ءدال وسى جەرگە كەلگەندە گازەتتى قويا تۇرىپ, قالىڭ ويعا شومدىم. ءيا, مەن ءوزىم وسى جاسقا كەلگەنشە نە تىندىردىم؟ ەل ەسىندە جاقسى اتىممەن قالاتىنداي قانداي يگى ءھام شاراپاتتى ىستەر اتقاردىم؟ قاراپ تۇرساڭىز, بۇل ءوزىن ءوزى سانالى سانايىن ءاربىر ازاماتتىڭ ۇيقىسىن قاشىرىپ, مازاسىن الاتىن ساۋال ەكەن-اۋ...
ءيا, بۇل سۇراقتى وزىنە قويا بىلگەن ارلى جاننىڭ جاۋابى دا دايىن بولۋى شارت. تۇپتەپ كەلگەندە, بۇل دەگەنىڭىز ادامنىڭ وزىنە ءوزى ەسەپ بەرۋى عوي. مەنىڭشە, قازاقستاننىڭ ءاربىر ەلجاندى ازاماتى بۇل سۇراقتى وزىنە كۇندە قويىپ, جاۋابىن ادال ىسىمەن, سىڭىرگەن ەڭبەگىمەن كورسەتۋى ءتيىس دەپ ويلايمىن.
ءالى ەسىمدە, تاۋەلسىزدىك العان جىلداردىڭ باس جاعىندا جەزقازعان وڭىرىنە جۇمىس ساپارىمەن كەلگەن تۇڭعىش پرەزيدەنتتەن كوپتەگەن جۋرناليستەردىڭ اراسىندا تۇرىپ, راديو ءتىلشىسى رەتىندە سۇحبات العان ەدىم. سول كەزدە جانارى وت شاشقان نۇرسۇلتان نازارباەۆتىڭ ءاربىر ءسوزى مەرگەننىڭ اتقان وعىنداي نىساناسىنا ءدوپ ءتيىپ جاتىپ ەدى. ء«يا, – دەگەن سوندا تۇڭعىش پرەزيدەنت, – قازىرگى قيىندىقتى ەل بولىپ بىرىگىپ جەڭەتىنىمىزگە بەك سەنىمدىمىن. بۇل قيىنشىلىقتىڭ ءبارى ءبىر كورگەن تۇستەي وتە شىعادى, ۇمىتىلادى. ءبىز بىرلىگىمىز بەن ىنتىماعىمىزدىڭ ارقاسىندا ءالى-اق ءوسىپ-وركەندەگەن مەملەكەتكە اينالامىز».
مىنە, سودان بەرى جىلجىپ ءبىرتالاي جىل ءوتتى. بۇگىندە ەلباسىنىڭ ايتقانى ايداي كەلدى. جوعارىدا اتالعان ماقالاسىندا ول بىلاي دەپ جازادى: «مەن وتىز جىل بويى حالقىمدى قاناتتىعا قاقتىرماي, تۇمسىقتىعا شوقىتىرماي, قايراڭعا قالدىرماي, الەمدىك وركەنيەتتىڭ الدىڭعى شەبىنە, دۇنيەدەگى ەڭ دامىعان 40 ەلدىڭ قاتارىنا قوستىم. وسى جىلدار ىشىندە الەمدىك عىلىم مەن مادەنيەتتىڭ ەڭ ۇزدىك جەتىستىكتەرىن مەڭگەرگەن جاڭا ۇرپاق قالىپتاستى. جاڭا ەلوردامىز سالىندى. ەڭ ۇلكەن تابىسىم دا, ەڭ ۇلكەن باقىتىم دا وسى دەپ سانايمىن».
تۋرا وسى جولدارعا كەلگەندە كەيبىر پيعىلى تەرىس پەندەلەردىڭ سىڭارەزۋ پىكىر ايتىپ, جاقتىرماعانداي مىرسىلداعانىن ەستىپ تە ءجۇرمىز. ءيا, تاريحتىڭ ولشەمىمەن العاندا قاس قاققانداي-اق ۋاقىت – وتىز عانا جىلدىڭ ىشىندە ويدى دا, قىردى دا تۇگەل گۇلدەندىرىپ تاستاۋ دەگەن اقىلعا سىيمايتىن شارۋا. تاۋەكەلگە بەل بۋىپ, ءىرى ىستەردىڭ جالىنان العان جاس مەملەكەتتە ۇساق-تۇيەك كەمشىلىكتەر, ولقىلىقتار بولمايدى دەپ كىم ايتتى؟!
تۇيمەدەيدى تۇيەدەي ەتۋ اركىمنىڭ قولىنان كەلەدى, ال ءبىر ءتۇيىر بولسا دا ەلگە پايدامدى تيگىزسەم دەگەن پيعىل, وكىنىشكە قاراي, كەيبىر ازاماتتاردا از بولىپ تۇر. ەندەشە, نيەتتى وڭعارىپ, كەمشىلىكتى كەڭشىلىكپەن تۇزەيتىن سانا بيىگىنە كوتەرىلە الساق, ەلىمىزدىڭ ەڭسەسى بۇرىنعىدان بەتەر اسقاقتاي تۇسەر ەدى-اۋ!
بەكزات التىنبەكوۆ,
قاراعاندى وبلىستىق قحا توراعاسىنىڭ ورىنباسارى, وبلىستىق قوعامدىق كەلىسىم كەڭەسىنىڭ توراعاسى, وبلىستىق ءماسليحاتتىڭ دەپۋتاتى
قاراعاندى وبلىسى
