ەگەر سوعىس بولماعاندا...

اباي اتىنداعى مەملەكەتتىك اكادەميالىق وپەرا جانە بالەت تەاترىندا ۇلى جەڭىستىڭ 65 جىلدىعىنا ارنالىپ داريعا نازارباەۆانىڭ “ەگەر سوعىس بولماعاندا” اتتى قايىرىمدىلىق كونتسەرتى ءوتتى. قازاقستان رەسپۋبليكاسى تۇڭعىش پرەزيدەنتى قورى, الماتى قالاسىنىڭ اكىمدىگى, “دەگدار” قايىرىمدىلىق قورىنىڭ قولداۋىمەن ىسكە اسىرىلعان قايىرىمدىلىق كونتسەرتىن تاماشالاعان سوعىس جانە تىل ارداگەرلەرى وق پەن وت بوراعان مايدان دالاسىندا ولاردى ۇلى جەڭىسكە جىگەرلەندىرىپ, كۇش-قۋات بەرگەن اسقاق رۋحتى اندەردى سۇيسىنە تىڭدادى. داريعا نازارباەۆانىڭ ورىنداۋىنداعى اتاقتى “جۋراۆلي”, “سيني پلاتوچەك”, “بىلي دۆا درۋگا”, “دا­ۆاي زاكۋريم” جانە تاعى دا باسقا اندەر ءوز تىڭداۋشى­لارىنا ەرەكشە ءبىر قۋانىش سىيلاعاندىعىن اتاپ ايتقان ءجون. سونىمەن قاتار, “جەلسىز تۇندە جارىق اي”, “ال­قوڭىر”, “يليگاي” سياقتى سۇلۋ سازدى اندەر ءانشىنىڭ تابيعي ەرەكشە دارىنىن ايعاقتاي تۇسكەندىگى ءسوزسىز. شىندىعىندا دا قۇدىرەتتى دە شىنايى ونەر جۇرەكتەن شىقسا عانا جۇرەككە جەتەتىندىگىن دالەلدەپ جاتۋدىڭ قاجەتى دە جوق شىعار. لومونوسوۆ اتىنداعى ماسكەۋ مەم­لەكەتتىك ۋنيۆەرسيتەتىندە وقىپ جۇرگەن سوناۋ ستۋ­دەنت­تىك كەزدەردەن بەرى داريعانىڭ انگە دەگەن بەيىمدىلىگى ايقىن اڭعارىلىپ, ۋاقىت وتە كەلە وعان دەگەن قۇش­تارلىعى دا ارتا ءتۇستى. ۇزاق ىزدەنىس پەن قابىلەت ءوز ناتيجەسىن بەرۋدە. اسىرەسە, ۇستازى ناديا شاريپوۆادان ۆوكال بويىنشا العان ساباقتارىنىڭ ورنى مۇلدەم بولەك. پاريج جانە ماسكەۋدە دە ءانشى كورەرمەندەردىڭ ىستىق ىقىلاسى مەن قۇرمەتىنە بولەندى. ءسوز رەتى كەلگەندە اتاپ ايتارلىعى, “ەگەر سوعىس بولماعاندا” قايىرىمدىلىق كونتسەرتىندە قر ەڭبەك سىڭىرگەن قايراتكەرى تيمۋر ورمانشاەۆ (فورتەپيانو), اباي اتىنداعى وپەرا جانە بالەت تەاترىنىڭ انشىلەرى, حالىقارالىق كونكۋرستاردىڭ لاۋرەاتتارى اندرەي ترەگۋبەنكو (باريتون), مەدەت شوتباەۆ (تەنور) تا قاتىسىپ, ونەر كورسەتتى. قاسيەتتى وتان, تۋعان جەردىڭ ازاتتىعى, جاس ۇرپاقتىڭ باقىتتى بولاشاعى جانە بەيبىت اسپان ءۇشىن وتقا تۇسكەن مايدانگەرلەرگە دەگەن قۇرمەت پەن تاعزىم جالعاسا بەرمەك. باقىت بالعارينا. الماتى.