قازاقستان • 22 قاڭتار، 2022

قازاقستان يادرولىق قارۋعا جاپپاي تىيىم سالۋعا شاقىردى

98 رەت كورسەتىلدى

يادرولىق قارۋعا تىيىم سالۋ تۋرالى شارتتىڭ كۇشىنە ەنۋىنە ءبىر جىل تولۋىنا وراي قازاقستان رەسپۋبليكاسى يادرولىق قارۋسىزدانۋدىڭ بەلسەندى جاقتاۋشىسى رەتىندە الەمنىڭ بارلىق مەملەكەتتەرىن يادرولىق قارۋسىز الەمگە قول جەتكىزۋ ءۇشىن ياقتسش-عا قوسىلۋعا شاقىردى، دەپ حابارلايدى Egemen.kzء سىم ءباسپاسوز قىزمەتىنە سىلتەمە جاساپ.

«الەمدەگى قۋاتى جاعىنان ءتورتىنشى يادرولىق قارۋ ارسەنالىنان باس تارتقان جانە ءوز اۋماعىندا يادرولىق سىناق پوليگونىن جاپقان تۇڭعىش مەملەكەت رەتىندە، سونداي-اق ورتالىق ازيادا يادرولىق قارۋدان ازات ايماق قۇرۋدىڭ باستاماشىلارىنىڭ ءبىرى بولا وتىرىپ، قازاقستان ياقتسش ءماتىنىن ازىرلەۋگە بەلسەندى ات سالىستى. بۇگىن ءبىزدىڭ ەلىمىز اۆستريانىڭ توراعالىعىمەن شارتتىڭ باسقا دا قاتىسۋشىلارىمەن بىرلەسىپ، ۆەنادا جوسپارلانعان ياقتسش-عا قاتىسۋشى-مەملەكەتتەردىڭ ءبىرىنشى كەزدەسۋىنە دايىندىق جۇرگىزۋدە. وسى جۇمىس شەڭبەرىندە قازاقستان كيريباتيمەن بىرلەسىپ يادرولىق سىناقتاردان كەيىن رادياتسيالىق زالالدانۋعا ۇشىراعان حالىقتى جانە قورشاعان ورتانى وڭالتۋ جونىندەگى شارالاردى كوزدەيتىن ياقتسش-نىڭ جاعىمدى مىندەتتەمەلەرى بويىنشا جۇمىس قۇجاتىن دايىندادى»، دەپ جازىلعان قازاقستاننىڭ ءسىم تاراتقان حابارلامادا.

ياقتسش-نىڭ قابىلدانۋى الەم مەملەكەتتەرىنىڭ يادرولىق قاۋىپكە قارسى ناقتى ءىس-قيمىل جاساۋعا دايىندىعىن كورسەتەتىن ماڭىزدى قادام. شارت يادرولىق قارۋدى تاراتپاۋ تۋرالى شارتتىڭ رەجيمى (ياقتش) توڭىرەگىندە جانە ونى قولداۋ ماقساتىندا ازىرلەنگەن.

 

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار