سوڭعى جىلدارى ەل ىشىندە ىزگىلىك شاراپاتى مول «ەل ۇلەسى – پاتەرگە» باستاماسى قىرۋار جۇمىس تىندىرۋدا. تىرشىلىك بولعان سوڭ ايتىپ كەلمەيتىن اپاتتىڭ ورىن الاتىنى دا بار. مىنە, وسىنداي ساتتە قيىندىق قۇرساۋىندا قالعان ادامدار ىزگى قوعامنىڭ ىزەتتى ىسىمەن كوڭىل جادىراتسا, دەمەۋ كورسە, جان جاراسى جازىلا تۇسەر ەدى.
شورتاندىداعى جارىلىستان سوڭ قاپيادا قايعى شەككەن ازاماتقا قارجىلاي كومەك بەرۋشىلەر وتە كوپ بولدى. بۇل جاي ءبىزدىڭ قوعامنىڭ جاناشىرلىعىن, باۋىرمالدىعىن كورسەتەدى.
– وڭىردە جيىرماعا جۋىق وتباسى وسى باستاما اياسىندا قولعا الىنعان جۇمىستىڭ ناتيجەسىندە باسپانالى بولدى, – دەيدى وبلىستىڭ باس يمامى قۋانىش قاجى جۇماباي ۇلى, – ءبىز شورتاندىداعى شەتىن وقيعا تۋرالى ەستىگەن كەزدە قاتتى ۋايىمدادىق. «تاس تۇسكەن جەرىنە اۋىر» دەمەكشى, ويلاماعان جەردەن ورىن العان وقىس وقيعانىڭ سونشالىقتى ءزىلماۋىر ەكەندىگىن جان جۇرەگىمىزبەن سەزىندىك. ىلە قاراجات جيناپ, كومەكتەسۋ تۋرالى باستاما كوتەردىك. حالىققا راحمەت, از ۋاقىتتىڭ ىشىندە 14 ملن-نان استام اقشا جينالدى. كومەك قولىن سوزعاندار اراسىندا ەل اقساقالدارى مەن جاستار دا بار.
يگى شارانىڭ تاعى ءبىر ءتيىمدى تۇسى – وسكەلەڭ ۇرپاققا ومىرشەڭ ونەگە بولاتىندىعىندا. ىلكى زاماننان بەرى ءبىر-بىرىنە قولۇشىن بەرۋدى پارىز ساناعان پاراساتتى قاۋىمنىڭ وسىنداي وردالى ىسىنەن ۇلگى الىپ وسسە, بىرلىكتىڭ تامىرى بەكەم بولا تۇسەتىنى تاعى بار.
اقمولا وبلىسى
