باس پروكۋرور قاسىم-جومارت توقاەۆقا توتەنشە جاعداي رەجيمىن بۇزعان 2161 ادامنىڭ اكىمشىلىك جاۋاپكەرشىلىككە تارتىلعانى تۋرالى مالىمەت بەردى. ونىڭ ايتۋىنشا, لاڭكەستىككە قارسى ءىس-قيمىلدار باستالعان كۇننەن باستاپ ەلىمىزدە 412 قىلمىستىق ءىس, سونىڭ ىشىندە تەررورلىق اكتىلەر مەن كىسى ءولتىرۋ بويىنشا سوتقا دەيىنگى تەرگەۋ امالدارى باستالعان. پروكۋراتۋرا ورگاندارى باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ, سۇيىتىلعان گاز وندىرەتىن سۋبەكتىلەردىڭ باعا بويىنشا ىمىرالاسۋ دەرەكتەرىن تەكسەرۋدى جالعاستىرىپ جاتىر.
ىشكى ىستەر مينيسترلىگى تاراپىنان پرەزيدەنتكە الماتى قالاسىندا, الماتى, جامبىل, قىزىلوردا جانە باسقا دا وبلىستاردا تەرروريستىك توپتاردى جويۋ مەن قىلمىسكەرلەردى ۇستاۋ بويىنشا ارنايى وپەراتسيانى جالعاستىرۋ تۋرالى ەسەپ بەرىلدى. كىسى ءولتىرۋ, بيلىك وكىلدەرىنە قاتىستى زورلىق-زومبىلىق, بۇزاقىلىق, مەملەكەتتىك ورگانداردىڭ عيماراتتارىنا شابۋىل جاساۋ فاكتىلەرى بويىنشا بارلىعى 388 قىلمىستىق ءىس قوزعالدى. دالەلدەمەلەر بازاسىن جيناۋ جانە تىركەۋ, وقيعالار حرونولوگياسىن قالپىنا كەلتىرۋ بويىنشا جەدەل ءىس-شارالار جۇرگىزىلىپ جاتقانى ايتىلدى.
قارۋلى كۇشتەر تەرروريزمگە قارسى وپەراتسيانى جۇرگىزۋدە ۇقك مەن ءىىم-گە كومەك كورسەتىپ جاتىر. وتكەن تاۋلىكتە 11 ەلدى مەكەندەگى بلوكبەكەتتەردە اسكەري قىزمەتشىلەر 38 ادامدى ۇستادى. ولاردىڭ 23-ىنەن اتىس جانە سۋىق قارۋلار تابىلدى. ۇقك شەكارا قىزمەتىمەن بىرلەسىپ, اسكەري اۆياتسيانىڭ قولداۋىمەن تاۋلى جەرلەردە بارلاۋ-ىزدەستىرۋ ءىس-قيمىلدارى جۇرگىزىلۋدە. اسكەري قىزمەتشىلەردىڭ جۇمىسى 25 ەلدى مەكەندەگى 105 بلوكبەكەتتە جالعاسىپ جاتىر.
ۇلتتىق قاۋىپسىزدىك كوميتەتىنىڭ مالىمەتىنە قاراعاندا ەلىمىزدەگى جاعداي تۇراقتالىپ كەلەدى. اسا قاۋىپتى دەسترۋكتيۆتى ءىس-قيمىل تىركەلگەن جوق. «كيبەرششيت» جۇيەسى شتاتتىق رەجيمدە جۇمىس ىستەپ تۇر.
جيىن سوڭىندا پرەزيدەنت قوعامدىق ءتارتىپ پەن ەلدەگى قاۋىپسىزدىكتى قالپىنا كەلتىرۋدى قارقىندى جالعاستىرۋدى تاپسىردى.
