قوعام • 18 قاڭتار، 2022

بجزق 500 مىڭ ادامدى جارىلقادى

قازاقستاندىقتار زەينەتاقى قورىنداعى ارتىق اقشاسىن الۋدى بەلسەندى تۇردە جالعاستىرىپ جاتىر. قازىردىڭ وزىندە 500 مىڭعا جۋىق ازامات ءبىر رەتتىك زەينەتاقى تولەمىن السا، سونىڭ باسىم بولىگى شەكتى سومادان اساتىن قارجىنى تۇرعىن ءۇي جاعدايىن جاقسارتۋعا جۇمساپتى. وسى كۇنگە دەيىن قوردان 1،3 ترلن تەڭگە الىنعان.

اباي قازبەك ۇلى

ءبىر رەتتىك تولەمدى پايدالانۋ جارلىعى شىققالى بەرى 466 397 تۇرعىن زەينەتاقى قورىنان اقشا السا، سونىڭ 209 998-ءى قارجىنى يپوتەكاسىز ءۇي ساتىپ الۋعا جۇمساعان. تاعى 62 694 قازاقستاندىق «وتباسى بانكتەگى» جالپى سوماسى 152 ملرد تەڭگە بولاتىن زايمدارىن جاپقان. 39 مىڭ ادام وزگە ەكىنشى دەڭگەيلى بانكتەردەگى جالپى سوماسى 134 ملرد تەڭگە بولاتىن يپوتەكالىق قارىزدارىنان قۇتىلعان. 23 مىڭنان استام ازامات «وتباسى بانكىنەن» نەسيە رەسىمدەۋ ءۇشىن ءبىر رەتتىك تولەمدى العاشقى جارنا رەتىندە قۇيعان. ولاردىڭ 82 پايىزى ەكىنشى نارىقتان ءۇي الۋدى ءجون كورسە، 18 پايىزى پاتەردى قۇرىلىس سالۋشىلاردان تىكەلەي ساتىپ الدى. تولەمنىڭ تەك تۇرعىن ءۇي ءۇشىن پايدالانىلمايتىنى بەلگىلى. 89 480 ازامات 91 ملرد تەڭگەنى ەمدەۋ ماقساتىنا باعىتتاعان.

نەگىزىنەن نۇر-سۇلتان، الماتى قالالارى مەن ماڭعىستاۋ وبلىسىنىڭ حالقى زەينەتاقى قورىنداعى ارتىق قارجىمەن ءۇي ساتىپ الۋ بويىنشا كوش باستايدى. بۇل مۇمكىندىكتى ەڭ از پايدالانعان ولكە – سولتۇستىك قازاقستان وبلىسى. سونداي-اق 2021 جىلدىڭ 16 جەلتوقسانىنان بەرى ءبىر رەتتىك تولەمدى «وتباسى بانك» دەپوزيتىنە اۋدارۋ مۇمكىندىگى پايدا بولعان ەدى. بۇل مۇمكىندىكتى قازىرگە دەيىن 35 مىڭ ادام پايدالانىپ، 57 ملرد تەڭگە دەپوزيتتەردى تولىقتىرعان.

«زەينەتاقى قارجىسىمەن دەپوزيتتى تولتىرۋ مۇمكىندىگى – جاستاردى قولداۋعا باعىتتالعان تاماشا قۇرال. وسىلايشا، جۇمىس ىستەپ جۇرگەن جاستار باسپانا ءۇشىن تەزىرەك اقشا جيناي الادى. سوسىن جيناق شوتىنىڭ مەرزىمىن ەسەپكە الا وتىرىپ ءبىز ارقىلى جىلدىق 3،5-تەن 5 پايىزعا دەيىن تۇرعىن ءۇي زايمىن الا الادى. ءدال قازىرگى ساتتە بۇل تۇرعىن ءۇي جاعدايىن جاقسارتۋ ءۇشىن ەڭ قولجەتىمدى قۇرال بولىپ تۇر»، دەيدى «وتباسى بانك» باسقارما توراعاسى ءلاززات يبراگيموۆا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز