تابا ەمەس, تاۋبە, ءبىز مۇنىڭ ءبىرىن دە كورگەنىمىز جوق. «ەگەمەن قازاقستان» گازەتىنەن ەلباسىنىڭ «تاۋەلسىزدىك تاعىلىمى» اتتى ماقالاسىن وقىعاندا العاش ويىما وسى ورالدى. جالپى, مەملەكەتتىڭ تابىسى كوپتىڭ ەڭبەگى ارقىلى قۇرالاتىنى ايان عوي. ەركىندىكتىڭ ەلەڭ-الاڭىندا كاسىپ باستاعانداردىڭ ءبىرىمىن. العاشقىدا اعاشتان ەسىك-تەرەزە جاساپ, جيھاز شىعاردىق. كەيىن مەملەكەتتىڭ قولداۋىنا سۇيەنىپ, ازعانتاي نارسەدەن باستالعان ءىسىمىز ىرگەلى كاسىپورىنعا اينالدى. قوسىمشا مال, ەگىن شارۋاشىلىعىمەن اينالىسا باستادىق. بيزنەستى قولداۋ مەن مەملەكەتتىك رەتتەۋ مەحانيزمى قالىپتاسىپ, از جىلدا سالانىڭ ەكونوميكاداعى ۇلەسى ايتارلىقتاي ءوستى.
وتىز جىلدا ءجۇرىپ وتكەن جولىمىزدى كوز الدىمىزعا اكەلگەن ەلباسى ماقالاسىندا «ادامدى قانداي قيىندىقتان دا امان الىپ شىعاتىن قۇدىرەت ەڭبەك ەكەنىن مەن ءسابي كەزىمنەن-اق سەزىندىم. كەيىنگى جاستارعا ۇنەمى «ەڭبەك ەت, وتباسىڭدى اسىرا, ەلىڭە قىزمەت قىل: ءوزىڭ دە تابىستى بولىپ, وتانىڭنىڭ دا قۋاتى ارتادى» دەيتىنىم سوندىقتان» دەيدى. بۇل قازىر ەڭبەكتەنىپ بەل تالدىرماي-اق بىردەن بايىپ كەتكىسى كەلىپ جۇرەتىن جاستار جادىندا تۇتار وسيەت.
جاس مەملەكەتتىڭ بۇكىل جەتىستىگى كوز الدىمىزدا تۇر. اسىرەسە, الەۋمەتتىك سالادا تمد مەملەكەتتەرى اراسىندا كوش ىلگەرى كەتتىك. مەن جاس كەزىمدە كولىك اپاتىنا ۇشىراپ, ءبىر قولىمنان ايىرىلعانمىن. ەلباسىنىڭ مۇمكىندىگى شەكتەۋلى جاندار ءۇشىن كەدەرگىسىز قوعام قۇرۋ تاپسىرماسى باعىتىنداعى باستامالارىنا ءدان ريزامىن.
وسىدان ءبىراز بۇرىن ەلباسى «تاۋەلسىزدىك جىلدارىنان بەرى ەسكە الاتىن بولساق, بارلىق جاعدايىمىزدى قىزىلوردا وڭىرىمەن-اق سالىستىرىپ بىلۋگە بولادى. كەڭەس وداعى كۇيرەگەن 90-جىلداردىڭ باسىندا مەنىڭ الدىمدا بۇكىل قىزىلوردا حالقىن كوشىرۋ تۋراسىندا ماسەلە تۇرعان بولاتىن. دالا قاڭىراپ قالدى, جەر سورتاڭداندى. ارال ايماعىندا جۇمىس قالماي, سىردىڭ وزىندە بىردە سۋ تاپشى بولسا, ەندى بىردە اسىپ-تاسىپ جاتتى. سوندا اقساقالدارمەن اقىلداسىپ, ءبارىن قولعا الىپ, جاعداي جاساۋدى باستادىق. كىشى ارالعا حالىق قايتا كەلىپ, بالىق كاسىبىنە دەن قويا باستادى. قىزىلوردا ارقىلى وتەتىن اۆتوكولىك جەلىسى سالىندى. گاز قۇبىرى دا باتىستان وڭتۇستىككە كەلدى. سىردىڭ ۇستىنەن كوپىر سالىندى. قىزىلوردانىڭ ءوزى دە كوركەيىپ, الەمنىڭ 20 ەلىندە عانا جۇرەككە جاسالاتىن وپەراتسيا وسىندا جاسالاتىن بولدى», دەگەن ەدى. بۇل – بىزگە تاۋەلسىزدىك سىيلاعان تابىس. وسىنىڭ ءبارى ەركىندىكتىڭ ارقاسى.
نۇرمۇرات ەرمانوۆ,
كاسىپكەر
قىزىلوردا
