پارلامەنت • 19 قاڭتار، 2022

ءماجىلىس دەپۋتاتتىق مانداتتاردى بولۋگە قاتىستى قۇجاتتى ماقۇلدادى

84 رەت كورسەتىلدى

پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ ماقۇلداندى، دەپ حابارلايدى Egemen.kz.

زاڭ جوباسىن قابىلداۋدىڭ ماقساتى - بيلىكتىڭ وكىلدى تارماعىندا ايەلدەردىڭ جانە جاستاردىڭ، سونداي-اق مۇگەدەكتىگى بار ادامداردىڭ دا قاتىسۋىن قامتاماسىز ەتۋ جانە پىكىرىن ەسكەرۋ، ولاردى مەملەكەتتىڭ تىنىس-تىرشىلىگىندە بەلسەندى جۇمىسقا تارتۋ.

«كونستيتۋتسياعا سايكەس قازاقستان رەسپۋبليكاسى ءوزىن الەۋمەتتىك مەملەكەت رەتىندە ورنىقتىرادى، ازاماتتار الدىنداعى الەۋمەتتىك مىندەتتەمەلەردى ورىنداۋعا باعىتتالعان ساياساتتى دايەكتى تۇردە ىسكە اسىرادى.

مەملەكەتىمىز ساياساتتى قالىپتاستىرۋعا حالىقتى تارتۋعا ەرەكشە نازار اۋدارادى. 2020 جىلعى مامىردا «ساياسي پارتيالار تۋرالى» زاڭعا پارتيالىق تىزىمدەردە ايەلدەر مەن جاستار ءۇشىن 30% كۆوتا ەنگىزۋ جونىندەگى نورمالار ەنگىزىلدى. سول كەزدەن باستاپ ساياسي پارتيالار گەندەرلىك تەڭدىك جانە جاستاردى قولداۋ ماسەلەلەرىن جەتىلدىرۋدە ماڭىزدى ءرول اتقارا باستادى. سايلاۋ تىزىمدەرىنە ەنگىزۋ ارقىلى جاس كانديداتتار مەن ايەلدەردى وكىلدى ورگاندار قاتارىنا قوسۋ مۇمكىندىگى پايدا بولدى»، دەدى قر ادىلەت ءمينيسترى قانات مۋسين.

ونىڭ ايتۋىنشا، كۆوتالاۋ تەتىگى قوعامداعى پروبلەمالىق جانە سەزىمتال ماسەلەلەردى شەشۋ كەزىندە ءارتۇرلى پىكىرلەردى ەسكەرۋ ارقىلى نورما شىعارماشىلىق پروتسەسىندە «قوعامدىق كۇن ءتارتىبىن» قالىپتاستىرۋ مۇمكىندىگىن كەڭەيتتى.

«وسى تەتىكتى دامىتۋ ءۇشىن مەملەكەت باسشىسى ءوزىنىڭ 2021 جىلعى قازاقستان حالقىنا جولداۋىندا ەرەكشە قاجەتتىلىكتەرى بار ادامداردىڭ زاڭنامالىق قىزمەتتە قاتىسۋ قاجەتتىلىگىن اتاپ ءوتتى. وسى تاپسىرمانى ىسكە اسىرۋ ماقساتىندا ۇسىنىلعان «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ جوباسى ازىرلەندى. كونستيتۋتسيالىق زاڭ جوباسى ايەلدەر، 29 تولماعان ادامدار جانە مۇگەدەك ادامدار ءۇشىن 30% كۆوتادان باسقا، ولاردى پارلامەنت ماجىلىسىندە دەپۋتاتتىق مانداتتاردى ءبولۋ كەزىندە ەسەپكە الۋ قاجەتتىلىگىن بەكىتۋدى كوزدەيدى»، دەدى ق. مۋسين.

«ۇسىنىلىپ وتىرعان كونستيتۋتسيالىق زاڭ جوباسى نىسانالى توپتارمەن ءارتۇرلى الاڭداردا قارالدى. جالپى العاندا، بۇل تۇزەتۋلەر ايەلدەردىڭ، جاستاردىڭ، ەرەكشە قاجەتتىلىكتەرى بار ادامداردىڭ ەلىمىزدىڭ زاڭ شىعارۋ ورگانىندا وكىلدىگىن كەڭەيتۋ ءۇشىن ماڭىزدى قادام بولىپ سانالاتىنىن اتاپ وتكەن ءجون. بۇل زاڭداردىڭ ساپاسىنا ءسوزسىز اسەر ەتەدى»، دەدى ادىلەت ءمينيسترى.

اتاپ ايتقاندا، زاڭ جوباسىنىڭ ەرەجەلەرىن رەتتەۋدىڭ ءمانى بيلىكتىڭ وكىلدى تارماعىندا دەپۋتاتتىق مانداتتاردى بولۋگە، سونداي-اق كۆوتالاناتىن ادامداردىڭ تىزبەسىنە بايلانىستى قوعامدىق قاتىناستار بولىپ سانالادى. ويتكەنى ايەلدەر مەن جاستاردان باسقا، مۇگەدەكتىگى بار ادامدار ءۇشىن دە مىندەتتى كۆوتا بەلگىلەۋ ۇسىنىلادى.



 

سوڭعى جاڭالىقتار

ۇقساس جاڭالىقتار