جەرلەستەرىمىز جىلدىڭ ءبىرىنشى ماتچىندا قارسىلاس قاقپاسىنا جەتى شايبا سوعىپ, «بارىس ارەناعا» جينالعان جەتى مىڭعا جۋىق جانكۇيەردى شاتتىققا بولەدى. بۇل – ەلوردا كلۋبىنىڭ وسى ماۋسىمدا جەتى گول سوققان ەكىنشى ماتچى بولدى. بۇعان دەيىن جەرلەستەرىمىز قىتايدىڭ «كۋنلۋن رەد ستار» ۇجىمىن 7:4 ەسەبىمەن قاپى قالدىرعان ەدى.
گولدار شوۋىنا اينالعان ويىننىڭ ەسەبىن رومان ستارچەنكو اشتى. ءبىرىنشى كەزەڭنىڭ اياقتالۋىنا ءۇش مينۋت قالعاندا ستارچەنكو قاقپاشىمەن بەتپە-بەت شىعىپ, مەرگەندىك تانىتتى. ال ەكىنشى كەزەڭدە انتون ساگادەەۆ دالدىك تانىتسا, كەزەڭ اياقتالار تۇستا ستارچەنكو ءدۋبلدىڭ اۆتورى اتاندى. ال ءۇشىنشى 20 مينۋتتا «بارىس» ويىنشىلارى «دينامونىڭ» قاقپاسىنا جاۋاپسىز ءتورت گول سوقتى. بۇل كەزەڭدە ياكوب بەرگلۋند پەن رومان ساۆچەنكو ءبىر-ءبىر شايبا سالسا, نيكيتا ميحايليس دۋبل جاسادى. ال قوناقتاردان جۇبانىش گولىن مارتينش كارسۋمس سوقتى. قورىتىندى ەسەپ – 7:1.
يۋري ميحايليس شاكىرتتەرى كەلەسى ماتچىن بۇگىن ءوز ايدىنىندا ماگنيتوگورسكىنىڭ «مەتاللۋرگىمەن» وتكىزەدى. قازىرگى تاڭدا «بارىس» «شىعىس» كونفەرەنتسياسىنىڭ تۋرنير كەستەسىندە 44 ۇپايمەن 8-ورىندا كەلەدى.
