تاعايىنداۋ • 14 قاڭتار، 2022

ۇقك جامبىل وبلىسى بويىنشا دەپارتامەنتىنىڭ باسشىسى اۋىستى

123 رەت كورسەتىلدى

جامبىل وبلىسى بويىنشا ۇلتتىق قاۋىپسىزدىك كوميتەتى دەپارتامەنتىنىڭ باستىعى بولىپ نۇرلان كارىبجانوۆ تاعايىندالدى، دەپ حابارلايدى Egemen.kz.

وسى قىزمەتتى اتقارىپ كەلگەن مارات يرمەنوۆ الماتى قالاسىنىڭ ۇقك دەپارتامەنت باسشىسى بولىپ اۋىستى. بۇل تۋرالى وڭىرلىك جەدەل شتابتىڭ كەزەكتى وتىرىسىندا ايتىلدى.

ن.قالقامان ۇلى بۇعان دەيىن ۇقك-ءنىڭ ورتالىق اپپاراتىندا دەپارتامەنت باسشىسى لاۋازىمىن اتقارعان. سونداي-اق، ول 2011 – 2016 جىلدارى ۇقك جامبىل وبلىسى بويىنشا دەپارتامەنتىنىڭ باستىعى بولىپ ەڭبەك ەتكەن.

وبلىس اكىمى بەردىبەك ساپارباەۆ  جاڭا باسشىنى  تانىستىرىپ، ارتىلاتىن سەنىم مەن جۇكتەلگەن مىندەت جۇگى اۋىر ەكەنىن باسا ايتتى.

ايماق باسشىسى قازىرگى تاڭدا حالىق قاۋىپسىزدىگىن قامتاماسىز ەتۋ – ەڭ باستى ماسەلە ەكەنىن جەتكىزدى.

«مەملەكەت باسشىسىنىڭ تاپسىرماسىنا سايكەس وڭىردەگى تۇراقتىلىقتى، تۇرعىنداردىڭ قاۋىپسىزدىگىن، تىنىشتىعىن قامتاماسىز ەتۋ كەرەك.  ول ءۇشىن بارلىق جەرگىلىكتى اتقارۋشى، قۇقىق قورعاۋ ورگاندارى مەن كۇشتىك قۇرىلىمدار ءوزارا بىرلەسە جۇمىس ىستەگەنى ماڭىزدى.

حالىق ءوزىن قاۋىپسىز سەزىنىپ، ۇلكەندەر جۇمىسقا، بالالار ساباققا، بالاباقشاعا ەمىن-ەركىن بارۋى ءتيىس»، دەدى وبلىس اكىمى.

ب. ساپارباەۆ بۇعان دەيىنگى شتاب وتىرىسىندا بەرىلگەن تاپسىرمالاردىڭ ورىندالۋىن تەزدەتۋ قاجەتتىگىنە توقتالدى.

جاپپاي تارتىپسىزدىككە قاتىسۋشى ب ۇلىكشىلەردى، اراڭداتۋشىلار مەن  قارۋلى قىلمىسكەرلەردى انىقتاۋ، ۇستاۋ،  قولدى بولعان قارۋ-جاراقتاردى قايتارۋ بويىنشا اتقارىلىپ جاتقان جۇمىستار تۋرالى پوليتسيا دەپارتامەنتى باستىعىنىڭ مىندەتىن اتقارۋشى، وبلىس كومەندانتى باقىت راتاەۆ  باياندادى.

ول بۇگىنگە دەيىن 143 قارۋ-جاراق تابىلىپ، تاركىلەنگەنىن ايتتى.

باسقوسۋدا توتەنشە جاعداي رەجيمى جانە كومەندانتتىق ساعات تالاپتارىنىڭ ساقتالۋ بارىسى، وبلىس اۋماعىنداعى 31 بلوك-بەكەتتىڭ جۇمىسى جونىندە دە ەسەپ بەرىلدى.

سوڭعى جاڭالىقتار

ۇقساس جاڭالىقتار