«بۇگىندە ەلىمىز بويىنشا سەيسميكالىق قاۋىپتى ايماقتاردا جەر سىلكىنىسىن بولجاۋ جانە سەيسميكالىق قاۋىپ-قاتەردى تومەندەتۋ ماقساتىندا 63 ستاتسيونارلىق ستانتسيا جۇمىس ىستەپ تۇر.
تسيفرلىق تەحنولوگيالاردى دامىتۋ اياسىندا الماتىدا جەر سىلكىنىسىن ەرتە حابارلايتىن 9 اۆتوماتتاندىرىلعان سەيسموستانتسيا ورناتىلدى. ونىڭ كورسەتكىشىن موبيلدىك قوسىمشا ارقىلى كورۋگە بولادى. بولاشاقتا تاعى 28 cتانتسيا ورناتۋ جوسپارلانۋدا. ەلىمىزدىڭ سەيسميكالىق قاۋىپسىزدىگىن قامتاماسىز ەتۋ ءۇشىن 2023 جىلعا دەيىنگى جول كارتاسى بەكىتىلىپ, ونىڭ اياسىندا 20-دان استام ءىس-شارا قولعا الىنباق», دەدى يۋري يلين وكق-دە وتكەن ءباسپاسوز ءماسليحاتىندا.
ءمينيستردىڭ ايتۋىنشا, بيىل 6 تۇرعىن ءۇي, 37 دەنساۋلىق ساقتاۋ جانە 21 ءبىلىم بەرۋ نىسانى سەيسميكالىق باقىلاۋدان ءوتتى.
«سەيسميكالىق قۇبىلىستاردىڭ تاۋلىك بويعى مونيتورينگىن سەيسمولوگيالىق تاجىريبەلىك-ادىستەمەلىك ەكسپەديتسيا جۇرگىزەدى. ال جەر سىلكىنىسى تۋرالى بولجاۋ مەن ونىڭ كارتاسىن ازىرلەۋدى سەيسمولوگيا ينستيتۋتى جۇزەگە اسىرادى. قازىرگى ۋاقىتتا الماتى قالاسىندا سەيسميكالىق شاعىن اۋدانداستىرۋ جۇرگىزىلىپ, شىعىس قازاقستان, الماتى جانە جامبىل وبلىستارى مەن وسكەمەن قالاسىنىڭ سەيسميكالىق كارتاسى ازىرلەندى. سونداي-اق بيىل قىركۇيەكتە ازاماتتىق قورعانىس ورگاندارى كۇشتەرى مەن قۇرالدارىن دايىنداۋ ماقساتىندا قىرعىزستان مەن وزبەكستاننىڭ شەكارا ماڭى ەلدەرىنىڭ بولىمشەلەرىمەن «جەر-2021» حالىقارالىق وقۋ-جاتتىعۋى وتكىزىلدى», دەيدى ول.
