ۇلتتىق كوميسسيا ءتورايىمى اتاپ وتكەندەي, بيىلعى باستى جەتىستىك - قازاقستاندا وتباسى ينستيتۋتىن نىعايتۋ تۋرالى جاڭا زاڭ جوباسىنىڭ ازىرلەنۋى.
«بارلىق مينيسترلىكپەن كەڭەس ءوتتى. بارلىق وڭىردە كەزدەسۋلەر ءوتىپ, تالقىلاۋ جۇرگىزىلدى. جەرگىلىكتى اتقارۋشى ورگانداردىڭ, ساراپشىلار مەن زاڭگەرلەردىڭ, قوعام بەلسەندىلەرىنىڭ پىكىرلەرىن بىلدىك. وسى جۇمىستىڭ ناتيجەسىندە تۇرمىستىق زورلىق-زومبىلىقتىڭ الدىن الۋعا قاتىستى, وتباسىن قولداۋعا قاتىستى نورمالار ەنگىزىلگەن قۇجات دايىندالدى», دەدى ءلاززات رامازانوۆا.
سونداي-اق ەلىمىزدىڭ ءار وڭىرىندە وتباسىن قولداۋ ورتالىقتارى اشىلاتىنىن مالىمدەدى. ۇلتتىق كوميسسيا ءوز تاراپىنان وسى ورتالىقتاردىڭ جۇمىس ىستەۋ قاعيدالارىن, سونىمەن قاتار مەملەكەتتىك ورگانداردىڭ ۆەدومستۆو ارالىق ءوزارا جۇمىسىنىڭ رەگلامەنتىن ازىرلەگەن. ۇلتتىق كوميسسيا ءتورايىمىنىڭ ايتۋىنشا, ەندى اكىمدىكتەردىڭ جۇمىسىن باعالاۋدا «ايەلدەرگە قاتىستى تىركەلگەن تۇرمىستىق زورلىق-زومبىلىق وقيعالارىنىڭ سانى» كورسەتكىشى ەسكەرىلەتىن بولادى. بۇل ينديكاتور جەرگىلىكتى اتقارۋشى ورگانداردىڭ جۇمىسىن باعالاۋعا (KPI) ءبىرىنشى رەت قوسىلىپ وتىر.
«2030 جىلعا دەيىنگى وتباسىلىق جانە گەندەرلىك ساياسات جونىندەگى تۇجىرىمدامانى ىسكە اسىرۋ مەن جەتىلدىرۋ جۇمىسى جالعاسىن تاپتى. دەپۋتاتتىق مانداتتاردى ءبولۋ بارىسىندا ايەلدەر مەن جاستارعا 30 % كۆوتا ۇسىنۋ, سونداي-اق جالعىزباستى اتا-انالار ءۇشىن قاشىقتان جۇمىس ۇسىنۋ فورماتىن زاڭداستىرۋ تۋرالى مەملەكەت باسشىسى تاپسىرماسىن بەردى», دەپ اتاپ ءوتتى ءلاززات رامازانوۆا.
بيىل ايەلدەر كاسىپكەرلىگىن دامىتۋعا ارنالعان العاشقى ورتالىقتار ءوز جۇمىسىن باستادى. بۇل ۇلتتىق كوميسسيا, «اتامەكەن» ۇكپ جانە ۇلتتىق ەكونوميكا مينيسترلىگى بىرلەسىپ اشقان جوبا. وسى ورتالىقتاردا قالا مەن اۋىلداعى قىز-كەلىنشەكتەرگە جەكە كاسىپ اشۋعا قاجەتتى كەڭەستەر بەرىلىپ, ناقتى بيزنەس ءتۇرىن جولعا قويۋ تۋراسىندا كەشەندى كومەك ۇسىنىلماق.
ء«بىر اۋىل – ءبىر ءونىم» اتتى جاڭا جوبانى ىسكە اسىرۋعا قاجەتتى نورماتيۆتىك بازا ازىرلەندى. بۇل ءار ءوڭىردىڭ ەرەكشەلىگىن ەسكە وتىرىپ, كووپەراتسيا قۇرۋ ارقىلى اۋىل تۇرعىندارىن بىرەگەي ءونىم شىعارۋ ىسىنە جۇمىلدىرۋعا سەپتىگىن تيگىزەر جوبا بولماق», دەدى ءلاززات رامازانوۆا.
سونىمەن قاتار ۇلتتىق كوميسسيا ءتورايىمى ەلىمىز كورشىلەس ەلدەر اراسىندا ءبىرىنشى بولىپ ايەلدەردىڭ ەڭبەك ەتۋ اياسىن شەكتەيتىن جۇمىس تۇرلەرى ءتىزىمىن الىپ تاستاعانىن اتاپ ءوتتى. بۇل جەتىستىك قىز-كەلىنشەكتەردىڭ قۇقىقتارى مەن مۇمكىندىكتەرىن ساقتاۋ تۋراسىنداعى حالىقارالىق قاعيدالاردى ۇستاناتىن ەلگە ءتان كورسەتكىش ەكەنىن اتاپ ءوتتى.
ونىمەن قوسا, بەيبىتشىلىك پەن قاۋىپسىزدىكتى قامتاماسىز ەتۋ, قاقتىعىستاردىڭ الدىن الۋ جانە ولاردى رەتتەۋگە ايەلدەردىڭ قاتىسۋ قۇقىعى بويىنشا بۇۇ قاۋىپسىزدىك كەڭەسىنىڭ بىرقاتار رەزوليۋتسياسىن ىسكە اسىرۋ جونىندە بيىل ەل ۇكىمەتىنىڭ ءتيىستى قاۋلى قابىلداۋى دا باستى جەتىستىك قاتارىندا.
«وتباسىلىق جانە گەندەرلىك ساياسات سالاسىنداعى سوڭعى جىلداردا ىسكە اسىرىلعان بارلىق جوبانى بىرىڭعاي «ەلەكتروندىق كىتاپحاناعا» بىرىكتىردىك. بۇل ورتالىق ازيا ەلدەرىنە ارنالعان وڭىرلىك ۆيرتۋالدى پلاتفورما قۇرۋ جونىندە ۇلتتىق كوميسسيا كوتەرگەن باستامانى جۇزەگە اسىرۋدا بىردەن-ءبىر العىشارت بولماق. جاقىن ارادا «ەلەكتروندىق كىتاپحانا» كەڭ قولدانىسقا بەرىلەتىن بولادى. بۇل جوبا مەملەكەتتىك ورگاندار مەن قوعامدىق ۇيىمداردىڭ جۇمىسىن ەداۋىر جەڭىلدەتپەك. وسىلايشا, ءار ازامات وتباسى جانە ايەلدەردى قولداۋعا باعىتتالعان بارلىق جوبانىڭ ماقساتىن ءبىلىپ, جوبالاردىڭ قالايشا ورىندالىپ جاتقانىنان حاباردار بولىپ وتىرادى», دەپ مالىمدەدى ءلاززات رامازانوۆا.
سونداي-اق بيىلعى باستى جەتىستىكتىڭ قاتارىندا «گەندەرلىك زورلىق-زومبىلىققا قارسى كۇرەس» جانە «ەكونوميكالىق ادىلەتتىلىك جانە ايەلدەردىڭ قۇقىعى» اتتى حالىقارالىق ەكى كواليتسياعا ەلىمىزدىڭ قوسىلۋى دا اتالعان. بۇل ەكى كواليتسيا مەملەكەت باسشىسىنىڭ قاتىسۋىمەن پاريجدە وتكەن «تەڭ قۇقىلى ۇرپاق» اتتى فورۋم اياسىندا باستاۋ العان.
«مۇنداي كواليتسيالارعا قاتىسۋدىڭ ءوزى ۇلكەن مىندەت-تالاپتاردى جۇكتەيدى. جانە دە كواليتسيا قويعان مىندەتتى شارالار مەملەكەتتىك دەڭگەيدە اتقارىلۋى ءتيىس. ءبىر سوزبەن ايتقاندا, بۇل - قوعامدا ايەلدەردىڭ قۇقىعى مەن ءرولىن نىعايتۋعا جاسالعان كەزەكتى ماڭىزدى قادام», دەدى ءلاززات رامازانوۆا.
