اقش-تىڭ فلوريدا شتاتىنىڭ پلانت-سيتي قالاسىندا ۇيىمداستىرىلاتىن بوكس كەشىندە قازاقستاندىق بىلعارى قولعاپ شەبەرى قانات يسلام ۇلىبريتانيالىق دجيممي كەلليگە قارسى شارشى الاڭعا كوتەرىلەتىن بولدى. كەللي شارشى الاڭعا 27 مارتە شىعىپ, 25 كەزدەسۋدە قارسىلاستارىنان ايلاسىن اسىرسا, ەكى كەزدەسۋدە ەسە جىبەرگەن.
جالپى دجيممي كەلليدى بوكسشىلاردىڭ تىلىمەن ايتقاندا «قاتارداعى قاپشىق» دەۋگە ابدەن بولادى. راس, رەكوردى ءبىر قاراعاندا جامان ەمەس. الايدا ول 27 كەزدەسۋىنىڭ ۇشەۋىندە ەكى جۇلدىزدى بوكسشىمەن قولعاپ تۇيىستىرسە, ءبىر مارتە ءۇش جۇلدىزدى بوكسشىعا قارسى شارشى الاڭعا كوتەرىلگەن.
كاسىپقوي بوكستا ەڭ مىقتى قارسىلاستى boxrec.com سايتى بەس جۇلدىزبەن باعالايدى. سونىمەن قانات يسلامنىڭ بولاشاق قارسىلاسى وتراڭقول بوكسشىلاردان كىمدەرمەن كەزدەستى؟ ءيا, ونىڭ كاسىبي مانسابىنداعى ەڭ مىقتى قارسىلاسى – ۇلىبريتانيالىق ليام سميت. الايدا دجيممي اتى اتالعان بوكسشىدان تەحنيكالىق نوكاۋتپەن ۇتىلعان. ودان بولەك دجيممي ەكى جۇلدىزدى ءۇش بوكسشىمەن قولعاپ تۇيىستىرگەنىن ايتتىق قوي. ولارعا قارسى ستاتيستيكاسى قانداي؟
دجيممي دەنيس حوگانعا قارسى جەكپە-جەكتە دە تۇك ماندىتقان جوق. قارسىلاسىنا تورەشىلەردىڭ بىرجاقتى شەشىمىمەن ەسە جىبەردى. ءوزىمىزدى قيناپ وتىرىپ ءدجيممدىڭ ءتورت «مىقتى قارسىلاسپەن» شىققانىن زەردەلەدىك. ولاردىڭ ءوزى قاتارداعى بوكسشىلار. ستاتيستيكا 2:2. ياعني, ەكى جەڭىس جانە ەكى جەڭىلىس. ال ءدجيمميدىڭ وزىنە تانىمال سايت تاراپىنان بەرىلگەن باعا – ءبىر جارىم جۇلدىز.
كاسىپقوي بوكسشى رەتىندە كاسىبي مانسابىن اياقتايتىن جاسقا جاقىنداپ قالعان وتانداسىمىزعا مۇنداي قارسىلاسپەن جۇدىرىقتاسۋ نە ءۇشىن كەرەك؟ ءبىز تۇسىنبەدىك. بىراق «قاپشىق قارسىلاستاردى» بىرىنەن سوڭ ءبىرىن جەڭىپ رەكوردتى جاقسارتۋ ابىروي اپەرمەيتىنىن قاناتتىڭ ءوزى ايتەۋىر ءبىر تۇسىنەتىن شىعار...
