«الماتىداعى بالاباقشالاردىڭ جۇمىسىن ارنايى كوميسسيا تەكسەرەدى. ونىڭ قۇرامىنا ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتىنىڭ وكىلدەرى, ساراپشىلار, ادىسكەرلەر مەن قوعام قايراتكەرلەرى كىرەدى. وسىنداي جۇمىس ەلىمىزدىڭ باسقا وڭىرلەرىندە دە جۇرگىزىلەتىن بولادى», دەدى قر بعم ءباسپاسوز قىزمەتى.
كوميسسيا مۇشەلەرى مەكتەپكە دەيىنگى ۇيىمدارداعى جاعداي مەن بالاباقشا قىزمەتكەرلەرىنىڭ جۇمىسى ساپا ستاندارتتارىنا سايكەستىگىن تەكسەرەدى.
«بالاباقشالاردا 100% قاۋىپسىز بولۋى كەرەك. جۋىردا الماتى قالاسىنىڭ ەكى مەكتەپكە دەيىنگى ۇيىمدارىندا بولعان جاعدايلارعا جول بەرىلمەۋ كەرەك. بالاباقشالار اكىمدىكتەردىڭ قاراماعىندا, بۇل رەتتە بۇزۋشىلىق جاعدايلارىنىڭ باسىم كوپشىلىگى جەكە بالاباقشالاردا تىركەلەدى. بىراق قاۋىپسىزدىكتى مەنشىك نىسانى مەن باعىنىستىلىعىنا قاراماستان قامتاماسىز ەتۋ قاجەت», دەپ قوستى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
ونىڭ ايتۋىنشا, وسى جىلدىڭ قىركۇيەگىنە دەيىن مەكتەپكە دەيىنگى ۇيىمداردىڭ قىزمەتىن مەملەكەتتىك باقىلاۋ تەتىكتەرى مۇلدەم بولعان جوق.
«بالاباقشالار, بارلىق باسقا ءبىلىم بەرۋ ۇيىمدارىنا قاراعاندا, ليتسەنزيالاۋدان بوساتىلدى, حابارلامالار ارقىلى اشىلىپ, بۇرىن جۇرگىزىلگەن مەملەكەتتىك باقىلاۋ مەن اتتەستاتتاۋدان بوساتىلدى. تەك بيىلعى جىلى عانا ءبىز بارلىق بالاباقشالاردى مەملەكەتتىك تەكسەرۋ ينستيتۋتىن زاڭدى تۇردە ەنگىزە الدىق. وسىعان بايلانىستى نارازىلىق كوپ بولدى. جەلتوقسان ايىنىڭ باسىندا ءبىز تەكسەرگەن بالاباقشالاردىڭ 80%-ى ءبىلىم بەرۋ قىزمەتىنە قويىلاتىن تالاپتارعا سايكەس كەلمەۋىنە بايلانىستى مەملەكەتتىك اتتەستاتتاۋدان وتپەگەنىن حابارلادىق», دەپ قوستى گۇلزات كوبەنوۆا.
سونداي-اق, ول كوميتەت مەملەكەتتىك تاپسىرىستى جەكە باقشالارعا ورنالاستىرۋعا, تاربيەشىلەردىڭ بىلىكتىلىگىنە جانە قاۋىپسىزدىك ماسەلەلەرىنە قويىلاتىن تالاپتاردى كۇشەيتەتىنىن حابارلادى.
«سونداي-اق, مەكتەپتەر مەن بالاباقشالاردا پەداگوگيكالىق جۇمىسقا العاش كىرىسكەندەردىڭ بىلىكتىلىگىن تاۋەلسىز تەكسەرۋ تۋرالى تالاپ ەنگىزىلەدى», دەدى ول.
ەسكە سالا كەتسەك, جاقىندا الەۋمەتتىك جەلىلەردە الماتى بالاباقشالارىنىڭ بىرىندە بالالارعا قاتىگەزدىك كورسەتكەن تاربيەشى تۋرالى ۆيدەو پايدا بولعان. اتالعان فاكت قر قك 140-بابى 2-بولىگى بويىنشا سدتبت-دە تىركەلدى. كەيىنىرەك مۇعالىم وزىنە قول جۇمساعانى بەلگىلى بولدى.
