«پرەزيدەنتتىڭ شەشىمدەرى مەن ۇندەۋلەرى بويىنشا بلوگوسفەرادا ءارتۇرلى سيپاتتاعى تۇسىندىرمەلەر كوبەيىپ كەتكەنى راس. وسىعان بايلانىستى ارنايى مالىمدەمە جاساۋ قاجەت دەپ سانادىم. سەبەبى قاسىم-جومارت توقاەۆ مەملەكەتىمىزدەگى ەڭ جوعارعى لاۋازىمدى تۇلعا جانە قاۋىپسىزدىك كەڭەسىنىڭ توراعاسى. سوندىقتان مەملەكەت باسشىسى دەربەس شەشىم قابىلدايدى. كونستيتۋتسيالىق قۇرىلىمعا نۇقسان كەلتىرۋدى كوزدەگەن سودىرلاردىڭ قازاقستانعا شابۋىل جاساعان قايعىلى كۇندەردە دە سونداي شەشىمدەر قابىلداعان. قاسىم-جومارت كەمەل ۇلى وتانداستارىمىزعا ارناعان ءوزىنىڭ ۇندەۋلەرىن كەڭەسشىلەرىنىڭ كومەگىنسىز, ادەتتەگىدەي ءوزى جازدى. باستان-اياق ءوزى رەداكتسيالادى. وسى ءساتتى پايدالانا وتىرىپ, تاعى دا ايتقىم كەلەدى, مەملەكەت باسشىسىنىڭ جۇمىسى تۋرالى اقپاراتتى تاراتىپ, تۇسىندىرۋگە پرەزيدەنتتىڭ ءباسپاسوز حاتشىسىنان باسقا ەشكىمنىڭ قاتىسى جوق. ياعني, مەن عانا بۇل تۋرالى ناقتى, رەسمي اقپارات تاراتا الامىن», دەدى بەرىك ءۋالي «حابار 24» تەلەارناسىنىڭ ەفيرىندە.
سونداي-اق ول پرەزيدەنتتىڭ بارشا جۇمىستى اقوردادا اتقارىپ وتىرعانىن اتاپ ءوتتى.
«پرەزيدەنتىمىز قاسىم-جومارت كەمەل ۇلى توقاەۆ ماڭعىستاۋدا باستالىپ, 4 قاڭتاردا اۋقىمى كەڭەيىپ, سوڭى تەررورلىق شابۋىلعا ۇلاسىپ كەتكەن ساتتەن باستاپ, وسى وقيعالاردىڭ ءبارىن اقوردادان قاداعالاپ, جۇمىس ىستەپ وتىر. مەملەكەت باسشىسىنىڭ كۇنى-ءتۇنى «نون-ستوپ» رەجيمىندە جۇمىس ىستەپ, ەلدەگى جاعدايدى تولىق باقىلاۋدا ۇستاپ وتىر دەپ ايتۋعا بولادى. ونى وزدەرىڭىز دە كورىپ, ءبىلىپ وتىرسىزدار», دەدى پرەزيدەنتتىڭ ءباسپاسوز حاتشىسى.
