سەناتوردىڭ ايتۋىنشا, «مامانيا» - جەتىسۋ وڭىرىندەگى العاشقى ءبىلىم بەرۋ ورتالىقتارىنىڭ ءبىرى. مەكتەپ-مەدرەسە سوناۋ 1899 جىلى اشىلعان, بۇگىنگى تاڭدا ونىڭ تەك ىرگەسى عانا قالعان. باقىتجان جۇماعۇلوۆ وسىنداي قۇندى تاريحي ەسكەرتكىشتى قالپىنا كەلتىرۋ وسكەلەڭ ۇرپاقتىڭ بويىندا پاتريوتتىق سەزىمدى دامىتۋ ءۇشىن ماڭىزدى دەپ سانايدى.
«مامانيا مەكتەپ مەدرەسەسىن قايتا قالپىنا كەلتىرىپ, مەموريالدىق ۇيگە, ءارى تاريحي ەتنوگرافيالىق مۋزەيگە اينالدىرعان ءجون. سونىمەن قاتار جاقسىنىڭ تۇياعى بولعان بۇكىل مامان ۇرپاقتارىنا, سول جەردەن ءبىلىمنىڭ ءنارىن الىپ, وقىعان ۇلتىمىزدىڭ ۇلى تۇلعالارىنا ارنالعان شاكىرتتەر اللەياسىن جاساۋدى ۇسىنامىن. بۇل رەتتە, «مامانيا» مەكتەبىن قايتا قالپىنا كەلتىرۋ جاستاردى پاتريوتيزمگە, ۇلتتىق رۋحانياتتى سۇيۋگە ىقپال ەتەتىن يگى ءىس بولادى دەپ ويلايمىن», دەپ اتاپ ءوتتى باقىتجان جۇماعۇلوۆ.
