زاڭ جوباسىن قابىلداۋدىڭ ماقساتى اگلومەراتسيالاردى دامىتۋدى كەشەندى قۇقىقتىق رەتتەۋدى قامتاماسىز ەتۋ جانە «اگلومەراتسيانى دامىتۋ تۋرالى» زاڭدى ىسكە اسىرۋ, ونىڭ ىشىندە:
- اگلومەراتسيالاردى قالىپتاستىرۋ جانە ولاردىڭ جۇمىس ىستەۋى ءۇشىن قۇقىقتىق جانە ۇيىمداستىرۋشىلىق جاعدايلار مەن تەتىكتەر جاساۋ;
- اگلومەراتسيالاردى جوسپارلاۋدى, ۇيلەستىرۋدى جانە قارجىلاندىرۋدى جاقسارتۋعا باعىتتالعان قۇقىقتىق جانە رەتتەۋشىلىك رەفورمالاردى جۇرگىزۋ ارقىلى اگلومەراتسيالاردى دامىتۋ تيىمدىلىگىن ارتتىرۋ;
- اگلومەراتسيالاردى دامىتۋعا جاردەمدەسۋ ماقساتىندا قالا قۇرىلىسى/ەكونوميكالىق ينتەگراتسيا پروتسەسى مەن اكىمشىلىك شەكارالار, سونداي-اق وكىلەتتىكتەر اراسىنداعى سايكەسسىزدىكتى جويۋ;
- اگلومەراتسيالاردى دامىتۋ بولىگىندە جەرگىلىكتى اتقارۋشى ورگاندار اراسىنداعى ۇيلەستىرۋ مەن ءوزارا ءىس-قيمىلدى جاقسارتۋ.
زاڭ جوباسى اگلومەراتسيانى دامىتۋعا بايلانىستى قوعامدىق قاتىناستاردى رەتتەيدى.
بۇگىندە نۇر-سۇلتان, الماتى, شىمكەنت جانە اقتوبە قالالارىندا ورتالىقتارى بار ءتورت اگلومەراتسيادا ەل حالقىنىڭ 36%-ى تۇرادى. اگلومەراتسيا ورتالىقتارىندا ەلدىڭ جالپى ىشكى ءونىمىنىڭ شامامەن ۇشتەن ءبىرى وندىرىلەدى. اگلومەراتسيالار ۇلەسىنە ەلگە تارتىلاتىن شەتەلدىك ينۆەستيتسيالاردىڭ 60%-دان استامى تيەسىلى.
زاڭ جوباسىن ازىرلەۋشىلەردىڭ ايتۋىنشا, قازىر قازاقستاندا اگلومەراتسيالارعا بايلانىستى مىندەتتەردىڭ, ەسەپ بەرۋ تەتىكتەرىنىڭ جانە باسقا ينستيتۋتسيونالدىق تەتىكتەردىڭ ارنايى ءبولىنۋى جوق.
سونداي-اق بۇگىندە جەرگىلىكتى بيۋدجەتتەردىڭ ءوزارا قارىم-قاتىناسىنا جول بەرىلمەيتىنى ايتىلادى. سونىمەن قاتار اگلومەراتسيالار باستامالارى ءۇشىن قارجىلاندىرۋ كوزى, سونداي-اق رەسپۋبليكالىق ماڭىزى بار قالالار مەن ەلوردانىڭ جانە ىرگەلەس وبلىستاردىڭ اكىمدىكتەرىنە اگلومەراتسيالار اۋماعىنداعى الەۋمەتتىك جوبالاردى بىرلەسىپ قارجىلاندىرۋ مۇمكىندىگى تالاپ ەتىلەدى.
مىسالى, بۇگىنگى كۇنى الماتى قالاسىنىڭ قالا ماڭىنداعى اۋداندارىندا جالپى ءبىلىم بەرەتىن (52 مىڭ ادام) جانە مەكتەپكە دەيىنگى (8 مىڭ ادام) مەكەمەلەردە وقۋشى ورىندارىنىڭ تاپشىلىعى بار. الماتى وبلىسىنىڭ قالا ماڭىنداعى اۋداندارىنىڭ تۇرعىندارى قالانىڭ الەۋمەتتىك نىساندارىن پايدالانادى, سول ارقىلى الماتى اكىمدىگىنىڭ بيۋدجەتىنە جۇكتەمە ارتادى.
زاڭ جوباسى 14 قاڭتارعا دەيىن «اشىق نقا» سايتىندا جاريا تالقىلاۋ ءۇشىن ورنالاستىرىلعان.
