ءباا پرەمەر-ءمينيسترىنىڭ ورىنباسارى – پرەزيدەنت ىستەرى جونىندەگى ءمينيسترى شەيح مانسۋر بەن زايد ءال ناحايان ءا. سمايىلوۆتى قازاقستان رەسپۋبليكاسىنىڭ پرەمەر-ءمينيسترى لاۋازىمىنا تاعايىندالۋىمەن قۇتتىقتادى.
مانسۋر بەن زايد ءال ناحايان قاڭتار وقيعاسى كەزىندە قازا تاپقان قازاقستاندىقتاردىڭ وتباسىلارىنا كوڭىل ايتىپ, بارشا قازاقستان حالقىنا بەيبىتشىلىك پەن وركەندەۋ تىلەدى.
تاراپتار ستراتەگيالىق ارىپتەستىكتى ودان ءارى نىعايتۋعا ءازىر ەكەندىكتەرىن ءبىلدىردى.
2021 جىلدىڭ 11 ايىنىڭ قورىتىندىسى بويىنشا قر مەن ءباا اراسىنداعى ءوزارا ساۋدا كولەمى $673,7 ملن قۇرادى, بۇل 2020 جىلدىڭ سايكەس كەزەڭىندەگى كورسەتكىشتەن شامامەن 50%-عا ارتىق جانە 2019 جىلعى پاندەمياعا دەيىنگى دەڭگەيدەن ەداۋىر اسىپ ءتۇستى.
قازاقستاندا امىرلىكتەر كاپيتالىنىڭ قاتىسۋىمەن 300-گە جۋىق بىرلەسكەن كاسىپورىن جۇمىس ىستەيدى. قازاقستاننىڭ تاۋەلسىزدىك جىلدارىندا بىرىككەن اراب امىرلىكتەرىنىڭ قر ەكونوميكاسىنا تىكەلەي ينۆەستيتسيا كولەمى $2,4 ملرد قۇرادى, قر-نىڭ ءباا-عا سالعان ينۆەستيتسيا كولەمى $1 ملرد استى.
قازاقستان پرەمەر-ءمينيسترى ءاليحان سمايىلوۆ ءباا قر-نىڭ اراب الەمىندەگى ماڭىزدى ساۋدا-ەكونوميكالىق سەرىكتەسى ەكەنىن اتاپ ءوتتى.
بيىل قازاقستان مەن بىرىككەن اراب امىرلىكتەرى اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولادى.
