ەلوردا • 27 جەلتوقسان، 2021

ازاتتىق شەجىرەسى: فوتوكورمەگە كاسىبي مامانداردىڭ تۋىندىلارى قويىلدى

121 رەت كورسەتىلدى

ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان فوتوكورمەنىڭ سالتاناتتى اشىلۋ ءراسىمى ءوتتى، دەپ حابارلايدى Egemen.kz.

ءىس-شاراعا ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى كەاق باسقارما توراعاسى – رەكتور ەرلان سىدىقوۆ، ەلتاڭبا اۆتورى جانداربەك مالىبەكوۆ، الەۋمەتتىك-مادەني دامۋ جونىندەگى پرورەكتور ديحان قامزابەك ۇلى، وقۋ-ءىسى جونىندەگى پرورەكتور ەركىن وڭعارباەۆ، فاكۋلتەت دەكاندارى، سالا قىزمەتكەرلەرى جانە كورمەگە قويىلعان فوتوسۋرەتتىڭ اۆتورلارى قاتىستى.

45+6+645+

كورمەنىڭ اشىلۋ سالتاناتىندا ءسوز سويلەگەن  ەۇۋ رەكتورى ەرلان سىدىقوۆ قازاقستاننىڭ تانىمال فوتوسۋرەتشىلەرىنىڭ ەل تاۋەلسىزدىگىنىڭ 30 جىلدىق تاريحىنا ارنالعان ەڭبەكتەرىنىڭ كورمەسىنە قويىلعان تاريحي سۋرەتتەردە قر تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ قايراتكەرلىگى، ەل ازاماتتارىنىڭ ەرەن ەڭبەگى، پەيزاج، قوعامدىق-ساياسي ومىردەگى ايشىقتى ساتتەر ادەمى بەينەلەنگەنىن تىلگە تيەك ەتتى جانە  الداعى ۋاقىتتا ءبىلىم وداسىنان «حابار» اگەنتتىگى مەن «قازاقستان» تەلەراديوكورپوراتسياسى، قازاق راديوسىنىڭ شەبەرلىك شىڭداۋ ستۋدياسى سەكىلدى فوتوزەرتحانا اشىلاتىنىن اتاپ ءوتتى.

256+4

«فوتوكورمەنىڭ ماقساتى جاس ۇرپاققا تاۋەلسىزدىگىمىزدى دارىپتەپ، مەملەكەتىمىزدىڭ مەرەيىن ارتتىرۋ جانە تاريحي سانانى قالىپتاستىرۋ»، دەگەن اكادەميك ەرلان سىدىقوۆ كورمەگە جينالعان بارلىق قاتىسۋشىلاردى ەل تاۋەلسىزدىگىنىڭ 30 جىلدىعى جانە كەلە جاتقان جاڭا جىل مەرەكەسىمەن قۇتتىقتادى، سوڭىنان فوتو اۆتورلارىنا ەستەلىك سىي تاپسىردى.

كەلەسى كەزەكتە ءسوز العان ەلتاڭبا اۆتورى جانداربەك مالىبەكوۆ كورمەدەن ءوزىنىڭ وسىدان وتىز جىل بۇرىنعى سۋرەتىن كورىپ، ونىڭ تاريحى تۋرالى سىر شەرتسە، قر پرەمەر ءمينيسترىنىڭ ءفوتوتىلشىسى شۇكىر شاحاي ۋنيۆەرسيتەت باسشىسى ەرلان ءباتتاش ۇلىنا جانە زەرەندىدە وتكەن رەسپۋبليكالىق فوتوسۋرەتشىلەر بايقاۋى مەن بۇگىنگى كورمەنى ۇيىمداستىرۋعا ۇيىتقى بولعان ەۇۋ اقپارات ورتالىعىنىڭ فوتوگرافى ەربول ەردەنبەككە العىس ءبىلدىردى.

4+9+65

كورمەگە قويىلعان مەملەكەتتىك قۇرىلىمدار مەن بۇقارالىق اقپارات قۇرالدارىندا جۇمىس ىستەيتىن تانىمال فوتوگرافتاردىڭ ىشىندە قر پرەمەر ءمينيسترىنىڭ جەكە فوتوگرافى شۇكىر شاحاي، ارداگەر فوتوگراف سوۆەتبەك ماعزۇموۆ، قر قورعانىس مينيسترىلىگىنىڭ فوتوگرافى ەرمەك سارىباسوۆ، «كازاقپارات» اگەنتتىگىنەن  مۇحتار حولداربەك، باۋىرجان جۋاسباەۆ، «تەنگرينيۋستەن» تۇرار قازانعاپوۆ، رەسپۋبليكالىق «ەگەمەن قازاقستان» گازەتىنەن ەرلان وماروۆ، «استانا اقشامى» گازەتىنەن سۇلتان سەيىلوۆ، پرەمەر-مينيستر سايتىنان ناريمان مۋرزاباەۆ، «National Geographic» جۋرنالىنان ەربولات شادراحوۆ، «كازاقنيۋستەن» دوعان يىلدىز، Zhastar Life پورتالىنان مەيىربەك تاجكۋرانوۆتاردىڭ ەڭبەكتەرى كورەرمەن نازارىن وزىنە اۋداردى.

«ساباقتى ينە ساتىمەن» دەگەندەي، شارا بارىسىندا رەكتور ەرلان سىدىقوۆ باستاپ، فوتوگرافتار شۇكىر شاحاي، ەرلان وماروۆ، دوعان يىلدىز، ت.ب. قوستاپ،  جۋرناليستيكا جانە ساياساتتانۋ فاكۋلتەتىن تامامداعان ءبىر توپ دوكتورانتقا PhD دوكتورى ديپلومىن تاپسىردى، الداعى ەڭبەكتەرىنە ساتتىلىك تىلەدى.

126456

 راحىمجان تۇرىسبەك، فيلولوگيا عىلىمدارىنىڭ دوكتورى، پروفەسسور:

«وسىندا قازاق دالاسىنىڭ، اسىرەسە، الاتاۋ مەن اتىراۋعا سوزىلىپ جاتقان ساحارا كورىنىستەرى، تۇتاس تابيعات، جىل مەزگىلدەرى، سوسىن ادام مەن ونىڭ ەڭبەگى جان-جاقتى كورىنىس تاپقان.

كورمەنى ارالاپ ءجۇرىپ، ويىما ءبىر جايت ورالدى. وسىدان ونشاقتى جىل بۇرىن ۋنيۆەرسيتەت باسشىلىعى ءبىراز عالىمداردى ءبىلىم ورداسىنىڭ اتىنان ەۋروپاعا جىبەردى. سول ەۋروپاعا بارعان كەزدە قازىرگى گەرمانيانىڭ اتاقتى قالالارىنىڭ ءبىرى درەزدەندە دۇنيەجۇزىندەگى كوركەمسۋرەت گالەرەياسىنا جولىمىز ءتۇستى. بۇل گالارەيانىڭ ەرەكشەلىگى – جەر بەتىندەگى رۋحانياتقا، ومىرگە،  ادامزاتتىق قۇندىلىقتارعا قۇشتار جانداردىڭ ءبارى سول جەرگە جىل ون ەكى اي بارىپ تۇرادى. سوندا بايقاعانىم، ۋنيۆەرسيتەتتىڭ اۋماعىنداي جەردى الىپ جاتقان ءۇش قاباتتى ءۇيدىڭ ءبىرىنشى قاباتىندا بىرىڭعاي جەر بەتىندەگى قارۋ-جاراقتار، ەكىنشى قاباتىندا بىرىڭعاي ىدىس-اياقتار، ءۇشىنشى قاباتى كوركەمسۋرەتكە بەرىلىپتى. جەر بەتىندەگى كوركەمسۋرەتتىڭ ءبارى جيناقتالعان.

مىنە، بۇگىن وسى  تۇساۋى كەسىلىپ، سالتاناتتى جاعدايدا اشىلعان  «تاۋەلسىزدىك: ەلدىڭ فوتوشەجىرەسى» اتتى كورمەنى ارالاي ءجۇرىپ، الىستاعى ەۋروپاداعى دۇنيەجۇزىلىك كورمەنىڭ اسەرى ويىما ورالدى. ءبىزدىڭ قازاقستاندىق سۋرەتشىلەردىڭ دە ەڭبەگى كەم ەمەس، وتىز جىلداعى تابىستى سۋرەت ونەرى ارقىلى كورسەتىپ وتىر».

شۇكىر شاحاي، قر پرەمەر-مينيستر فوتوسۋرەتشىسى:

«بۇگىنگى كورمەنىڭ اشىلۋ ساتىندە مەملەكەت جانە قوعام قايراتكەرى، كورنەكتى جازۋشى، مارقۇم ءابىش كەكىلباەۆتىڭ ايتقان ءبىر اڭگىمەسى ەسكە ءتۇسىپ وتىر. «تابيعاتتان ءبىر تاماشا جانۋاردى كورگەن اڭشىلار ونى اتىپ ولتىرەدى، ال سەندەر، فوتوگرافتار سول ادەمى، سۇلۋ جانۋاردى ەرتەڭگى ۇرپاققا سول ادەمى كۇيىندە جەتكىزەسىڭدەر»، دەپ ەدى. بۇدان اسىرىپ نە ايتۋعا بولادى؟»

شارا سوڭىندا كورمەگە قاتىسۋشىلار ەستەلىك سۋرەتكە ءتۇستى.

سوڭعى جاڭالىقتار

احاڭنىڭ ادالدىعى

احمەت بايتۇرسىن ۇلى • كەشە

قارالى كەزەڭ كارتيناسى

قازاقستان • كەشە

ۇقساس جاڭالىقتار