بۇل جوباعا ينۆەستيتسيا شەتەلدىك قارجى ينستيتۋتتارىنان ءبولىندى. ناقتىراق ايتار بولساق, «ازيا دامۋ بانكىنەن» 41 ملن دوللار مولشەرىندە قاراجات قۇيىلدى. ال جول قۇرىلىسىن ەكى قازاقستاندىق فيرما جانە ۇلىبريتانيانىڭ «بالفور بيتتي» جانە تۇركيانىڭ «مەنسەل» كومپانيالارى «افدان» اق, «جەزقازعان جولدارى» اق-مەن بىرىگىپ جۇرگىزدى. جول سالۋ جۇمىستارى ءۇش جىل قاتارىنان جۇرگىزىلىپ, 2001 جىلى ساتىمەن اياقتالدى.
سونىمەن قاتار 2001 جىلى قاراعاندى-وساكاروۆ جول ۋچاسكەسىندە مەردىگەر رەتىندە تۇرىك فيرماسى «ينتەس-يسوت» جۇمىس جۇرگىزىپ, حالىقارالىق قارجى ۇيىمدارى بولگەن ينۆەستيتسيانى يگىلىككە جاراتتى. ساپالى جول 2003 جىلى تولىعىمەن پايدالانۋعا بەرىلدى.
ودان كەيىنگى ايتۋلى جوبانىڭ ءبىرى – وساكاروۆكا-ۆيشنەۆكا جول ۋچاسكەسى بولدى. مۇنداعى جۇمىستاردى وتاندىق «جەزقازعان جولدارى» اق جانە «جەلدورستروي» بىرىككەن مەكەمەسى 2021 جىلى باستاپ, 2003 جىلى اياقتادى.
تاعى ءبىر ەرەكشە اتاپ وتەر جوبا – قاراعاندى قالاسىنداعى كىشى اينالما جول. قازىر بۇل 7-ءشى ماگيسترال دەپ اتالادى. ۇزىندىعى 34 شاقىرىمدى قۇرايدى. بۇل ۋچاسكەنىڭ قۇرىلىسى 2002-2003 جىلدارى جۇرگىزىلدى. جوبا جۇمىستارىنىڭ 17 شاقىرىمىن «قاراعاندى جولدارى», قالعانىن «جەزقازعان جولدارى» فيرمالارى اتقاردى. ايتا كەتۋ كەرەك, بۇل جولدىڭ سالىنۋى وبلىس ورتالىعى ءۇشىن اسا ماڭىزدى بولدى. سەبەبى ودان بۇرىن قاراعاندى-الماتى كۇرە جولىمەن جۇرگەن اۆتوكولىكتەر لەگى قالانى قاق جارىپ وتەتىن. ەندى ولار قالا ىشىندە كەپتەلىستى ازايتىپ, اۋاسىن لاستاماي, سىرتپەن اينالىپ وتە باستادى.
وسى ورايدا, ۇزىندىعى 88 شاقىرىمدى قۇرايتىن الماتى-گۇلشات جول بولىگىندەگى گۇلشات-سارىشاعان ۋچاسكەسىنىڭ قۇرىلىسىن دا تىلگە تيەك ەتە كەتۋگە بولادى. بۇل جۇمىستاردى حالىقارالىق قارجى ينستيتۋتتارىنىڭ اقشاسىنا «يردو» كومپانياسى جۇرگىزدى. 2001 جىلى باستالعان جۇمىس 2003 جىلى مارەسىنە جەتكەن بولاتىن.
سونىمەن بىرگە اقسۋ-ايۋلى-قاراعاندى, اقسۋ-ايۋلى-اقشاتاۋ جول ۋچاسكەلەرىنىڭ سالىنۋى دا وبلىس ەكونوميكاسى ءۇشىن ماڭىزدى ءرول وينادى.
جالپى, قاراعاندى وبلىسىندا اۋىلدار اراسىنداعى جولداردى قوسقاندا, بارلىعى 12 440 شاقىرىمعا سوزىلاتىن جول بار ەكەن. ونىڭ 2 785 شاقىرىمى رەسپۋبليكالىق ماڭىزداعى جولعا جاتادى. وسى ورايدا «جول اكتيۆتەرىنىڭ ۇلتتىق ساپا ورتالىعى» رمك قاراعاندى وبلىستىق فيليالىنىڭ ديرەكتورى ايبول بيدايبەكوۆ مىناداي مىسال كەلتىرەدى. ء«بىزدىڭ ەلىمىزدە جولدىڭ 1 مىڭ شارشى كيلومەترگە ورنالاسۋى 35,6 شاقىرىم ەكەن. ال بۇل كورسەتكىش رەسەيدە 44 شاقىرىمعا تەڭ كەلەتىن كورىنەدى. اقش-تا ءتىپتى جوعارى – 1 مىڭ شارشى كيلومەترگە ورنالاسۋى 670 شاقىرىمنان كەلەدى. ياعني بىزگە بۇل باعىتتاعى جۇمىستاردىڭ اۋقىمىن ارتتىرا ءتۇسۋ كەرەك. ويتكەنى ءبىزدىڭ جەرىمىز كەڭ, ەلدى مەكەندەرىمىز ءبىر-بىرىنەن الشاق ورنالاسقان. ال اۋداندار, اۋىلداردىڭ اراسىن جالعايتىن جولدار تىم از», دەيدى ول.
ءيا, بۇل ءسوزدىڭ جانى بار. جاڭا جول سالۋ بىلاي تۇرسىن, قازىر وبلىستىق ماڭىزداعى ءبىراز جولدار ساپاسىنىڭ سىن كوتەرمەيتىنى دە شىندىق. دەگەنمەن قاراعاندى وبلىسى بويىنشا جول قۇرىلىسى سالاسىندا سەرپىلىس بار. قازىرگى تاڭدا وبلىستىڭ قالالارىندا, اۋدان ورتالىقتارىندا, ءتىپتى اۋىلدىق ەلدى مەكەندەردە مۇمكىندىگىنشە جولدار سالىنىپ, جوندەلىپ جاتىر. مىسالى, بىلتىردان باستاپ مايقۇدىق ەلدى مەكەنىندە ۇزىندىعى 10,5 شاقىرىمنان اساتىن كۇرە جول تۇبەگەيلى جاڭعىرتىلدى. سونداي-اق جەزقازعان, ساتباەۆ, بالقاش, تەمىرتاۋ قالالارىندا سالا بويىنشا ءىرى جوبالار جۇزەگە استى.
قاراعاندى وبلىسى
