جۇمىر جەردىڭ ءتورت تارابىن مەكەن ەتكەن جاھان جۇرتىنىڭ ءبىر بولشەگى – قازاق قوعامى دانالىقتىڭ ءدانىن جاس بۋىننىڭ ساناسىنا سەبۋدى كوزدەگەن ابايدىڭ ارمانىن ءالى دە تولىق تۇسىنبەي كەلەدى. ادامدىق ايناسىنا قىلاۋداي داق تۇسىرمەۋدى ويلاعان ءار پەندە دارا دانىشپان مەڭزەگەن تولىق ادام دەڭگەيىنە جەتۋ ءۇشىن «تالاپ, ەڭبەك, تەرەڭ وي, قاناعات, راقىم, ويلاپ قوي» دەپ انىق ايتىلعان بەس اسىل ءىستى تۋرا جولدان اداستىرمايتىن تەمىرقازىقتاي قاعيداسىنا بالاعانى ءجون ەدى. ءدال قازىر وسى قاعيدا, اسىرەسە قازاق قوعامىنا اۋاداي قاجەت-اق.
تەگىندە «ىستىق قايرات, نۇرلى اقىل, جىلى جۇرەك» دەپ ەستى ادام ەسىندە ۇستار ءۇش-اق قاسيەتتى دالدىكپەن انىقتاپ بەرگەن ۇلى ابايدىڭ ەسىمىن ۇلىقتاپ, رۋحىن اسقاقتاتار قۇرمەتكە شەكتەۋ بولماۋى كەرەك. ويتكەنى دارا دانىشپاننىڭ ەڭسەلى ەسكەرتكىشى ءار اۋىلدا, ءار قالادا بوي كوتەرىپ, ەسىمى جاس بۋىن ءبىلىم الاتىن مەكتەپتەر مەن ورتالىقتارعا بەرىلسە, جاراسىپ-اق تۇرماي ما؟ ماسەلەن, اتىراۋ وبلىسىندا اباي قۇنانباي ۇلىنىڭ ەسىمىمەن اتالاتىن 5 مەكتەپ پەن 28 كوشە بار. بىلتىر ويشىلدىڭ ەسىمى جاڭادان بوي كوتەرگەن وقۋشىلار مەن جاستار سارايىنا بەرىلىپ, نىسان اتاۋى اباي ورتالىعى بولىپ وزگەرتىلدى.
قازىر بۇل ورتالىقتا 30 باعىتتى قامتيتىن 100-گە جۋىق ۇيىرمە اشىلعان. ۇيىرمەلەردە 800-گە جۋىق وقۋشى ونەر, شىعارماشىلىق, تەحنولوگيا, كوركەم-ەستەتيكا, سپورت, اسكەري-پاتريوتتىق, ەكولوگيا-بيولوگيا باعىتىندا قوسىمشا ءبىلىم الادى. ەندى, مىنە, ابايدىڭ ەڭسەلى ەسكەرتكىشى ۇلى اقىننىڭ اتى بەرىلگەن ورتالىقتىڭ الدىنا قويىلدى. بيىكتىگى 11 مەتردى قۇرايتىن ەسكەرتكىشتى ءمۇسىنشى اسقار نارتوۆ قولادان قۇيعان.
دانالىقتىڭ بيىك شىڭىنا شىققان ۇلى ابايدىڭ بۇل ەسكەرتكىشى «وسەك, وتىرىك, ماقتانشاق, ەرىنشەك, بەكەر مال شاشپاق» دەيتىن بەس دۇشپاننان كەم تۇسپەس تەرىس ارەكەتتەن ارىلماي جۇرگەندەردى ويلاندىرا الا ما؟..
اتىراۋ وبلىسى
