ونەر • 20 قاڭتار، 2022

قازاق بيىنە قۇمارتقان قىز

2249 رەت كورسەتىلدى

بىرىككەن اراب امىرلىكتەرىنىڭ دۋباي قالاسىندا «EXPO-2020» كورمەسى وتۋدە. وسى كورمەدە نۇرسۇلتاندىق «ناز» مەملەكەتتىك بي تەاترى ۇجىمى قۇرامىندا ونەر كورسەتىپ جۇرگەن گۇلدانا سامالقىزى تومەندەگى قىزىق وقيعانى باياندادى.

بۇكىلالەمدىك كورمەنىڭ قازاقستان پاۆيلونى ادەمى بەزەندىرىلگەن ءتورت قاباتتان تۇرادى. ەڭ العاشقى قاباتى – جۋسان زالى. بۇل زالدان دالا ءيىسى، جۋسان ءيىسى اڭقىپ تۇر، عاجاپ! ءبىر كەلگەن ادام قايتا اينالىپ كەلگىسى كەلەدى. ودان كەيىنگى زالداردا ۇلتىمىزدىڭ ءداستۇرلى كيىمدەرى، ەلدىڭ تاريحى مەن مادەنيەتى، ونەرى جان-جاقتى قامتىلعان. تاماشالاۋشى مەيماندار وتە كوپ، نەشە ءتۇرلى ۇلت وكىلدەرى قىزىقتاپ قاراۋدا.

ارينە، ەكسپو كورمەسىندە ەلىمىزدىڭ ۇلتتىق ونەرى دە بارىنشا ناسيحاتتالۋدا. جوعارىدا ايتىلعان «ناز» بي تەاترى ۇجىمى دا قازاقتىڭ مىڭ بۇرالعان بيلەرىن كورسەتىپ، جيىلعان جۇرتتى تاڭداي قاقتىرادى.

سوڭعى كۇندەرى مىناداي قىزىق وقيعا بولىپتى: قازاق اۋەنى شىرقالىپ، ءبيى وينالسا، مىنا ءبىر لۋنا ەسىمدى قىز بالا ەسى كەتە تاماشالاپ، قويىلىم اياقتالىسىمەن جۇگىرىپ بارىپ ءبيشى گۇلدانانى قاتتى قىسىپ قۇشاقتاي الادى ەكەن. وسىنداي جاعداي بىرنەشە مارتە قايتالانعان.

قىزدىڭ اتا-اناسى قىتايدان كەلسە كەرەك. ايتۋىنشا، كىشكەنتاي لۋنا اكەسى مەن اناسىن قولىنان جەتەكتەپ، ۇنەمى قازاق پاۆيلونىنا تارتادى ەكەن. ومىردە وتە تۇيىق بولسا دا، قازاقى اۋەندى ەستىگەن ساتتە اينالاداعىنىڭ ءبارىن ۇمىتىپ كەتەتىن ءسابيدىڭ قىلىعىنا اتا-اناسى اڭ-تاڭ بولعان.

گۇلدانا سامالقىزى – قۇرمانعازى اتىنداعى ورال مۋزىكالىق كوللەدجىنىڭ بي سىنىبىن بىتىرگەن. 2020 جىلدان بەرى نۇر-سۇلتان قالاسىندا «ناز» مەملەكەتتىك بي تەاترىندا قىزمەت ەتەدى. گۇلدانانىڭ اتا-اناسى سامال مەن ەلميرا دا – ونەر ادامدارى، حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا ەڭبەك ەتەدى.

 

باتىس قازاقستان وبلىسى

سوڭعى جاڭالىقتار

ۇقساس جاڭالىقتار