قورعالجىن ءوڭىرى ەجەلدەن تابيعي بايلىعىمەن ەرەكشەلەنەتىن ايماق. اۋدانداعى ون سان كولدىڭ بالىعى تايداي تۋلاپ جاتىر. تۇتىنۋشى دا ىرگەدە. تەك كوڭىلگە قونىمسىزدىعى, يەن ىرىستىڭ ۇقساتىلماۋىندا ەدى. اباي اۋىلىنداعى جاڭادان سالىنعان بالىق وڭدەۋ تسەحى وسى ولقىلىقتىڭ ورنىن تولتىرادى دەگەن ءۇمىت بار.
– ءبىز ۇزاق مەرزىمگە جالعا العان سۋ ايدىنىندا شورتان, تابان, كوكجون, الابۇعا ءتارىزدى بالىقتىڭ بىرنەشە ءتۇرى ورىستەيدى. قازىر سۋ قۇرامىن زەرتحانادان وتكىزۋدەمىز. ناتيجەسىنە وراي باسقا بالىقتاردىڭ دا تۇقىمىن ساتىپ الىپ, بالىق ءتۇرىن بايىتۋعا نيەتتەنىپ وتىرمىز, – دەيدى كاسىپكەر ەرسايىن حاسەنوۆ, – اۋلانعان بالىقتى وڭدەپ, تۇتىنۋشىعا جەتكىزسەك, ەلگە دە, وزىمىزگە دە پايدالى بولار ەدى.
اۋماعى ەلۋ گەكتارعا جۋىق سۋ ايدىنىنىڭ ورتاشا تەرەڭدىگى 12 مەترگە تاياۋ. كاسىپكەر ەرەجەگە سايكەس جاعالاۋدى تازارتىپ, بىتەلىپ قالعان تابيعي سۋ كوزدەرىن, قار-جاڭبىر سۋى اعاتىن جىلعالاردى ارشىپ, قىستىڭ كۇنى مۇزىن ويىپ تىنىمسىز ەڭبەك ەتۋدە. بالىق ءتۇرى كوبەيگەن سوڭ اۋىلداعى اعايىن دا قارماقپەن اۋلاپ, قىزىعىن كورمەك.
جاڭا تسەحتى سالۋعا 50 ملن تەڭگە قاراجات جۇمسالعان. ونىڭ 20 ملن تەڭگەسى ءوز قارجىسى بولسا, 30 ملن تەڭگەنى التى جىلعا نەسيەگە الىپتى. قازىر ءتورت ادام تۇراقتى جۇمىسپەن قامتىلىپ وتىر.
– بۇرىن ويدا بار كاسىپ بولعانىمەن, بۇل تاراپتا تاجىريبەمىز جوق ەدى, – دەيدى كاسىپكەر. – قىتايدىڭ ىسكەرلەرىنەن ۇيرەندىك. بالىقتى سۇيەگىنەن ارشىپ, ەتىنەن بىرنەشە ءتۇرلى جارتىلاي فابريكاتتار دايىندايمىز. ءوزىمىزدىڭ وسىرگەن بالىعىمىزعا قوسا, اۋدانداعى وسى باعىتتا جۇمىس ىستەيتىن كاسىپكەرلەردىڭ بالىعىن دا وڭدەپ بەرەمىز. وسىلايشا, ءبىراز جۇرتقا جەڭسىك بالىق ەتى تۇتىنۋشىعا ساپالى دايىندالىپ جەتكىزىلەدى.
كولدى جالعا بەرۋ تابيعاتتى ساقتاپ قالۋدىڭ ءبىر امالى. وبلىستا وسى ورايدا بىرقاتار شارۋانىڭ باسى قايىرىلىپ جاتىر.
– الداعى ۋاقىتتا دا يەسى جوق سۋ كوزدەرىن قولدانىستاعى زاڭعا وراي جالعا بەرەتىن بولامىز, – دەيدى «ەسىل» وبلىسارالىق باسسەيندىك بالىق شارۋاشىلىعى ينسپەكتسياسىنىڭ باسشىسى نىعمەت قاۋاشەۆ, – بۇل تالپىنىس شاعىن جانە ورتا بيزنەستى دامىتۋعا ىقپال ەتسە, ەكىنشى جاعىنان ازىق-تۇلىك مولشىلىعىن جاساۋعا سەپتەسەدى.
نەسى بار, جومارت تابيعاتتىڭ ولشەۋسىز سىيىن ۇقساتا الساق, قانەكەي!..
اقمولا وبلىسى,
قورعالجىن اۋدانى
