«قالادا ءتارتىپ ورناتۋ ماقساتىندا تەرروريزمگە قارسى ارنايى وپەراتسيا باستالدى. اۋەجاي بوساتىلدى. شتاتتىق جۇمىس رەجيمىنە اۋىستىرىلادى», دەدى باباقۇماروۆ.
الماتى كومەنداتۋراسىنىڭ اقپارات ورتالىعى مالىمەتىنشە, تارتىپسىزدىكتەردى جاقتاۋشىلار قالاعا زالال كەلتىرىپ, قۇقىق قورعاۋ ورگاندارىنىڭ ءتارتىپ ورناتۋ جانە قاۋىپسىزدىكتى قامتاماسىز ەتۋ جونىندەگى زاڭدى ارەكەتتەرىنە قارسىلىق كورسەتكەن.
«ەكسترەميستەر نىسانداردى توناپ, كاسىپورىندارعا زيان كەلتىردى. سونىمەن قاتار, بەيبىت تۇرعىنداردىڭ ءومىرى مەن دەنساۋلىعىنا قاۋىپ ءتوندىرىپ, مەديتسينا قىزمەتكەرلەرى جۇمىسىنا كەدەرگى كەلتىرىپ, ەمحانالار مەن اۋرۋحانالاردى ءبۇلدىردى. الماتىداعى قىلمىستىق توپتاردىڭ جوعارى دەڭگەيدە ۇيىمداستىرىلۋى شەتەلدە شىنداپ دايىندىقتان وتكەنىن ايعاقتايدى. ولاردىڭ قازاقستانعا شابۋىلى - باسقىنشىلىق ارەكەت, مەملەكەتتىڭ تۇتاستىعىنا نۇقسان كەلتىرۋ ارەكەتى», دەلىنگەن حابارلامادا.
كومەنداتۋرا ۇقشۇ-نىڭ كومەگى مەملەكەتتى سىرتقى قاۋىپتەردەن قورعاۋعا قاجەت شارا ەكەنىن ايتتى.
«بىرگە ءال-اۋقاتىمىز بەن بولاشاعىمىزعا قاۋىپ توندىرەتىن لاڭكەستىك پەن قىلمىستىق اكتىلەردى توقتاتا الامىز. ءبىز تۇرعىنداردى سابىرعا شاقىرىپ, كونستيتۋتسيالىق قۇرىلىس پەن قوعامدىق قاۋىپسىزدىكتى ورناتۋدا قۇقىق قورعاۋ ورگاندارىنا كومەكتەسۋگە شاقىرامىز», دەلىنگەن حابارلامادا.
