«بۇگىن سەناتتىڭ وسى جىلداعى قورىتىندى وتىرىسىن وتكىزدىك. 2021 جىل ەلىمىز ءۇشىن ەرەكشە جىل بولدى. قاستەرلى تاۋەلسىزدگىمىزدىڭ 30 جىلدىعى اتاپ وتتىك. پارلامەنت ۇكىمەتپەن بىرلەسىپ پرەزيدەنت جولداۋى مەن تاپسىرمالارىن ىسكە اسىرۋدى زاڭنامالىق تۇرعىدان قامتاماسىز ەتۋدە. سونىڭ ناتيجەسنىدە بيىل پارلامەنت 104 زاڭ قابىلدادى. قابىلدانعان زاڭدار ەلىمىزدىڭ ساياسي, الەۋمەتتىك-ەكونوميكالىق ورنىقتى دامۋىن كوزدەيدى», دەگەن ماۋلەن اشىمباەۆ پرەزيدەنت تاپسىرماسى بويىنشا قابىلدانعان بىرقاتار ماڭىزدى زاڭدارعا توقتالدى.
ولاردىڭ قاتارىندا جەر قاتىناستارى ماسەلەلەرىن, مەملەكەتتىك جانە جەرگىلىكتى باسقارۋ جۇيەسىن رەتتەۋگە, ءولىم جازاسىنان باس تارتۋعا, قۇقىق قورعاۋ ورگاندارىن رەفورمالاۋعا, ەلدەگى بيزنەس ورتانى جاقسارتۋعا, وتاندىق ونەركاسىپتى جەتىلدىرۋگە ارنالعان زاڭدار جانە تاعى باسقا نورمالار بار. سەنات توراعاسى دەپۋتاتتاردىڭ زاڭ شىعارۋعا باستاماشى بولۋدا جۇمىس ىستەگەنىن اتادى.
«جىل وتكەن سايىن بۇل جۇمىستىڭ سانى دا, ساپاسى دا ارتىپ كەلەدى. بيىل قابىلدانعان ءار ءتورتىنشى زاڭعا پارلامەنت دەپۋتاتتارى باستاماشى بولدى. ولاردىڭ قاتارىندا ەلىمىزدىڭ سوت جۇيەسىن ودان ءارى رەفورمالاۋعا, ازاماتتىق پروتسەستى جەڭىلدەتۋگە, تاتۋلاستىرۋ راسىمدەرىن قولدانۋ سالاسىن كەڭەيتۋگە, جەكە تۇلعانىڭ جالعىز باسپاناسىن كەپىل رەتىندە قابىلداۋعا شەكتەۋ قويۋعا جانە باسقا دا ماسەلەلەردى رەتتەۋگە باعىتتالعان ماڭىزدى زاڭدار بار. پرەزيدەنتتىڭ تاپسىرماسى بويىنشا دەپۋتاتتاردىڭ باستاماشى بولۋىمەن ازىرلەنگەن زاڭداردىڭ قاتارىندا «ادام قۇقىقتارى جونىندەگى ۋاكىل» تۋرالى زاڭ دا بار», دەدى ماۋلەن اشىمباەۆ.
سونداي-اق, ول 2021 جىلى سەناتورلار زاڭ شىعارۋمەن قاتار باسقا دا باعىتتار بويىنشا تابىستى جۇمىس ىستەگەنىن ايتىپ, وڭىرلەردەگى ماسەلەلەردى شەشۋ, كاسىپكەرلىكتى دامىتۋ جانە ۇلتتىق قۇندىلىقتاردى دارىپتەۋ باعىتتارى سەنات وكىلدەرىنىڭ ۇنەمى نازارىندا بولعانىن ەسكە سالدى.
«بيىل ءبىز زاڭ شىعارۋمەن قاتار پارلامەنتتىك قىزمەتىمىزدىڭ وزگە دە باعىتتارى بويىنشا مازمۇندى ءارى ناتيجەلى جۇمىس ىستەدىك. سەناتورلار ماڭىزدى تاقىرىپتار بويىنشا مەملەكەتتىك ورگاندارعا 100-گە جۋىق دەپۋتاتتىق ساۋال جولدادى. سەنات قابىرعاسىندا قوعامدى الاڭداتقان وزەكتى ماسەلەلەرگە ارنالعان 80-نەن استام ءىس-شارا وتكىزىلدى», دەپ تۇيىندەدى سەنات توراعاسى.
