ەرەسەك ادامدار الدەنە جايلى اڭگىمەلەسىپ وتىرىپ كۇلگەن بولسا – كىشكەنە نارەستە دە سىقىلىقتاپ قوسىلا كۇلگەن بولار ەدى. سوندا ولار ايتار ەدى: ء«وي, ق ۇلىنشاق, سەن نە ءتۇسىنىپ ءماز بولدىڭ؟».
بۇل – پوستمودەرن كوزقاراسى.
«بىزدەر «گوموساپيەنس» كەزىمىزدەن بىلگىر ەك...
ال, مەن ءوزىم, مىسال ءۇشىن, الفا جىلى,
يگرەك تاۋلىگىندە تۋىپپىن دا...
كەيىن, يكس-بەسىندە
(ومەگا جىلى)
قايتىس بولام.
سونىم ءۇشىن كەشىرىڭدەر»... (ت. ءا.)
وسى جولداردى وقىعان وقۋشى اۋەلى تاڭ قالادى. ىلە الدەنەنى ەسكە تۇسىرۋگە, ىلەسە – تۇسىنۋگە تىرىسادى.
«بىزدەر «گوموساپيەنس» كەزىمىزدەن بىلگىر ەك» – حومو ساپيەنس. ياكي گومينيد. پريمات. سانالىلىق پەن بىلگىرلىك – حومو ساپيەنس.
الايدا اقىن «بىزدەر» جانە «ال مەن ءوزىم» دەگەن ەكى ۇعىمدى قولدانىپ وتىر. بۇل – «بىزدەردەن» ءبولىنۋ. ياعني دارۆيندىك «بىزدەردەن» ءوزىن بولەكتەۋ. ولدۋۆاي مادەنيەتى تۇسىندا گومينيد تاستى تاسقا سوعىپ وتىرعان ساتتە, مەن – اقىن – دۇنيە سىرىن بىلگەن – عارىشتان كەلگەن قۇبىلىس ەدىم دەۋ.
«الفا جىلى,
يگرەك تاۋلىگىندە تۋىپپىن دا...
كەيىن, يكس-بەسىندە
(ومەگا جىلى)
قايتىس بولام»...
الفا جىلى
ەڭ اۋەلى كەلەتىن وي – الفا تسەنتاۆرا جۇلدىزدار شوعىرى. Centaurus – كەنتاۆر. كىسى كەۋدەلى جىلقى. دەمەك, جىلقى جىلى. الايدا اقىن جىلقى جىلىنىڭ ءتولى بولماي شىقتى.
ەندى؟
الفا – بارلىق الىپبيلەردىڭ ءبىرىنشى ءھارپى. الفا, الەف, اليف... مىسىر يەروگليفىنەن شىعىپ پروتوسيناي الىپبيىنە ءوتىپ, ودان فينيكيا (فوينيكەس) الىپبيىنە جەتكەن الەف – وگىز دەگەن ماعىنا بەرەدى ەكەن. سيىر جىلى بولدى عوي. بىراق اقىن سيىر جىلى دا تۋماعان ەكەن.
سوندا؟
الدە مۇنىڭ سىرى دارۆينيزمنەن باس تارتۋىندا جاتىر ما؟ ەجەلگى جازبالاردا, كەيىنگى ءدىني كىتاپتاردا الفا جانە ومەگا – ءبىرىنشى جانە سوڭعى ءارىپ – اۋەل مەن اقىر دەگەن ماعىنا بەرۋشى ەدى عوي. «مەن الفا جانە ومەگا, ءبارىنىڭ باستاۋى جانە سوڭى». اقىن رۋحى اۋەل باستا, ءسوز جارالعان ون سەگىز مىڭ عارىشتا تۋعان. بىراق بۇل – ابستراكتسيا عوي.
ەڭ ەجەلگى ءارىپ ءبىزدى وسىنشا اۋرەگە سالدى. سوڭىنا دەيىن اۋرەلەنەيىك.
كاببالادا بۇل ءارىپتىڭ ەين-سوف دەگەن ماعىناسى بار ەكەن. ەين-سوف – شەكسىز, كىرشىكسىز ءتاڭىريا.
كادىمگى ءوزىمىز قولدانىپ جۇرگەن ا – كوككە ۇمتىلعان قاراما-قايشىلىقتاردىڭ بىرلىگى. جاراتۋشىعا ۇمتىلۋ. بۇل – پيراميدا, كيىز ءۇي, قوس, مازار.
«جۇلدىزدانعان اسپاندى دا (بارلىعىنان جوعارى), جۇمىر باسپەن دار-ر ەتكىزىپ جىرتىپ شىعام مەن ءالى!» (ت.ءا.)
ەندى «ا» ءارپىنىڭ جازباشا كىشى ءتۇرى «ا» – ورالعان جىلان. اقىننىڭ ءبىر ولەڭىندە ء«يىرىلىپ, جيىرىلىپ ءوز ىشىمە تىعىلام» دەۋىنىڭ دە سىرى وسىندا تۇرعانداي. اقىن جىلان جىلى تۋعان. ونىڭ كۋلتى – مار. الفا – الەف – ا – ا.
يگرەك تاۋلىگى
ەجەلگى الىپبيلەردە ارىپتەردىڭ رەت سانى كادىمگى ەسەپ سانىمەن سايكەسىپ وتىراتىنىن بايقايمىز. سول سەبەپتى دە ساندى ارىپپەن, ءارىپتى سانمەن تاڭبالاۋ ءۇردىسى قالىپتاسقان.
يگرەك – لاتىن الىپبيىندە 25-ءىنشى ءارىپ. اقىن ايدىڭ 25-ءىنشى تاۋلىگىندە تۋعان دەۋ ابدەن قيسىندى. الايدا اقىننىڭ تۋعان كۇنى ايدىڭ 20-سىنشى تاۋلىگى ەكەنىن بىلدىك.
سوندا قالاي؟
ءۇ – تاڭباسى لاتىن الىپبيىندە يگرەك دەپ وقىلسا, گرەك الىپبيىندە يپسيلون دەپ وقىلادى. ال يپسيلون گرەك الىپبيىندە رەتى بويىنشا جيىرماسىنشى ءارىپ.
مۇنىڭ جۇمباعى شەشىلدى:
تىنىشتىقبەك ابدىكاكىم ۇلى – 1953 (جىلان جىلى) جىلدىڭ 20 ماۋسىمىندا ومىرگە كەلگەن.
يكس-بەسىن جانە ومەگا
ادامنىڭ ومىرگە كەلۋى مەن ومىردەن ءوتۋى – جاراتۋشىنىڭ عايىبى. عايىپ – پەندە ساناسىنىڭ باسپالداعى بارمايتىن الەم. سوندىقتان ءبىز يكس-بەسىننىڭ ساندىق-تسيفرلىق مانىنە ەمەس, پالسافالىق قاسيەتتى مانىنە قاتىستى ويلانايىق.
ح – لاتىن الىپبيىندەگى يكس, گرەك الىپبيىندەگى حي, ەسكى سلاۆيان الىپبيىندەگى حەر, اراب جانە كيريلليتساداعى حا. بىراق مۇنىڭ ءبارى بىزگە قورەك بولا المايدى.
بىزگە يۆريت تىلىندەگى ح – حەت كەرەك.
حەت – ولاردىڭ تانىمىندا قاشۋ (جۇگىرۋ) جانە قايتا ورالۋ دەگەن مانگە يە. ياعني ءومىر اينالىمى. سيمۆوليكادا – كوپىر دەگەن ماعىنا بەرەدى. اسپان مەن جەر اراسىنداعى كوپىر. كوپىر – جاراتۋشى مەن عالامنىڭ, عالام مەن ادامنىڭ بىرلىگى. سول كوپىر ارقىلى ادام بالاسى ءوز يەسىنە بارادى.
ومەگا – ءبىردىڭ سوڭى, ەكىنىڭ باسى.
