ايماقتار • 20 قاڭتار، 2022

ەكى اۋىلعا گاز جەتتى

باتىس قازاقستان وبلىسىنا قاراستى بايتەرەك اۋدانىنىڭ ەكى ەلدى مەكەنى كوگىلدىر وتىن جەلىسىنە قوسىلدى. اۋدان اكىمى مارات توعجانوۆتىڭ ايتۋىنشا، تابيعي گاز يگىلىگىن كورەتىن اۋدان تۇرعىندارىنىڭ ۇلەسى 99،5 پايىزعا جەتپەك.

قازبەك قۇتتىمۇرات ۇلى

ايتا كەتەيىك، قاڭتاردىڭ 13-ءى كۇنى تابيعي گازعا قوسىلعان پاۆلوۆ پەن گوربۋنوۆ اۋىلدارى – بايتەرەك اۋدانى ماحامبەت اۋىلدىق وكرۋگىنە قاراستى شاعىن عانا ەلدى مەكەندەر. گوربۋنوۆتا نەبارى 36 ءۇي، 123 ادام تۇرسا، پاۆلوۆ اۋىلىنداعى 52 وتباسىندا 168 ادام بار. وڭىردەگى بارلىق ءىرى ەلدى مەكەندەر، وكرۋگ ورتالىقتارى تابيعي گاز يگىلىگىن ەرتەدەن-اق كورىپ وتىرسا، ەندى، مىنە، كەزەك الاقانداي اۋىلدارعا دا جەتتى.

– ەل ۇكىمەتى حالىقتىڭ تۇرمىسىن جاقسارتۋ، ءۇي تۇرمىسىنداعى ەڭ باستى قاجەتتىلىكتەردى قاناعاتتاندىرۋ ماسەلەسىنە بارىنشا كوڭىل ءبولىپ كەلەدى. 2021 جىلى اۋىلداردى تازا اۋىزسۋ، جول جانە گازبەن قامتۋ سياقتى جۇمىستاردى ويداعىداي اتقاردىق. بايتەرەك اۋدانىندا 68 ەلدى مەكەن بار. وسى كەزگە دەيىن سونىڭ 51-ىندە عانا گاز بولدى. 2021 جىلى تاعى سەگىز اۋىلعا گاز تارتۋدى باستادىق. بيىل اۋدان حالقىنىڭ 99،5 پايىزى گازبەن قامتىلادى، – دەدى اۋدان باسشىسى پاۆلوۆ اۋىلىندا وتكەن سالتاناتتى جيىندا.

اتالعان اۋىل تۇرعىندارى تابيعي گاز يگىلىگىن كوپتەن بەرى تالاپ ەتىپ جۇرگەن. ارينە، گاز، سۋ قۇبىرلارى اۋەلى حالىق سانى كوپ، ءىرى ەلدى مەكەندەرگە تارتىلادى. وبلىس ورتالىعىنان نەبارى 30 شاقىرىم جەردە ورنالاسسا دا، شاعىن اۋىلدىڭ ءوز كەزەگىن كۇتىپ قالعانى سوندىقتان. ۇزاق جىلعى ماسەلە ءتۇيىنى وتكەن جىلى مەملەكەتتىك «نۇرلى جەر» باعدارلاماسى ارقاسىندا شەشىلىپتى.

اۋىلعا گاز كەلگەن مەرەكەلى جيىندا كوپبالالى انا ساراجان ەسمۇحانبەتوۆا، اۋىل تۇرعىنى امانباي اياپوۆ ءسوز الىپ، ەلگە جاسالعان قامقورلىق ءۇشىن ەل اعالارىنا العىس ايتىپ، اۋىلداستارىن قۋانىشىمەن قۇتتىقتادى.

تاعى ءبىر قۋانىشتى جاڭالىق، ماحامبەت اۋىلدىق وكرۋگى ورتالىعىندا كاسىپكەرلەردىڭ قولداۋىمەن 75 ورىندىق بالاباقشا اشىلعالى جاتىر ەكەن. جەرگىلىكتى دەمەۋشىلەر بوس عيماراتتى جابدىقتاپ، اۋىل بالالارىنا سىيعا تارتۋدا. ايتا كەتەيىك، وكرۋگتە مال شارۋاشىلىعىمەن اينالىساتىن، ءسۇت، ەت وندىرەتىن بيزنەس قۇرىلىمدارى از ەمەس. اۋىل شارۋاشىلىعىمەن اينالىساتىن كاسىپكەر ا.امانعاليەۆ ءوز مەنشىگىندەگى عيماراتتى مەملەكەت تەڭگەرىمىنە وتكىزگەن بولاتىن. ول عيمارات 2021 جىلى «اۋىل – ەل بەسىگى» باعدارلاماسى اياسىندا كۇردەلى جوندەۋدەن ءوتىپ، كىتاپحانا رەتىندە حالىقتىڭ پايدالانۋىنا بەرىلدى.

باتىس قازاقستان وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز