قوعام • 21 قاڭتار، 2022

«سامۇرىق-قازىنا» قورى جابىلۋى مۇمكىن

898 رەت كورسەتىلدى

بۇل تۋرالى پرەزيدەنت قاسىم-جومارت توقاەۆ بيزنەس وكىلدەرىمەن كەزدەسۋدە ءمالىم ەتتى، دەپ حابارلايدى Egemen.kz.

پرەزيدەنت قور ءتيىمسىز، شىعىنى كوپ ەكەنىن ايتىپ، سۋ جاڭا بىرنەشە زاۋىت سالعان وزبەكستاندى مىسالعا الدى. ەگەر ءبىر اي ىشىندە قور پرەزيدەنتتىڭ تاپسىرمالارىن ورىنداي الماسا باسشىسى الماسادام ساتقاليەۆ تە، قور دا «كەلمەسكە» كەتەتىن بولادى.

«مەن «سامۇرىق-قازىنا» قورىن رەفورمالاۋدى تاپسىرىپ قويدىم. قازىر قوردىڭ قۇرىلىمى اشىق ەمەس، وعان ساياسي ماڭىزدى ادامدار باسشى بولىپ بارادى. قوردىڭ ساتىپ الۋ جۇيەسى ءتيىمسىز، جۇمىسشىلار ءوز ىشىندە سىيىسپايدى، شىعىنعا باتا جۇمىس ىستەپ وتىر، اۋقىمدى جوبالار اياقسىز قالدى، قوردىڭ جۇمىسىن قامتاماسىز ەتۋ ءۇشىن قىرۋار قاراجات كەتىپ جاتىر. وسى ماسەلەلەردىڭ بارلىعى قوعام نارازىلىعىن تۋدىردى. سول سياقتى وسى ۋاقىتقا دەيىن مۇناي-حيميا زاۋىتىن سالا الماعانىمىز دا ءىش اشىتادى»، دەيدى پرەزيدەنت.

توقاەۆ قازاقستان ءالى كۇنگە دەيىن كەڭەس ۇكىمەتىنەن قالعان زاۋىتتاردى جوندەپ جۇرگەندە وزبەكستان جاڭادان 2-3 زاۋىت سالىپ العانىن، ونداي زاۋىتتار ارينە كوز قۋانتاتىنىن ايتتى.

«ديرەكتورلار كەڭەسىنىڭ ءرولى مەن تاۋەلسىز ديرەكتورلار تەك قاعاز جۇزىندە عانا بار. قوردى تۇبەگەيلى رەفورمالاۋ تۋرالى تاپسىرما بەرەمىن. ساتقاليەۆپەن بۇل تۋرالى سويلەسكەنمىن، رەفورمالاۋ تاپسىرماسىن ورىنداي الماسا، ءوزى دە، ونىمەن بىرگە قور دا كەلمەسكە كەتەدى»، دەدى توقاەۆ.

سوڭعى جاڭالىقتار

ۇقساس جاڭالىقتار