وقيعا • 21 قاڭتار، 2022

بلوگەرگە قاستاندىق جاساۋعا تاپسىرىس بەرگەن شەنەۋنىك قاماۋعا الىندى

بۇل تۋرالى تۇركىستان وبلىستىق پوليتسيا دەپارتامەنتى مالىمدەدى، دەپ جازادى Egemen.kz.

وبلىستىق پد باستىعى قايرات دالبەكوۆتىڭ ايتۋىنشا، بۇگىنگى تاڭدا اتالعان قىلمىسقا قاتىسى بار دەگەن كۇدىكپەن 5 ادام ۇستالعان. ونىڭ ءبىرى - اۋداندىق ادامي الەۋەتتى دامىتۋ ءبولىمىنىڭ باسشىسى ەكەنى بەلگىلى بولعان.

«ادام ولتىرۋگە وقتالعان ەكى كۇدىكتى شىمكەنتتەن ۇستالدى. ولاردان زاتتاي ايعاق رەتىندە ۆاز (2107/21110) ماركالى 2 اۆتوكولىك تاركىلەندى. قىلمىستى ورىنداۋشىلار بۇل اۆتوكولىكتەردى قىلمىس جاساعانى ءۇشىن بەرىلەتىن اقشاعا ساتىپ العان. سونداي-اق ولاردان 16 كاليبرلى پاتروندار الىندى. قازىرگى ۋاقىتتا سارىاعاش اۋدانى تۇرعىندارىنىڭ ءبىرى، ياعني شەنەۋنىكتىڭ وسى قىلمىسقا تاپسىرىس بەرگەنى انىقتالدى. ول ءجۋرناليستىڭ ءومىرىن 5 ملن تەڭگەگە باعالاعان»، دەدى قايرات دالبەكوۆ.

ايتا كەتەيىك، 3 قاڭتار كۇنى سارىاعاش اۋدانىندا تۇراتىن جۋرناليست امانگەلدى باتىربەكوۆتىڭ ۇيىنە شابۋىل جاسالىپ، ونىڭ بالاسى جاراقات العان بولاتىن. سول كۇنى پوليتسيا قىزمەتكەرلەرى بۇل جايتتى اۋداندىق پوليتسيا بولىمىنە تىركەپ، قر قك 24-99-باپتارى بويىنشا سوتقا دەيىنگى تەرگەۋدى باستادى.

«ۇستالعان بەس ادامنىڭ ىشىندە سول شەنەۋنىك، ونىڭ قول استىندا ىستەگەن سونىڭ جاقىن ادامى، تاپسىرىس بەرگەن ادام مەن ەكى كۇدىكتى بار. تاپسىرىستى ورىنداۋشىلار بۇرىن بىزدە ەسەپتە بولماعان. ءوز كەزەگىندە تاپسىرىستى ورىنداۋشىلار ءىزىن جاسىرۋ ماقساتىندا سارىاعاش اۋدانىنان شارداراعا، سودان سوڭ ارىس ارقىلى شىمكەنتكە جەتكەن. قازىر تەرگەۋ توبى ءتيىستى تەرگەۋ امالدارىن جۇرگىزىپ جاتىر. قىلمىستىق ءىس اياسىندا قاجەتتى پروتسەسسۋالدىق ارەكەتتەر ىسكە اسىرىلۋدا. سوتقا دەيىنگى تەرگەۋ بارىسىندا قىلمىستىڭ سەبەپتەرى مەن بارلىق ءمان-جايى انىقتالادى. سوت ولاردى قاماۋعا سانكتسيا بەرىپ، كۇدىكتىلەر ۋاقىتشا ۇستاۋ يزولياتورىنا قامالدى. بۇل قىلمىسقا ءجۋرناليستىڭ قىزمەتى سەبەپ بولۋى مۇمكىن دەگەن بولجام بار»، دەدى پوليتسيا گەنەرال-مايورى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز