­راعاندا 72 رەت ءجيى قولدانىلعان. ونىڭ سەبەبى بارشا الەمدى جاۋلاعان پاندەميالىق احۋالعا بايلانىستى ەكەنى بەلگىلى. لينگۆيستەردىڭ ايتۋىنشا، vax ءسوزى العاش رەت اعىلشىن تىلىندە 1799 جىلى پايدا بولعان. ال ءسوزدىڭ شىعۋ تەگى لاتىننىڭ vacca («سيىر») سوزىمەن ماعىنالاس.

سوزدىك قۇراستىرۋشىلارىنىڭ مالىمەتىنشە، vax سوزىنەن بىرنەشە نەولوگيزم پايدا بولعان: vaxxie (ۆاكتسينالاۋ كەزىندە تۇسىرىلگەن فوتو); vax-a-thon (جاپپاي ۆاكتسينا ەكتىرۋگە كەلگەندەگى جيىن) جانە يرونيالىق vaxinista (الەۋمەتتىك جەلىدە ۆاكتسينا العاندىعىن كورسەتەتىن بەلگى (ستاتۋس)، قوياتىن ادام).

ايتا كەتەيىك، اعىلشىن ءتىلىنىڭ «وكسفورد سوزدىگى» وكسفورد ۋنيۆەر­سيتەتىنەن باسىلىپ شىعادى. سوڭعى جيناعى (2005 جىلى) شامامەن 301 100 ماقالانى (350 ملن باس­پا تاڭباسى) قۇرايدى.

ەسكە سالساق، 2020 جىلى سوزدىك جىل ءسوزىن تاڭداي الماپ ەدى. وكسفورد لەكسيكوگرافتارى 2020 جىلدىڭ كۇنتىزبەسىندەگى وقيعالارعا بايلانىستى ەڭ كوپ ايتىلعان سوزدەردى ىرىكتەپ الدى. سونىمەن قاڭتار ايىندا اۋستراليا ورتكە ورانعان كەزدە bushfire – «جويقىن دالا ءورتى»، سونداي-اق «يمپيچمەنت» دەگەن سوزدەر كوپ قولدانىلعان. كوكتەمدە سوزدەر مەن ءسوز تىركەستەرىنىڭ تىزىمىنە ميللياردتاعان ادامنىڭ ءومىر سالتىن وزگەرتكەن پاندەمياعا بايلانىستى بىرنەشە ۇعىم ەنگىزىلدى. ولار: coronavirus (كوروناۆيرۋس)، COVID-19، lockdown (لوكداۋن)، so­cial distancing (الەۋمەتتىك اراقا­شىق­­تىق)، reopening (قايتا جاندانۋ).

ال بيىل وكسفورد سوزدىگى الەمدە، قوعامدا كوپ ايتىلعان ءھام كوپ جازىلعان قاي ءسوزدى تاڭداپ الار ەكەن؟..

سوڭعى جاڭالىقتار

ۇقساس جاڭالىقتار