ءبىر تاۋلىكتە تىركەلگەن ىندەت جۇقتىرۋ جاعدايىنىڭ 70%-عا جۋىعى ەلوردادا انىقتالعان. ناقتىراق ايتساق, 9 قاڭتاردا ەلوردادا 1 442 ادامنىڭ كوروناۆيرۋس جۇقتىرعانى انىقتالسا, ودان كەيىن شىمكەنت قالاسىندا 123 جاعداي تىركەلگەن. قالعان وڭىرلەردە تىركەلگەن جاعداي 100-گە جەتپەيدى. بۇل نۇر-سۇلتان قالاسىنداعى ەپيدەميالىق احۋالدىڭ تىم كۇردەلى بولىپ تۇرعانىن كورسەتەدى.
10 قاڭتارداعى ەپيدەميالىق احۋالدى باعالاۋ ماتريتساسى بويىنشا «قىزىل ايماقتا» تەك ەلوردا تۇر. ال «سارى ايماقتاعى» الماتى, شىمكەنت قالالارىنا ەندى اتىراۋ وبلىسى قوسىلدى. قالعان وڭىرلەر – «جاسىل ايماقتا».
بۇگىندە ەلىمىزدە 22 064 ادام كوروناۆيرۋس ينفەكتسياسىنان ەمدەلىپ جاتىر. ونىڭ ىشىندە 3 001 پاتسيەنت ستاتسيوناردا, 19 063 ناۋقاس امبۋلاتوريالىق دەڭگەيدە ەم قابىلداۋدا. ىندەتكە شالدىققانداردىڭ اراسىندا 186 ادامنىڭ جاعدايى اۋىر, 57 پاتسيەنتتىڭ جاعدايى وتە اۋىر, 38 ناۋقاس ءوجج اپپاراتىندا جاتىر.
Covid-19 تارالۋىنا جول بەرمەۋ جونىندەگى ۆاك ەلوردادا «وميكرون» شتامىنىڭ تارالۋىنا بايلانىستى قالاداعى ەپيدەميالىق احۋال كۇرت ناشارلاپ كەتكەنىن, وتكەن ەكى اپتادا ىندەتتىڭ كۇنىنە 80 جاعدايى تىركەلسە, كەيىنگى بەس كۇندە اۋرۋشاڭدىق دەڭگەيى 5,5 ەسەگە ارتىپ وتىرعانىن حابارلادى.
«بۇگىندە قالادا جاڭا جاعدايلاردى تىركەۋ سانى 1 442-گە جەتتى. قاڭتاردىڭ العاشقى 10 كۇنىندە بارلىعى 4 622 جاعداي تىركەلدى, بۇل وتكەن جەلتوقسان ايىنىڭ بارلىق كورسەتكىشىنەن 1,7 ەسەگە ارتىق ەكەنىن كورسەتىپ تۇر. وتكەن جىلدىڭ جەلتوقسان ايىنىڭ سوڭىندا جۇرگىزىلگەن مولەكۋليارلىق-گەنەتيكالىق زەرتتەۋلەردىڭ ناتيجەلەرى بويىنشا ءبىر سىنامادا كۆي-ءدىڭ ىرىكتەلگەن 25 وڭ سىناماسىنان «وميكرون» شتامى انىقتالدى. بۇل جاعداي 16 جەلتوقساندا شەتەلدەن كەلگەن قالا تۇرعىنىندا انىقتالدى. ول پتر تەستىنىڭ تەرىس ناتيجەسىمەن كەلدى, بىراق 22 جەلتوقساندا تاماق اۋرۋىمەن مەديتسينالىق كومەككە جۇگىندى, سودان كەيىن تەكسەرىلىپ, وڭ ماتەريالدى تەكسەرىسكە جىبەردىك. مۇنداي كۇرت ءوسۋدىڭ نەگىزگى سەبەپتەرىنىڭ ءبىرى – «وميكرون» شتامىنىڭ تارالۋى جانە ازاماتتاردىڭ قالا بويىنشا بەلسەندى قوزعالىسىمەن بايلانىستى, سونىمەن قاتار ساقتىق شارالارىن ەلەمەۋى, ماسكا تاعۋ رەجىمىن ساقتاماۋى, ادامدار كوپ جينالاتىن جەرلەرگە بارۋى. ەگەر سىزدە پتر تەستى وڭ بولسا نەمەسە ءسىز ناۋقاستارمەن تىعىز بايلانىستا بولساڭىز, وندا ءسىز ءۇي كارانتينىندە بولۋىڭىز كەرەك, ويتكەنى ءسىز باسقالارعا ۇلكەن قاۋىپ ءتوندىرۋشى ەكەنىڭىزدى ۇمىتپاۋدى سۇرايمىز», دەلىنگەن Covid-19 تارالۋىنا جول بەرمەۋ جونىندەگى ۆاك حابارلاماسىندا.
ەلوردالىق ينفەكتسيونيست دارىگەر ەلميرا ادىشەۆا «وميكرون» شتامىنىڭ بەلگىلەرى تۋرالى ايتىپ بەردى.
«كوروناۆيرۋستىڭ «وميكرون» شتامى دامۋدىڭ ەكىنشى ساتىسىنان ءوتىپ, بارىنشا جۇقپالى, بىراق از پاتوگەندىلىك دەڭگەيىنە جەتتى دەگەن پىكىر بار. «وميكرونعا» قاتىستى سۇراق ءالى كوپ. الايدا كەيبىر وعان ءتان سيمپتومدار بەلگىلى. جاڭا شتامعا ءتان ەرەكشەلىكتەردىڭ ءبىرى – ول كوروناۆيرۋستىڭ وسىعان دەيىن بەلگىلى بولعان شتامدارىنا قاراعاندا, ءدام مەن ءيىس سەزۋ جوعالمايدى. «وميكرونعا» ءتان سيمپتومدار – جالپى السىزدىك, تاماقتىڭ اشۋى, دەنە قىزۋىنىڭ كوتەرىلۋى, دەنەنىڭ قاقساپ اۋىرۋى مەن قۇرعاق جوتەل. ەگەر وسى بەلگىلەردى بايقاساڭىز, بىردەن دارىگەردىڭ كومەگىنە جۇگىنگەنىڭىز ءجون. وزدىگىڭىزدەن دياگنوز قويىپ, ەم قابىلداۋعا بولمايدى», دەدى ە.ادىشەۆا.
سونداي-اق ينفەكتسيونيست دارىگەر جاڭا شتامدى, سونىمەن قاتار كوروناۆيرۋستىڭ باسقا دا شتامدارىن جۇقتىرماۋعا پروفيلاكتيكالىق ءىس-شارالاردى ساقتاۋ مەن ۆاكتسينالاۋ عانا كومەكتەسەتىنىن العا تارتتى.
راسىندا, «وميكرون» شتامى ۋشىعىپ تۇرعان الەمنىڭ باسقا ەلدەرىندە كوروناۆيرۋستىڭ بۇل تۇرىنە شالدىققانداردىڭ دەنى ۆاكتسينا سالدىرماعانى ايتىلىپ جاتىر. سوندىقتان ۆاكتسينالاۋعا سامارقاۋ قاراۋعا بولمايدى. 10 قاڭتارداعى مالىمەت بويىنشا قازاقستاندا ءبىرىنشى كومپونەنتپەن 9 014 952 ادام, ەكىنشى كومپونەنتپەن 8 551 099 ادام ۆاكتسينا سالدىردى.
