ءبىلىم • 17 قاڭتار، 2022

ماماندىقتارعا دا ءمان بەرگەن ءجون

مەملەكەت باسشىسى قاسىم-جومارت توقاەۆ پارلامەنت ءماجىلىسىنىڭ وتىرىسىندا جوعارى ءبىلىم ماسەلەسىنە ارنايى توقتالدى. ول ءوز سوزىندە جوعارى ءبىلىمنىڭ قولجەتىمدىلىگى كوكەيكەستى ماسەلە رەتىندە قالىپ وتىرعانىن، حالىق تىعىز قونىستانعان وڭىرلەردەگى جاستارعا ارنالعان ماقساتتى گرانتتار بولۋگە ايرىقشا نازار اۋدارۋ قاجەت ەكەنىن ايتتى.

Egemen Qazaqstan

جاقىندا ەلىمىزدە جەتەكشى شەتەلدىك جوعارى وقۋ ورىندارىنىڭ فيليالدارى اشىلا باستاعان بولاتىن. ەندى رەسەيدىڭ ۇزدىك تەحنيكالىق جوعارى وقۋ ورىندارىنىڭ فيليالدارىن اشۋ جوسپارلانىپ وتىر. بۇل بىزگە نە ءۇشىن كەرەك؟ جاڭا ەكونوميكا قۇرۋ ءۇشىن ۋنيۆەرسيتەتتەردىڭ باسەكەگە قابىلەتتىلىگىن ارتتىرۋ ماڭىزدى. ال پرەزيدەنت 2025 جىلعا قاراي ەلىمىزدە بەدەلدى شەتەلدىك جوعارى وقۋ ورىندارىنىڭ كەم دەگەندە 5 فيليالىن، ونىڭ ەكەۋىن تەحنيكالىق باعىتتا قازاقستاننىڭ باتىس وڭىرىندە اشۋدى تاپسىردى. نەگە؟ باتىس وبلىستارعا شەتەلدىك ينۆەستورلار جاڭا تەحنولوگيالاردى اكەلىپ جاتىر. ونىمەن ءبىزدىڭ جاستار جۇمىس ىستەي الماي جاتادى. ءتىپتى كەيبىر تەحنيكالاردىڭ ءتىلىن بىلەتىن ماماندار تاپشىلىعى بايقالادى. وتاندىق وقۋ ورىندارىنىڭ ونداي قۇرال-جابدىقتارى جوق. سوعان بايلانىستى شەتەلدىك بازاسى مىقتى قالىپتاسقان ۋنيۆەرسيتەت قازاقستاندا فيليالىن اشسا، جاستارعا جاڭا مۇمكىندىك تۋادى.

نەگىزىنەن فيليالىن اشاتىن ۋنيۆەرسيتەتتىڭ بەدەلىنە قاراعان دۇرىس. دەگەنمەن ونداعى ماماندىقتارعا دا ءمان بەرگەن ءجون. سەبەبى شەتەلدەن نەمەسە حالىقارالىق ۋنيۆەرسيتەتتەن سۇرانىستا جوق ماماندىقتى وقىپ الىپ، جۇمىسسىز جۇرگەن جاستار جەتەرلىك. سوندىقتان الدىمەن سول فيليال اشاتىن وڭىرگە قاجەتتى، قازىر تاپشى بولىپ تۇرعان ماماندىقتاردى زەردەلەۋ قاجەت. سودان سوڭ بارىپ سول ماماندىقتارعا قانداي شەتەلدىك ۋنيۆەرسيتەت دايارلايتىنىن ءبىلۋ كەرەك. مۇنىمەن ەندى ۋنيۆەرسيتەتتەر ءجىتى اينالىسقانى ابزال.

راحمان الشانوۆ،

جوعارى وقۋ ورىندارى

قاۋىمداستىعىنىڭ توراعاسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز