تۇزەۋ مەكەمەلەرىندە قازىرگى تاڭدا 35 مىڭعا جۋىق ادام بار. ونىڭ ىشىندە 30 مىڭى سوتتالعان جانە 4 مىڭى تەرگەۋ ءۇشىن قاماۋعا الىنعان, ولاردىڭ نەگىزگى بولىگى, ياعني 93 پايىزى اۋىر جانە اسا اۋىر قىلمىس ءۇشىن جازاسىن وتەيدى. شامامەن 40 پايىزى – بۇرىن سوتتالعاندار.
ءباسپاسوز كونفەرەنتسياسىندا قازاقستاننىڭ پەنيتەنتسيارلىق جۇيەسىنىڭ قىزمەتىن جەتىلدىرۋ ماسەلەلەرى تۋرالى بايانداما جاساعان كوميتەت توراعاسى سوتتالعانداردى ۇستاۋ جاعدايلارىن جاقسارتۋ ءۇشىن ءىىم پەنيتەنتسيارلىق جۇيەسىنىڭ ينفراقۇرىلىمىن جاڭعىرتۋ جونىندەگى جول كارتاسى ازىرلەنگەنىن ايتتى. جول كارتاسى شەڭبەرىندە حالىقارالىق ستاندارتتارعا ساي كەلەتىن 20 جاڭا مەكەمە سالۋ كوزدەلىپ وتىر. باستاپقى كەزەڭدە 2022-2024 جىلدارى الماتى, اقتوبە, ماڭعىستاۋ جانە تۇركىستان وبلىستارىندا ءتورت مەكەمە سالۋ جوسپارلانعان.
سونداي-اق ج.ەشماعامبەتوۆتىڭ مالىمدەۋىنشە, قىلمىستىق اتقارۋ زاڭناماسىن جەتىلدىرۋ جونىندەگى ءىس-شارالار ىسكە اسىرىلۋدا. ماسەلەن, وتكەن جىلى قىلمىستىق زاڭنامانى جەتىلدىرۋ جانە جەكە ادامنىڭ قۇقىقتارىن قورعاۋدى كۇشەيتۋ ماسەلەلەرى بويىنشا زاڭ شەڭبەرىندە سوتتالعانداردىڭ قۇقىقتىق جاعدايىن جاقسارتۋعا باعىتتالعان وزگەرىستەر ەنگىزىلدى. «ۇكىمەت قاۋلىسىمەن بەكىتىلگەن ادام قۇقىقتارى سالاسىنداعى ءبىرىنشى كەزەكتەگى ءىس-شارالار جوسپارىن ىسكە اسىرۋ كەزىندە قىلمىستىق سوت تورەلىگى, جازانى ورىنداۋ, ازاپتاۋدىڭ جانە قاتىگەزدىكتىڭ الدىن الۋ سالاسىندا ادام قۇقىقتارىن قامتاماسىز ەتۋگە باعىتتالعان زاڭ جوباسى ازىرلەندى. ادام قۇقىقتارى جونىندەگى ۋاكىلدىڭ باستاماسىمەن ۆەدومستۆوارالىق جۇمىس توبى قۇرىلدى, ونىڭ قۇرامىنا ۇەۇ وكىلدەرى, ۇلتتىق جانە حالىقارالىق ساراپشىلار كىردى. بۇل ەرەجەلەر بۇۇ ماقۇلداعان تۇتقىندارعا قاتىستى ەڭ تومەنگى ستاندارتتاردى انىقتايدى», دەيدى كوميتەت توراعاسى.
الايدا كوميتەت باسشىسى تۇزەۋ مەكەمەلەرىندە ورتاق تارتىپكە باعىنعىسى كەلمەيتىندەردىڭ بار ەكەنىن دە ايتتى. «جەكەلەگەن سوتتالعاندار جازانى وتەۋدىڭ زاڭنامادا بەلگىلەنگەن ءتارتىبىن ساقتامايدى, اكىمشىلىككە قىسىم جاساۋدىڭ ءارتۇرلى ارانداتۋشىلىق تاسىلدەرىن, ونىڭ ىشىندە ازاپتاۋعا قاتىستى جالعان ارىز-ءوتىنىش جاسايتىندار دا بار. وسىعان قاراماستان, زورلىق-زومبىلىق, قاۋىپ-قاتەر جانە وزگە دە زاڭسىز قاتىگەز قارىم-قاتىناس شارالارى قولدانىلعانى تۋرالى ءاربىر حابارلاما توتەنشە جاعداي رەتىندە قابىلدانادى», دەيدى ول. مەملەكەت باسشىسىنىڭ تاپسىرماسى بويىنشا قىزمەتكەرلەر مەن سوتتالعانداردىڭ زاڭسىز ءىس-ارەكەتتەرىن باقىلاۋ جانە الدىن الۋ ماقساتىندا بارلىق پەنيتەنتسيارلىق مەكەمەلەردە بەينەباقىلاۋ كامەرالارى ورناتىلادى. بۇل پروتسەسس الداعى 3 جىلدا اياقتالادى دەپ جوسپارلانعان.
جۇمىسقا ورنالاستىرۋ – سوتتالعانداردى بوستاندىقتاعى ومىرگە بەيىمدەۋ مەن تۇزەۋدىڭ ماڭىزدى فاكتورى. جۇمىسقا ورنالاستىرىلعانداردىڭ سانى وتكەن جىلى 38 پايىز بولسا, بيىل 49 پايىزعا جەتكەن. بۇگىندە جابىق مەكەمەلەردەگى وندىرىستىك الاڭداردا 3,5 مىڭعا جۋىق ادام ەڭبەك ەتەدى. نەگىزىنەن, تۇتقىندار قۇرىلىس ماتەريالدارى, مەتالل قۇرىلىمدارى, اعاش جانە پلاستيكتەن جاسالعان بۇيىمداردى وندىرۋگە قاتىسادى. تىگىن ءوندىرىسى دە جاقسى جولعا قويىلعان.
