ورتالىق كوممۋنيكاتسيالار قىزمەتى الاڭىندا وتكەن بريفينگتە مينيستر بۇل كورسەتكىشكە جەكەلەگەن قىزمەت باعىتتارى بويىنشا قولعا الىنعان الدىن الۋ جانە پروفيلاكتيكالىق ءىس-شارالاردىڭ ارقاسىندا قول جەتكىزىلگەنىن ايتتى. «بولىمشە قىزمەتكەرلەرى 11 مىڭنان استام ادامدى قۇتقارسا, 12 مىڭعا جۋىق تۇرعىن ەۆاكۋاتسيالاندى, 4 مىڭنان استام ازاماتقا العاشقى مەديتسينالىق كومەك كورسەتىلدى. جىل باسىنان بەرى توتەنشەلىكتەر 76 مىڭنان استام شاقىرتۋعا شىققان», دەگەن ۆەدومستۆو باسشىسى بيىل توتەنشە وقيعالاردىڭ كەسىرىنەن زارداپ شەككەندەردىڭ سانى 1736-عا, ال قازا تاپقانداردىڭ قارالى ءتىزىمى 838-كە جەتكەنىن دە حابارلادى. ءتۇرلى اپات كەزىندەگى ماتەريالدىق زالالدىڭ وسكەنى دە بايقالادى. سوڭعى 11 ايدا 354 ادام قىزىل جالىننىڭ قۇربانىنا اينالسا, 400-دەن استام تۇرعىن سۋعا كەتكەن. ال وندىرىستىك اپاتتان 13 ادام كوز جۇمعان.
«وكىنىشكە قاراي, بيىل 2 نەمەسە ودان دا كوپ ادامنىڭ ءولىمى تىم جيىلەپ كەتتى. قوعامدىق رەزونانس تۋدىرعان بۇل قايعىلى وقيعالار جالپى ستاتيستيكاعا اسەر ەتپەي قويمادى. جىل باسىنان بەرى ەكى رەت گاز باللوندارىنىڭ جارىلىسى تىركەلدى. نۇر-سۇلتان جانە پەتروپاۆل قالالارىندا بولعان وسى اپات سالدارىنان 4 ادام قازا تاۋىپ, 15-تەن استام تۇرعىن زارداپ شەكتى. كەيىننەن اقمولا وبلىسىنىڭ شورتاندى اۋدانىندا 6 ادام, ونىڭ ىشىندە ءۇش بالا ءدال وسىنداي جارىلىستان كوز جۇمدى. سونداي-اق جامبىل وبلىسىنداعى اسكەري قويمادان ءورت شىعىپ, 17 ادام قازا تاپتى», دەگەن مينيستر قارالى وقيعالاردى تىزبەلەپ شىقتى.
بريفينگ بارىسىندا يۋ.يلين سونداي-اق سەل ءجۇرۋ قاۋپى بار كەزەڭدە 1800-گە جۋىق قاۋىپتى ۋچاسكەدە جەرۇستى جانە اەروۆيزۋالدى تەكسەرۋ جۇرگىزىلگەنىن دە ايتىپ ءوتتى. «جىل سايىن ەلىمىزدىڭ تاۋلى ايماقتارىندا مۇزدىقتاردىڭ تەز ەرۋى جاڭا مۇزداق كولدەردىڭ پايدا بولۋىنا اكەپ سوعادى. كوبىنەسە ولار وتە قاۋىپتى بولىپ تابىلادى جانە سەل مەن كوشكىن قۇبىلىستارىنا قاۋىپ توندىرەدى», دەدى بۇل جونىندە ول.
قاۋىپتى ۋچاسكەلەردى باقىلاۋدى سەلدەن قورعاۋدىڭ جاڭا تەحنولوگيالارىن قولدانا وتىرىپ, «قازسەلدەنقورعاۋ» ارنايى باقىلاۋ جانە قۇلاقتاندىرۋ قىزمەتى جۇزەگە اسىرادى. ولار حالىقتى حاباردار ەتۋ بويىنشا جاڭا تەحنولوگيالاردى ەنگىزۋدە. «الماتى, جامبىل, شىعىس قازاقستان, تۇركىستان وبلىستارى مەن الماتى قالاسى – سەل مەن كوشكىن قاۋپىنە ءجيى ۇشىرايتىن وڭىرلەر. قازىرگى تاڭدا قورعاس, كىشى جانە ۇلكەن الماتى, اقساي, قارعالى وزەندەرىنىڭ باسسەيندەرىندە اۆتوماتتى مونيتورينگ جۇيەسىنىڭ 31 ستانساسى جۇمىس ىستەيدى. ولار جاعدايدى باعالاۋعا جانە سەل وشاقتارىنا جەدەل دەن قويۋعا مۇمكىندىك بەرەدى. الماتى قالاسى, الماتى وبلىسى جانە «قورعاس» شەكارا ماڭىنداعى حالىقتى قورعاۋ جانە سەلدەردەن كەلەتىن زالالدى بارىنشا ازايتۋ ءۇشىن اقساي, ايۋساي, قورعاس وزەندەرىندە سەلدەن قورعاۋ بوگەتتەرى مەن قورعانىش قۇرىلىستارىن سالۋ جۇرگىزىلۋدە», دەپ اتاپ ءوتتى ۆەدومستۆو باسشىسى. ال الماتىدا جەر سىلكىنىسىن ەرتە حابارلايتىن 9 اۆتوماتتاندىرىلعان سەيسموستانسا ورناتىلعان. مۇنداعى قۇرىلعىلار ماگنيتۋداسى 4 بالل جانە ودان جوعارى جەر سىلكىنىسىن ەرتە حابارلاي الادى. جالپى, ەلىمىز بويىنشا سەيسميكالىق قاۋىپتى جانە جەر سىلكىنىستەرىن بولجاۋ قاۋپىن تومەندەتۋ ماقساتىندا سەيسميكالىق قاۋىپتى ايماقتاردا 63 ستاتسيونارلىق ستانسا جۇمىس ىستەيدى. ءمينيستردىڭ ايتۋىنشا, الداعى ۋاقىتتا تاعى 28 ستانسا ورناتۋ جوسپاردا بار.
