جاڭا جىل قارساڭىندا كورەيا ۇكىمەتى راقىمشىلىققا ىلىنگەن ازاماتتار ءتىزىمىن حابارلادى. بۇل تىزىمدە 69 جاستاعى پاك كىن حە دە بار. باق-تىڭ جازۋىنشا, بۇل شەشىم ونىڭ دەنساۋلىق جاعدايىن ەسكەرە وتىرىپ, گۋمانيتارلىق سەبەپتەرمەن قابىلدانعان.
پاك كىن حە 2019 جىلى يىعىنا وتا جاساتقان, ال بيىل يىق پەن ومىرتقا سوزىلمالى اۋرۋى سەبەبىمەن ءۇش رەت اۋرۋحاناعا تۇسكەن. ەكس-پرەزيدەنتكە قاتىستى ساياسي جانجال 2016 جىلدىڭ قازان ايىندا باستالعان. جانجالعا قاتىستى تەرگەۋ ناتيجەسىندە ونىڭ قۇربىسى چحۆە سۋن سيل بىرنەشە جىل بويى ۇكىمەت جۇمىسىنان حاباردار بولىپ, ساياسي شەشىمدەر قابىلداۋعا ارالاسقانى انىقتالعان. ودان بولەك ەكس-پرەزيدەنت قۇربىسى بىرقاتار كومپانياعا قىسىم كورسەتىپ, ءوزىنىڭ قورلارىنا ونداعان ميلليون دوللار اۋدارۋعا ماجبۇرلەگەن.
سىبايلاس جەمقورلىق فاكتىلەرى جانە چحۆە سۋن ءسيلدىڭ مەملەكەتتىك قىزمەتكە زاڭسىز قاتىسۋ ارەكەتتەرى انىقتالعاننان كەيىن بۇكىل ەلدە نارازىلىق اكتسيالارى ءوتىپ, وعان قاتىسۋشىلار پاك كىن حەنىڭ دەرەۋ وتستاۆكاعا كەتۋىن تالاپ ەتتى. پارلامەنت پاك كىن حەنى قىزمەتىنەن كەتىرۋ تۋرالى شەشىم قابىلداپ, كەيىن ول قاماۋعا الىندى.
